Lehen fasean onenak izan ziren, eta berdin hasi dute finalaurrekoetako ligaxka ere. Unai Lasok eta Jon Ander Albisuk lehen puntua lortu dute Erik Jakari eta Martxel Iztuetari irabazita (13-22). Partida gogorra izan da Nafarroa Arenan jokatu dutena, baina hobeak izan dira urdinak, eta pauso garrantzitsua eman dute Binakako Txapelketako finalera sailkatzeko. Indartsu atera dira kantxara Laso eta Albisu (1-5) baina neurketaren erdialdera arte parekatua izan da lehia (9-11). Orduan, ordea, Albisu gehiago gozatzen hasi da, Lasok asmatu du tantoak amaitzen, eta errenta zabaldu dute (9-19). Hamabi tanto egin ditu Bizkarreta-Gerendiaingo aurrelariak. 13-20raino gerturatu dira gorriak, baina norgehiagoka maldan gora zuten ordurako. Datorren astean, lehen jardunaldiko galtzaileak nor baino nor ariko dira larunbatean, Donostian: Elordi eta Zabaleta Jakaren eta Iztuetaren aurka. Igandean Gasteizko Ogeta pilotalekuan, berriz, bi bikote irabazleek neurtuko dituzte indarrak: Altuna III.a eta Ezkurdia Lasoren eta Albisuren kontra. [articles:2154776]

Bigarren itzuli zoragarria egiten ari da Osasuna, baina gaur tupust egin du. Alessio Lisciren taldea ez da eroso aritu Mestallan, eta 1-0 galdu du Valentziaren kontra. Ramazanik sartu du gola 67. minutuan, penaltiz. Osasunari asko kostatu zaio etxeko taldearen areara gerturatzea, eta lehen zatian ez dio apenas lanik eman Dimitrievski atezainari. Jokaldi arriskutsuena atsedenaldia iristear zela heldu da, Victor Muñozen erremate batean. Defentsan, ordea, sendo aritu da talde nafarra, eta ez du sobera sufritu. Bigarren zatian ausardia gehiagorekin zelairatu da Valencia, eta min egiten hasi dira erasoko jokalariak: Luis Rioja, Ramazani eta Umar Sadiq. Zelai erdian berreskuratutako baloi bat luze jo du Valentziak, Sadiq atzelariei gailendu zaie, eta, buruz burukoan, Sergio Herrerak penaltia egin dio Realeko aurrelari ohiari. Ramazanik bitan jaurti behar izan du, baina biak sarera bidali ditu, patxadaz. Azken minutuetan partida osoan ez bezala estutu du Osasunak, abagune gehiago sortu ditu, baina gola ez da heldu. Sailkapen nagusian hamargarren da Lisciren taldea, 33 punturekin.

Duela zenbait astetatik amaituta zeuden dortsalak. Emakumezko 6.500 korrikalarik hartu dute parte Lilatoiaren 36. edizioan, eta, izerdia botatzeaz gain, aldarrikapenez bete dituzte Donostiako kaleak. Helmugan Mikele Zurutuza legazpiarra izan da azkarrena, 18 minutu eta 34 segundoko denborarekin; Itziar Ibarbiak amaitu du bigarren, eta Maitane Guerrerok hirugarren. [galleries:horizontal:126] Bost kilometroko ibilbidea osatu dute lasterkariek, eta milaka lagunek animatu dituzte errepide bazterretatik, Donostia erdialdean, Gros auzoan zein bulebarrean. Eguraldia lagun izan dute, eta ez dira falta izan aldarrikapenez betetako pankartak, kartelak eta kamisetak. Izan ere, antolakuntzak gogorarazi du Lilatoia ez dela lasterketa bat soilik: «Feminismoaren aurrerabidearen ospakizun bat da, emakumeok edozein erronka konkistatzeko dugun gaitasunaren eta ausardiaren etengabeko gogorarazpen bat». Jaio zenetik, izugarri hazi da lasterketa: 1990. urtean 190 emakumek hartu zuten parte, iaz 6.235ek, eta aurten 6.500ek.