Akordiorik ezean, langileek mobilizazioak egitea aztertuko dute gaur, eta greba “gogortzea ere” proposatuko dute. Langileen ordezkariek, gainera, manifestazioa proposatuko dute maiatzaren 1ean, Basauritik Bilbora.

Osasunak hiru garaipen kateatu ditu Ligan, denboraldi honetan lehen aldiz. Vicente Morenoren taldeak Gironari irabazi zion aurrena, eta Valladolidi ondoren; gaur, berriz, 1-0 hartu du mendean Sevilla. Ruben Garciak sartu du gola, falta jaurtiketa dotore bati esker, 25. minutuan. Gainera, 32. minutuan epaileak Sevillako jokalari bat kanporatu du: Lukebakio. Horrek lana erraztu dio Osasunari. Nafarrek ez dute partida ikusgarririk jokatu, eta Sevillak gertu izan du berdinketa hiruzpalau kornerretan. Baina hiru puntuak poltsikoratu ditu Osasunak. Hala, datorren denboraldian Europan jokatzeko borroka betean sartu dira gorritxoak. Motel hasi da partida, bizitasunik gabe. Dena den, Sevillak pare bat abisu eman ditu; argiena, Hormigok, 5. minutuan. Pase sakon bat jaso du, baina azkenerako indarrik gabe egin du errematea. Osasunako jokalariek ez dute ondo zaindu jokaldia. Abagune horrek konfiantza eman dio Sevillari. Bloke ertain batean kokatu da, eta baloia berreskuratu duenean aurrera egin du. Lukebakiok beste aukera bat izan du, baina epaileak baliorik gabe utzi du jokoz kanpo zegoelako. Osasuna ez zegoen eroso, eta zenbaitetan tentsiorik gabe antzeman zaio. Estu aritu da minutu horietan. Baina pazientziaz jokatuta, pixkanaka joera hori aldatu du. Gehiago hasi da jokatzen Sevillaren zelaian, eta 25. minutuan aurrea hartu du norgehiagokan. Arearen eskuin ertzean izandako falta bati esker izan da. Ruben Garciak hartu du baloia, eta nondik jaurti behar zuen ikusita, bazirudien erdiratu egingo zuela. Baina zuzenean jaurti du. Dotore gainditu du giza hesia, eta Nylandek ezin izan du baloia geratu. Gorritxoei alde jarri zaie partida. Sevillak arriskatu beharra zuen, eta horrek eraginda utziko zituen zuloak ederki baliatu zitzakeen Osasunak, kontraerasoan jokatuta. Hortik atsedenaldira bitarteko minutuetan Cordero Vega epailea izan da protagonista. Aurrena, Sevillako jokalari bati txartel gorria atera dio: Lukebakiori. Aurrelariak ukondoa mugitu du Catenarekin lehian ari zela, eta jo egin duela interpretatu du. Bisitariei are zailago jarri zaie neurketa. Ondoren, lehen zatia luzapenean sartzera zihoala, Pablo Ibañez Osasunakoari atera dio gorria. Erdilariak oinaren atzealdean jo du Sow, Sevillakoa. Baina kolpea txikia izan da. VAR bidez jokaldia aztertzeko agindu diote epaileari, eta, azkenean, horia atera dio. Minutu horietan Osasunak kontrolpean izan du neurketa, eta Aimar Orozek aukera izan du gorritxoek markagailuan zuten aldea areagotzeko, 41. minutuan. Baina haren errematea kanpora joan da. Hala amaitu da lehen zatia. Aukerak sortu ezinik Gorritxoek ondo ekin diote bigarren zatiari. Atzean sartu dute Sevilla, eta nahiz eta aukera garbirik ez sortu, nagusi izan dira. Vicente Morenok Bryan Zaragoza zelairatu du, eta egin duen buruz buruko lehen jokaldian bikain erdiratu du. Budimirrek errematatu du buruz, baina baloia gutxigatik joan zaio kanpora. Lehen zatian bezala, Osasunari biziago jokatzea falta izan zaio, min gehiago egiteko. Horrek mesede egin dio Sevillari. Joaquin Caparrosek zuzentzen duen taldeak jokalari asko pilatu ditu zelai erditik atzera, eta arreta osoa defentsako lanean jarri du. Erasoan, berriz, geldikako jokaldiren bat edo Osasunaren hutsen bat baliatzen saiatu da. Eta helburua lortzear egon da pare bat kornerretan, Osasunako atzelariek ez baitituzte behar bezala zaindu. Gertuen Agonek izan du gola. Haren burukada kanpora joan da gutxigatik, 62. minutuan. Esnatu beharra zuen Osasunak, eta Nylanden atera gehiagotan gerturatu. Baina ez zuen gol aukerak sortzeko modua topatzen. Hala izan da 75. minutura arte. Orduan azaldu da berriro ere Bryan Zaragoza. Ohikoa duen jokaldia egin du: hegalean baloia hartu du, eta barrurantz joan da. Hala, arearen ertzera iritsi denean errematea egin du. Gurpila eman dio baloiari, baina ez behar beste, eta errematea kanpora joan zaio. Azken minutuetan Sevillak estutu egin du, eta berriro ere korner batean, berdinketa lortzear egon da. Baina Sergio Herrera azaldu da. Atezainak geldiketa ikusgarria egin dio Sauli, hark buruz erremate on bat egin ostean. Pequek ere ez du aparte izan gola, baina ez du asmatu. Azkenean, dena den, golik jaso gabe eutsi dio Osasunak. Osasuna-Sevilla Osasuna: Herrera; Areso, Boyomo, Catena (Bryan, 46. min.), Herrando, Bretones (Juan Cruz, 66. min.); Pablo Ibáñez (Iker Muñoz, 46. min.), Torro, Aimar; Ruben García (Kike Barja, 89. min.) eta Budimir (Arnaiz, 84. min.). Sevilla: Nyland; Carmona (Suso, 78. min.), Bade, Kike Salas, Pedrosa; Agoume, Saul, Juanlu, Hormigo (Garcia Pascual, 38. min.); Sow (Peque, 78. min.) eta Lukebakio. Gola: 1-0: Ruben Garciak (25.min.)

Lehia, ikuskizuna eta aitortza uztartuko ditu aurten Sagardoaren Txapelketak: lehia, Oriamendi 2010 enpresako erremontista onenak ariko direlako nor baino nor gehiago; ikuskizuna, bosgarren urtez jarraian, txapelketa Erremontari ETB1eko saioaren barruan jokatuko dutelako; eta, aitortza, Javier Urrizak azken txapelketa izango duelako ekainaren 28an erretiroa hartu aurretik, eta, hori baliatuta, hari gorazarre egingo diotelako. Astelehenean hasiko da lehia, Hernaniko (Gipuzkoa) Galarreta frontoian, eta, toki berean jokatuko dute finala, ekainaren 16an. Bost bikotek jokatuko dute txapelketa, iaz baino bat gutxiagok. Oriamendiko arduradunaren arabera, horrek maila igoko du, baita lehia areagotu ere. Ohi bezala, bikote bakoitza sagardotegi baten izenean ariko da: Urrizak eta Iban Larrañagak Petritegi sagardotegiaren izena eramango dute; Kemen Aldabek eta Endika Barrenetxeak, Oialume Zarrena; Imanol Ansak eta Aritz Zubirik, Aburuzarena; Josetxo Ezkurrak eta Aritz Juaneneak, Bereziartuarena; eta, Beñat Segurolak eta Xabier Azpirozek, Alorrenearena. Iaz bezala, bikote bakoitzak kapitain bat izango du: Aritz Altadill izango da Urrizarena eta Larrañagarena; Iñaki Lekuona, Aldaberena eta Barrenetxea IV.arena; Patri Espinar, Ezkurra II.arena eta Juanenearena; Igor Arruti, Segurolarena eta Azpirozena; eta, Gorka Izagirre, Ansa II.arena eta Zubirirena. Txirrindulari ohia lehen aldiz arituko da kapitain. Beste laurak prestatzaileak dira, eta iaz ere aritu ziren kapitain lanetan. Erremontista guztiek mikrofono eta pultsometro bana eramango dute soinean. Bada beste berrikuntza bat ere: aldatu egin dute lehiaketa sistema. Lehenbizi, bost jardunaldiko ligaxka jokatuko dute. Hurrengo bost astelehenetan ariko dira: apirilaren 28an, eta maiatzaren 5ean, 12an, 19an eta 26an. Iaz, lehen lau sailkatuak aritu ziren finalerdietan. Aurten, ordea, lehen bikote sailkatua zuzenean sailkatuko da finalerako; bigarrena finalerdian ariko da; hirugarrenak eta laugarrenak kanporaketa jokatuko dute; eta, azken sailkatua lehiatik kanpo geratuko da. Kanporaketa ekainaren 3an jokatuko dute, eta, partida horren irabazlea finalerdirako sailkatuko da. Finalerdia ekainaren 9an jokatuko dute, eta, finala, 16an. 18:00etan hasiko dira partida guztiak, eta ETB1ek 22:30ean emango ditu. Set formatuan jokatuko dituzte partida guztiak: lehen bi setak hamabost tantora izango dira, eta, hirugarren seta beharko balitz, hori zortzi tantora izango da. Emaitzen arabera lortuko dituzte puntuak bikoteek, sailkapenerako: setetan 2-0 irabazten duen bikoteak lau puntu lortuko ditu; 2-1 irabazten duenak, hiru; 2-1 galtzen duenak, bat; 2-0 galtzen duenak, batere ez; eta bi setak kontuan hartuta hamabost tanto lortzen ez dituenari puntu bat kenduko zaio. Lehiari dagokionez, eta partidei bizitasun handiagoa emateko, sakea ateratzeko denbora muga bat izango dute bikoteek tantoa egiten dutenetik: 30 segundo. Sakea tarte horretan ateratzen ez duenak epailearen abisua jasoko du. Lehenbizikoan, hitzez esango die 30 segundo horiek gainditu dituztela, eta txartel urdina aterako die. Bigarren abisuan, sakea galduko dute, eta bikote aurkariak izango du horretarako aukera. Hori gertatuz gero, araua betetzen ez duen bikoteari txartel horia aterako dio. Bestalde, hirugarren abisua jasotzen badute, tantoa kenduko diete, eta txartel gorria erakutsi. Aurkariek hogei segundo izango dituzte sakea errestatzeko prestatzeko. Epailearen aurrean jokabide desegokia izanez gero, epaileak txartelak erabiltzeko aukera izango du. Bestalde, jokalari batek min hartzen badu, edo ondoezik badago, epaileek denbora gelditu ahal izango dute. Urriza, sasoi betean Urrizak bereari eutsi nahi dio: gorenean dagoela hartu nahi du erretiroa, hemezortzi urteko kirol ibilbide luze eta oparoa egin ondoren. Aukera aproposa du, txapelketa kutuna baitu Sagardoarena, are gehiago Erremontari saioaren barruan jokatzen denetik. Izan ere, lau ekitaldietatik hiru irabazi ditu, eta, bestean txapeldunorde izan da: 2021ean, Ibon Zalduarekin jantzi zuen txapela; 2022an, Zubirirekin, eta, iaz, Ibai Martirenarekin. Urtebete lehenago, berriz, finala jokatu zuen Martirenarekin. 75. txapelketa du, eta 31. txapela irabaztea du helburu. Urriza gozatzen ari da haren kirol ibilbideko azken partidetan. Sei jokatu ditu erretiroaren eguna iragarri zuenetik, eta, bat ez beste guztiak irabazi ditu. Azkenekoak utzi dio aho zaporerik gozoena, jaioterrian jokatu baitzuen duela hiru aste, Labriten, eta, hori baliatuta, omenaldi hunkigarria egin zioten. Gutxienez, beste bost partida jokatuko ditu. Baliteke zortzi izatea. Sekulakoa litzateke azken partidara txapel bat jantzita iristea. Horretan saiatuko da bete-betean. Oriamendik, halaber, Erremontari Herriz Herri egitasmoa aurkeztu du. Ekitaldi horretan, enpresako erremontistek Euskal Herriko hainbat herritan jokatuko dituzte partidak. Herri horietako biztanleek Erremontari saiorako sarrera bat jaso ahal izango dute doan Galarretako leihatilan nortasun agiria erakutsita. Lehen saiorako, herri hauetako biztanleek jaso dezakete gonbidapena: Hernanikoek, Aizarnazabalgoek, Andoaingoek, Lasarte-Oriakoek (Gipuzkoa) eta Lekunberrikoek (Nafarroa).

Sei denboraldi eta erdiz Reala zuzentzen aritu ostean, Orioko (Gipuzkoa) patroiak lema utziko du: Imanol Alguacilek ez du Realean jarraituko sasoia amaitzean. Zurrumurru ugari izan dira azken asteetan haren etorkizunaren inguruan, eta gaur argitu da dena: klubak ohar bidez jakinarazi duenez, Alguacil ez da txuri-urdinen teknikaria izango datorren denboraldian. Hark hartu du erabakia. Realak «eskerrak» eman dizkio entrenatzaileari urteotan egindako lanagatik, eta azpimarratu du oraindik asko dutela jokoan: Europarako sailkatu nahi dute, eta agur gozoa eman oriotarrari. Imanolen gidaritzapean gauza handiak lortu ditu talde txuri-urdinak: tartean, Espainiako Kopa bat irabazi du, eta bost urtez jarraian sailkatu da Europarako. 334 norgehiagoka zuzendu ditu orain arte talde txuri-urdinean. Denboraldia amaitzeko beste bost falta direla kontuan hartuta, 339 neurketa zuzendu ondoren utziko du kargua. Hala, Realaren partida gehien zuzendu duten entrenatzaileen artean hirugarrena izango da. Iaz gainditu zuen Alberto Ormaetxearen marka, Reala Ligako txapeldun egin zuen teknikariarena. Ormaetxea 324 norgehiagokatan aritu zen, eta Imanolek John Toshack (389) eta Benito Diaz (386) baino ez ditu aurretik. 334 partida horietatik 253 Ligan izan dira, 36 Espainiako Kopan, 44 Europa Liga eta Txapeldunen Liga artean, eta bat Espainiako Superkopan. Horietatik %47 irabazi ditu, %25 berdindu eta %28 galdu. Baina hortik harago, Jokin Aperribai presidentearekin eta Roberto Olabe futbol zuzendariarekin batera, Realaren aro loriatsu horren irudia izan da, eta ahotsa, askotan egokitu baitzaio azalpenak ematea klubean gertatzen zenaren inguruan. Anoeta Berriak ez du beste entrenatzailerik ezagutu. Realaren ohiko balioekin egin du: lan isila, umila, aurkariekiko errespetua…. Baina ezaugarri horiei lehiatzeko gaitasuna, ausardia eta konplexurik eza gehitu dizkio, eta halaxe aritu da astelehenetik igandera, Zubietan eta Anoetan, eta talde txuri-urdina lehiatu den zelai guztietan. Joko ikusgarria eginez lortu du, presioan eta joko zuzenean oinarrituta, partida ikusgarriak jokatu baititu Realak haren agindupean. Imanolen aroaren ezaugarri nagusietako bat honako hau izan da: Reala lehiakorra izan da behingoz Espainiako Kopan. Oriotarra teknikari denetik, txuri-urdinek behin irabazi dute txapelketa, hiru aldiz iritsi dira finalerdietara, bost aldiz final-laurdenetara eta beti sailkatu dira final-zortzirenetarako. Imanolen aurretik, 1988tik behin bakarrik iritsi ziren finalerdietara txuri-urdinak, eta hainbat alditan kanporatu zuten maila apalagoko taldeek. Espainiako Kopan oso lehiakorra izan arren, ez du gauza bera lortu Europako txapelketetan. 2020an jokatu zuen Realak Europako lehen neurketa Imanolen gidaritzapean, baina 2025ean, Lazioren etxean galdu ostean, teknikariak esan zuen taldea ez dagoela «halako partidetarako prest». Imanolekin Realak lau aldiz jokatu du Europa ligan, eta behin Txapeldunen Ligan. Ondo aritu da txapelketa horietako multzoen fasean, baina kanporaketa bakarra irabazi du —aurten, Midtjyllanden aurka—, eta ez da final-laurdenetara iritsi. Lehen bi urteetan final-hamaseirenetaraino iritsi zen, eta azken hiru sasoietan final-zortzirenetaraino. Aurkari hauek kaleratu dute Reala: Manchester Unitedek, RB Leipzigek, Erromak, Paris Saint Germainek eta berriz ere ingelesek. Hala ere, garai ahaztezinak izan dituzte Europan ere. 2022-23an Manchester Uniteden aurretik geratu ziren Europa ligako multzoan, eta Txapeldunen Ligan Inter Milanen eta Benficaren aurretik amaitu zuten. Garaipen historikoa lortu zuten Old Trafforden –0-1–, eta Benficaren kontra bi erakustaldi eman zituzten: Lisboako 0-1ekoa eta Anoetako 3-1ekoa. Inter Milanek ezin izan zuen Reala garaitu, eta PSVri eta Ajaxi ere irabazi zion Anoetan; azkenekoz, aurten. Realaren apustuetako bat izan zen etxeko jokalarien kopurua %60 izatea, eta %40 atzerritarrak. Bada, apustu horrekin lortu du arrakasta Imanolek. Oriotarra Realaren bigarren taldetik igo zen lehen taldera, eta konplexurik gabe egin du harrobiko jokalarien alde. Guztira beheko taldeko 30 jokalarik egin dute debuta haren eskutik. Azkena Dani Diez izan da, duela hiru jardunaldi, Valladoliden aurkako neurketan. Horietako batzuk lehen taldeko zutarri dira gaur egun: Martin Zubimendi, Aihen Muñoz eta Jon Mikel Aramburu, adibidez. Jokalari horiek beste batzuen eskutik hazi izan dira: Mikel Oiartzabal, Igor Zubeldia, Aritz Elustondo, Alex Remiro, David Silva, Nacho Monreal, Mikel Merino… Azken bost urteetan formula horrek izan du arrakasta Realean. Imanolek lotura estua izan du jokalariekin, une oro defendatu ditu, eta kritikatu izan dituztenean are gehiago babestu ditu. Lotura estua izan du ere zaleekin ere bai. Gogoangarria izan zen, Kopa irabazi eta gero, bufanda hartu eta COVID-19a zela-eta etxean zeuden zaleei kantatu zienekoa. Ontziaren patroitzat hartu izan dute beti, eta haren aldeko kantuak etengabeak izan dira Realaren partidetan. Tirabiratsuagoa izan da Roberto Olabe futbol zuzendariarekin izan duen harremana. Alexander Sorlothek ez segitzea eragin zuen lehen pitzadura harremanean, eta hortik aurrera handituz joan da. Iazko udan areagotu egin zen, fitxaketak berandu iritsi baitziren, eta Imanolek argi utzi zuen egungo multzoak denbora beharko zuela hazteko, eta horren emaitzak erakusteko. Denborak arrazoi eman dio, eta taldea bost urte pasatxo hauetan izan dituen ezaugarriak galduz joan da. Horren isla izan da atzo Alavesen aurka jokatutako partida. Eta, azkenean, teknikariak ez jarraitzea erabaki du. Denboraldi osoan aipatu izan du ez zuela argi, eta azkenean ez du segituko. Denboraldiz denboraldi 2017-2018ko denboraldian hasi zen oriotarraren bide loriatsua. Realak Eusebio Sacristan entrenatzailea kanporatu zuen, eta Imanolek hartu zuen lekukoa denboraldi amaierara arte. Hurrengo sasoian Asier Garitano hasi zen entrenatzaile lanetan, baina hura ere kaleratu egin zuen Realak urte bukaeran, eta Imanolengana jo zuen berriro talde txuri-urdinak, gaur arte. Reala hamabosgarren zela hartu zuen kargua, eta bederatzigarren bukatu zuen. Hurrengo denboraldian etorri zen zoramena. Berritutako Anoetaren lehen urtean, Imanolek futbol alaia, erasokorra eta menderatzailea proposatu zuen. Ederki moldatu ziren aurrez zeuden jokalariak —Oiartzabal, Willian Jose, Merino, Elustondo…—, iritsi berriak —Remiro, Portu, Isak, Odegaard…— eta harrobitik igotakoak —Le Normand, Aihen, Barrenetxea, Gebara…— . Urte hartan, Espainiako Kopako finalera iritsi zen Reala, eta Europa ligarako ere sailkatu zen —urte bat geroago jokatu zen, pandemiaren ondorioz—. Hurrengo sasoian Odegaard joan egin zen Realetik, baina David Silva iritsi zen Donostiara. Imanolen taldeak joko erasokorrari eutsi zion, harik eta Espainiako Kopako finala iritsi zen arte. Manchester Uniteden eta Bartzelonaren aurka galdu ostean, teknikari oriotarrak planteamendu defentsiboagoa proposatu zuen finalean, eta ederki atera zitzaion: 1-0 irabazi zion finala Realak Athletici. Bilbotarrek partida osoan ez zuten ia aukerarik sortu. Gainera, berriz ere Europa ligarako sailkatzea lortu zuen. 2021-2022an, zaleak harmailetara itzuli ziren denboraldian, Imanolen jokoa ez zen jada hasieran bezain erasokorra. Realak garrantzia ematen zion atea hutsean uzteari, eta erritmo baxuagoan jokatzen zuen. Urte hartan ohikoa bilakatu zen gol batez irabaztea. Denboraldi hura ez zen aurreko biak bezalakoa izan, eta Espainiako Kopako eta Europa ligako kanporaketak oso mingarriak izan ziren: 0-4 irabazi zion Betisek Espainiako Kopan, eta 1-3 RB Leipzigek etxean. Hala ere, Imanolek irauli egin zituen kolpe horiek eta Mikel Oiartzabalen lesio larria. 1-4-1-2-1-2 sistema erabiliz jokatzen hasi zen, «Imanolen erronboa» erabiliz. Ligan seigarren bukatu zuen, eta berriz ere Europa ligarako sailkatu zen. Sistema berriarekin jokatzeko prestatu zen taldea hurrengo denboraldian, eta Realak Brais Mendez, Take Kubo, Alexander Sorloth —utzita— eta Umar Sadiq fitxatu zituen, besteak beste. Erronboa eraginkorra izan zen denboraldiaren lehen zatian, baina otsaileko txakalaldiaren eta Oiartzabalen itzuleraren ondorioz, 1-4-3-3 sistemari ekin zion Imanolek, orain arte bezala. Reala Txapeldunen Ligarako sailkatu zen, eta entrenatzaileak bere emaitzarik hoberena lortu zuen. Imanol Alguacil, Carlo Ancelotti Real Madrileko entrenatzailea atzean duela. JUAN HERRERO / EFE Haren aginduetara, txuri-urdinek Europa liluratu zuten Txapeldunen Ligako multzoen fasean. Reala erabat erasokorra izan zen, eta ez zuen neurketarik galdu. Inter Milanen aurkako bi norgehiagokak berdindu zituen, eta Benficari sei puntu atera zizkion. Txuri-urdinek lehen postuan amaitu zuten multzoen fasea. Espainiako Ligan ere ondo aritu zen, baita Espainiako Kopan ere, baina Mallorcak finalerdietan kaleratu zuen, penaltietan. Kolpe hura jaso zuenetik, Imanolen taldeari asko kostatu zaio burua altxatzea. Azkenean, Espainiako Ligan seigarren bukatu zuen. Aurten, ordea, sentipenak okerragoak izan dira. Mikel Merino eta Robin Le Normand saldu zituen klubak, eta emaitza txarrak izan ziren hasieratik. Gol falta nabaria izan da denboraldi osoan —32 gol sartu ditu ligan—, eta jokoa astuna izan da. Egun bederatzigarrena da Espainiako Ligan, baina Europarako sailkatu nahi du, ibilbidea borobiltzeko. Jokin Aperribaik iaz esan zuen Reala beste aro batean sartu dela, baina uda honetan hasiko da egiazko aro berria. Imanolek ez ezik, Olabe futbol zuzendariak ere ez baitu segituko. Erik Bretos kirol zuzendariak nahikoa lan izango du udan, eta lehen egitekoa izango da Realaren lema nork eramango duen aukeratzea. Datorrenak Imanolen ondarea izango du altxor gisa.

Gaur langileek laugarren greba eguna egin dute. Ekoizpena geldirik dago Basauriko Bridgestone lantegian eta jarraipena erabatekoa izaten ari da enplegu-erregulazioko espedientearen aurka.

Lursail berean eguzki plakak jarri eta letxugak eta patatak landatzea bateragarri den aztertuko dute Arkautin

Nafarroako Gobernuak 603 lanpostuko lan eskaintza publiko partziala adostu du sindikatuekin 2025erako.

Etxeko taldea nagusitu da gaur gauean Alavesek eta Realak Mendizorrotzan jokatutako derbian: 1-0. Tenagliak 65. minutuan sartutako gol ederra erabakigarria izan da. Hari esker eskuratu ditu hiru puntuak Eduardo Coudetek entrenatutako taldeak, eta, hari esker utzi ditu atzean jaitsiera postuak. Biharko emaitzen zain, hamaseigarren postuan dago Alaves, 34 punturekin. Bi puntura du hemezortzigarren sailkatua, Las Palmas, eta hark baino gol alde hobea du. Bost partida falta zaizkio jokatzeko, eta gogor borrokatu beharko da oraindik ere mailari eusteko, baina gaur egindakoak arnasa emango dio, baita bultzada ere. Reala, aldiz, suspertu ezinik dabil: puntu bakarra lortu du azken hiru partidetan, eta ia mirariz izan zen, aurreko igandean, Vila-realen zelaian. Horren ondorioz, asko ari zaio zailtzen seigarren urtez jarraian Europarako sailkatzea. Gaur-gaurkoz, bederatzigarren postuan dago, 42 punturekin. Lau puntura du zazpigarrena, Celta, eta bira zortzigarrena, Mallorca. Ez da alde erabakigarria, baina zuloa gero eta handiagoa egiten ari da. Gainera, baliteke Realak bi postu egitea behera jardunaldian, puntu bakarrera baititu Rayo Vallecano eta Osasunak, eta biek bihar jokatuko baitute. Gaur galduta, halaber, derbietan daraman ezina areagotu du: bost jokatu ditu denboraldi honetan, eta guztiak galdu ditu. Hain zuzen, derbia jokatuko du hurrengo jardunaldian, maiatzaren 4an, Anoetan, Athleticen aurka. Ohiko derbia izan da gaurkoa, emozio askokoa eta joko gutxikoa. Ezer gutxi gertatu da lehen zatian. Realak hobeto ekin dio lehiari, eta bi aukera izan ditu hogeigarren minutuaren bueltan, baina ez Sergio Gomezek lehenbizi, ez Brais Mendezek gero ez dute asmatu. Ez dira izan gol aukera garbiak, baina bai arriskuko jokaldiak. Alaves, ordea, ez da ezta arriskua sortzeko gai izan ere. Gora egin du azken minutuetan, baina ez nahikoa Reala estu hartzeko. Hori dela eta, Coudetek bi aldaketa egin ditu atsedenaldian, eta Gebara eta Conechny zelairatu ditu Jordanen eta Carlos Martinen ordez. Aldaketek on egin diote Alavesi, eta lehen aldiz, arriskuarekin gerturatu da Realaren areara. 59. minutuan, Tenagliari gutxigatik joan zaio kanpora buruz errematatutako falta jaurtiketa bat. Abisua izan da. Bost minutu eskas geroago, ordea, ez du huts egin, eta bikain jo du eskuin boleaz baloia korner batean. Ahaleginaren saria jaso dute etxekoek. Gola jaso aurretik prest zuen aldaketa hirukoitza egin du Imanol Alguacilek, eta Aritz Elustondo, Sucic eta Oskarsson zelairatu ditu Arambururen, Brais Mendezen eta Kuboren ordez. Beste bi aldaketa egin ditu hamar minutu geroago: Beckerrek eta Mariezkurrenak Sergio Gomez eta Pablo Marin ordezkatu dituzte. Hamar minutuan ia talde erdia aldatu du Realeko entrenatzaileak. Ikusten ari zena batere gustatzen ez zitzaionaren seinalea zen. Hala ere, aldaketek ezer gutxi aldatu dute Realean. Are gehiago, Alavesek izan du aukerarik garbiena: 82. minutuan, Antonio Blanco bigarren gola sartzear izan da, baina urrutitik egin duen jaurtiketa gutxigatik joan da kanpora. 90. minutuan, Oskarssonek gola sartu du, baina epaileak baliogabetu egin du, aurrelaria jokoz kanpo baitzegoen. Ez da egon aparteko beste jokaldirik. Azkenean, garaipen garrantzitsua etxekoentzat. Pozarren ospatu dute. Aldiz, burumakur amaitu dute bisitariek. ALAVES-REALA Alaves. Sivera; Tenaglia, Garces, Mouriño, Manu Sanchez; Jordan (Gebara, 46. min.), Blanco; Carlos Vicente, Guridi (Protesoni, 71. min.), Carlos Martin (Conachny, 46. min.); eta Kike Garcia (Toni Martinez, 78. min.). Reala. Remiro; Aramburu (Aritz Elustondo, 66. min.), Jon Martin, Pacheco, Javi Lopez; Zubimendi, Brais Mendez (Sucic, 66. min.), Pablo Marin (Mariezkurrena, 76. min.); Kubo (Oskarsson, 66. min.), Oiartzabal eta Sergio Gomez (Becker, 76. min.). Golak. 1-0: Tenagliak (65. min.).

Bilbo Basketek ezin hobeto biribildu du klubaren sorreraren 25. urteurrena: garaikur bat oparitu dio bere buruari. FIBAren Europako Kopa irabazi dute, finalean PAOK Tesalonika garaituta. Hala, bilbotarrek beren historiako lehen titulua lortu dute, eta mugarri bat ezarri. Galdu egin dute gaur itzulerako partida (84-82), baina joanekoan lortutako emaitzak ahalbidetu die txapeldun izatea, zazpi punturen aldeagatik irabazi baitzuten Miribillan (72-65). Majo sufritu dute, halere. Lehen zatian bazirudien kontrolpean zuela finala Bilbo Basketek: ondo ari zen jokatzen, eta hamar punturen errentarekin joan da atsedenaldira. Bueltan, baina, guztiz aldatu da partida. Azken laurdenean kanporaketa irauli dute greziarrek. Itxura txarra hartu du finalak, baina azken minutuan egoerari buelta eman dio Bilbo Basketek, eta une erabakigarrian asmatu du. Greziako zaleek asko estutzen dute euren pabiloian, eta giro beroa sortzen dute. Partida guztietan izaten da hala, ba zer esanik ez final batean. Harmaila burrunba batean zela ekin diote neurketari, eta Bilbo Basketek baloia hartutakoan, txistu gogor jo dute greziarrek. Ez dira kikildu, baina, bilbotarrak, eta hasieratik argi utzi dute hori: Freyden hiruko saskiratze batekin hasi dute partida. Urduritasunak urduritasun, ondo kantxaratu da Bilbo Basket, burua hotz. Lan eskerga itzela egin dute jokalari guztiek, eta talde lanean ondo aritu dira. Kanpoko jokalariak dira PAOKeko jokalari arriskutsuenak, eta hala saiatu dira min egiten. Lehen minutuetan, errebotean ere sufritu du Bilbo Basketek, Hlinason kantxaratu den arte. Min hartuta egon da pibota, eta haren falta sumatu zuen taldeak joaneko partidan. Bete-betean itzuli da gaur, ordea: uztai baten zein bestearen azpian fin aritu da. Nortasunarekin, ondo kudeatu du presioa Bilbo Basketek, eta indarrak eta markagailua pareko zirela amaitu da lehen laurdena: 24-24. Partidaren joera ez zen txarra, baina hobea izan da bigarrenaren hasiera. Indartsu ekin diote bilbotarrek, baloia ondo mugituz eta jaurtiketetan asmatuz. Horien artean, bi hiruko segidan sartu ditu Gielok, eta markagailuan aldea zabaldu du: 25-33. Momentu onari eutsi dio taldeak, Freyden gidaritzapean. Estutu du apur bat PAOKek, baina ondo erantzun du Bilbo Basketek, eta lortu du aldeari eustea, baita errenta handitzea ere. Hamar punturen aldearekin joan dira aldageletara: 39-49. Lehen zatian, apenas agertu da Greziakoen jokalari onenetako bat: Bartley. Taldeak nabaritu du haren hutsunea, Bilbo Basketen mesederako. Kontrara, fin ekin dio bigarren zatiari, Bilbo Basketen kalterako. Eta erabat aldatu da partida. Bizi-bizi kantxaratu dira greziarrak, eta hasi eta gutxira 4-0ko partziala egin dute. Pantzarren hiruko batekin minutu batzuez eten du Bilbo Basketek greziarren sua, baina ez itzali. Gora egin dute haiek, eta behera bilbotarrek. Hala, hirugarren laurdena amaitzeko lau minuturen faltan, aurretik jarri dira markagailuan: 55-54. Zaleak ere piztu ditu horrek. Momentu zailak izan dira Ponsarnauk zuzendutako jokalarientzat. Hala ere, nola edo hala eutsi diote aurkariaren joari. PAOK aurretik zela amaitu da hirugarren laurdena (63-61), baina kanporaketa alde zuten oraindik bilbotarrek. Horiek horrela, azken laurdenean erabaki da finala. Bost minuturen faltan, lau punturen aldea zuen PAOKek, baina jarraian hirukoa sartu du Reynoldsek, eta kanporaketa berdindu, segidan iraultzeko. Ez dio asko iraun pozak, ordea. Ondo eutsi diote bilbotarrek une erabakigarriari, borrokan segitu dute, sinistuta, eta azken minutuan lortu dute loria. Kanporaketa berdinduta zela, hirukoa sartu du Freyk, eta hortik aurrera, maisuki kudeatu dute abantaila. 84-82 bukatu da azkenean partida. Porrot gozo-gozoa eskuratu du Bilbo Basketek, titulu zaporekoa. «Epikoa» izan dela aitortu du teknikariak neurketa amaitutakoan. Etxea gotorleku Miribilla izan da Europako Kopan Bilbo Basketen babesgune eta gotorleku. Bilbotarrek etxean jokatu dituzten partida guztiak irabazi dituzte, bederatzi guztira, eta hori izan dute txapelketa irabazteko giltza. Zaleek hauspotuta, geldiezin aritu dira. Final-laurdenetan 84-72 irabazi zion etxean Tofas Bursari, eta Turkian galdu arren (102-93), lortu zuen errentari eustea. Alderantziz egin zuen finalerdietan. Joaneko partidan 77-58 galdu zuen Frantzian Dijonen aurka, baina balentria egin, eta emaitza irauli zuen Miribillan: 97-68 nagusitu zen. Finalean ere etxeko lanak ondo eginda utzi zituen Bilbon. Zazpi punturen aldeaz irabazi zuen: 72-65. Saskibaloian inolaz ere ez da hori errenta erabakigarria, baina bai aintzat hartzekoa. Bada, sufrituta, baina eutsi dio. 84-82 bukatu da Grezian jokatutako itzulerako partida, eta dena esanda dago: txapelketako onena Bilbo Basket izan da. Europan euskal talde batek irabazten duen bigarren titulua da hau. Aurrenekoa Baskoniak lortu zuen: Europako Errekopako txapeldun izan zen 1995-1996 denboraldian, hartan ere finalean PAOKi irabazita. Greziako taldea gustuko aurkaria dute euskal taldeek, antza. Ordutik, ordea, hautsa izan da nagusi. Bilbo Basketek berak gertu izan zuen garaikurra duela hamabi urte, Eurokopako finalera iritsi baitzen, baina galdu egin zuen, Lokomotiv Kubanen aurka. Oso bestelakoa izan da oraingoan, eta atera dute arantza: klubaren mende laurdena ospatzen ari diren honetan, ginga jarri diote jaiari. Segi dezala festak.

Datorren denboraldian ere Europan barrena bidaiatuko du Athleticek. Zein lehiaketatan jardungo duen ez daki oraindik ere, baina Las Palmasen aurka hiru puntu batu ondoren, matematikoki Europan ariko direla ziurtatu dute zuri-gorriek. Hots, Txapeldunen Liga jokatzea dute helburu, eta, bide horretan, aurrerapauso garrantzitsua eman du gaur Ernesto Valverderen taldeak. Are gehiago kontuan hartuta Vila-real aurkari zuzenak galdu egin duela. Egiari zor, partida tristea jokatu du Athleticek, baina Iñaki Williamsen gol goiztiar bat aski izan du irabazteko. Hori bai, epailearen azken txistua ez da nahi ordurako iritsi, baina helburua bete dute zuri-gorriek, eta orain Europa ligako finalerdiak ongi prestatzeko moduan izango dira. Ezer gutxi gorde du aulkian Valverdek hasierako hamaikakoari begira. Nico Williams salbu, gainerako ohiko jokalari guztiak zelairatu ditu, partidaren garrantziaren jakitun. Zuri-gorriek ez diote intentsitate izugarriz ekin lehiari, baina beharrik ere ez dute izan, ohartzerako hartu baitute aurrea. Goi mailako jokaldia osatu dute zelai erditik aurrerako jokalariek: ederki mugitu dute baloia lehenbizi, Maroanek ongi zabaldu du eskuinera baloia, Ruiz de Galarretak pase ederra eman dio sakonean Williamsi eta hark maisuki egin du 1-0ekoa. Errepikatuta hainbat aldiz ikusteko moduko gola sartu dute etxekoek. Williams anaietan zaharrena apal antzean zebilen aspaldian erasoan, baina erarik onenean itzuli da lehengora. Atzelariari izkin egin ondoren, ederki gainditu du Las Palmaseko atezaina. Golak lasaitasuna ekarri dio Athletic. Gehitxo, ziurrenik. Bisitariak ez dira gidoitik irten, eta pixkanaka konfiantza irabaziz joan dira. Baloia eurena izan da, eta Unai Simonen ate inguruan arriskurik sortu ez badute ere, jokoan nagusi izan dira. Tristea izan da Athleticen jokoa, intentsitate eta erritmo gabea. Gainera, 20. minutuan heldu da arratseko albisterik txarrena: Sanceten lesioa, enegarrena. Jokaldi nahasi batean min hartu du eskuin hankan, eta ikusi beharko da zenbateraino luzatzen zaion. Nafarraren ordez Canales gaztea zelairatu da. Baina gazte baten ilusioa ere ez du pizgarri izan Athleticek lehen zati osoan. Bistakoa izan da buruan beste kontu bat zutela jokalariek: datorren asteko Manchester Uniteden aurkako partida, hain zuzen. Sanceten lesioa ikusita, gainera, min hartzeko arriskuetatik urrun ibili dira zuri-gorriak. Baina suarekin jolastu dira, eta Las Palmasek izan ditu bizpahiru aukera on banakoa egiteko. Esaterako, 37. minutuan geldiketa aparta egin dio Unai Simonek McBurnieri. Atezainak berak eutsi dio emaitzari bere horretan. Suarekin erretzear Bestelako jarrerarekin eta nortasunarekin zelairatu da Valverderen taldea bigarren zatian. Lehen baino lehen bigarren gola egitea izan du xede, eta izan ditu horretarako aukerak. Berenguerrek buruz bidali du baloia langara korner batean. Ruiz de Galarreta eta Jauregizar zelai erdiaren jabe egin dira, eta bi haiek gidatu dute etxekoen jokoa. Hegaletatik min egin dute zuri-gorriek. Makina bat erdiraketa iritsi dira area barrura, baina Maroan ez da fin ibili erremateak egiterako garaian. Athleticera iritsi zenetik minuturik eskasenak jokatu ditu aurrelariak. Pixkanaka apalduz joan da Athleticen aparra, eta minutuek aurrera egin ahala, berdinketa irits zitekeela sinetsi du Las Palmasek. Gero eta gehiago agertu da erasoan, eta indarrak berdindu egin dira. Nico Williams zelairatu du Valverdek, baina ia igarri ere ez da egin aldaketa. Bisitariek izan dituzte pare bat aukera eder gola egiteko. Besteak beste, Januzajek langara bidali du baloia jaurtiketa eder batean. Ordea, bere horretan eutsi diote emaitzari zuri-gorriek, eta sailkapeneko laugarren postuan sendotu dira. ATHLETIC-LAS PALMAS Athletic. Unai Simon; De Marcos, Vivian, Yeray, Yuri; Ruiz de Galarreta (Prados, 83. min.), Jauregizar; Iñaki Williams, Sancet (Canales, 20. min.), Berenguer (Nico Williams, 64. min.); eta Maroan (Guruzeta, 83. min.). Las Palmas. Horkas; Viti, Alex Suarez (Cardona, 83. min.), McKenna, Marmol; Bajcetic (Campaña, 83. min.), Essugo, Marvin (Januzaj, 73. min.), Moleiro; Sandro (Fuster, 64. min.) eta McBurnie (Mata, 64. min.). Golak. 1-0: Iñaki Williamsek (5. min.). OSASUNAK SEVILLA JASOKO DU BIHAR Osasunak denboraldi honetan ez du lortu hiru partida segidan irabaztea ligan. Bada, bihar lor dezake, Sevilla mendean hartuz gero (19:00, Movistar Plus). Gorritxoek Sadarren jokatuko dute, eta, hiru puntuak batuz gero, Europarako sailkatzeko borrokan segituko dute. Bolada txarrean dago Sevilla. Giro gaiztoa dute klubean, eta emaitza txarrak lortzen ari da. Hala, Garcia Pimienta kendu, eta Joaquin Caparros da entrenatzailea aurreko jardunalditik. Moncayola eta Raul Garcia de Haro min hartuta daude, eta ez daude deialdian. Vicente Morenok honela aztertu du neurketa: «Sailkapena alde batera utzita, Sevillak jokalari oso onak ditu, eta ez da neurketa erraza izango. Baina azken bi garaipenek konfiantza eman digute».