Euriborra % 2,4ra jaitsi da otsailean, 2022ko irailetik izan den baxuena. Urtebeterako euriborraren jaitsiera horri esker, interes aldakorreko hipoteka dutenek batez beste 1.260 euro gutxiago ordainduko dute urtean.

Tubacexek % 37 txikitu zituen etekinak 2024an, 23 milioi euroraino. “Ezohiko” faktoreek izan zuten eragina iazko emaitzetan; besteak beste, Abu Dhabin fabrika bat eraikitzeko eta irekitzeko egindako inbertsioak. Salmentak, berriz, % 10 jaitsi ziren iaz, 767,5 milioi euroraino.

Erresuma Batuko lehen ministro Keir Starmerrek behin baino gehiagotan esan du prest legokeela soldaduak Ukrainara bidaltzeko, Kieven eta Moskuren artean su eten akordio bat egonez gero. Gobernuburuaren arabera, «bakeari eusteko operazioak» egitea litzateke militar horien helburua. Erresuma Batuko tropak Ukrainan zabaltzeko, hala ere, bi baldintza jarri ditu Starmerrek: alde batetik, Europako beste herrialdeek ere operazio horietan parte hartzea; eta, bestetik, Errusiaren eta Ukrainaren arteko meniak «baldintza egokiak» izatea. Azken puntu horretaz aritu dira, bestek beste, Starmer eta AEBetako presidente Donald Trump gaur, Etxe Zurian. Erresuma Batuko lehen ministroa atzo heldu zen Washingtonera, eta, kazetariei esan zienez, AEBek Europako «bakerako tropen segurtasuna bermatzea» nahi du. Izan ere, Starmerren ustez tropa horiek Ukrainan zabaltzea da «luzera begira bakea» izateko aukera bakarra. Lehen ministroak nabarmendu zuen «indarkeria aldi baterako etetea» izango dela menia, su etena hitzartu arren Mendebaldeak ez badu presentziarik Ukrainan, eta edonoiz gerra berriz has daitekeela. Trump, ostera, argi mintzatu da: «Su etena hitzartuz gero, [Errusiako presidente Vladimir] Putinek ez du beste eraso bat abiaraziko Ukrainaren aurka». Bake akordiorako bidearen lehen pausoa, halere, Ukraina AEBekin bihar sinatzekoa den mineralen inguruko hitzarmena dela esan du Trumpek, Etxe Zurian Starmerrekin batera egin dituen adierazpenetan. Trumpek azken egunetan aditzera eman duenez, akordio horrek AEBetako enpresei aukera emango lieke Ukrainako meatzeetan aritzeko, eta AEBetako presidenteak azpimarratu du hori dela «segurtasunerako bermerik handiena»: «Segurtasun berme bat dela esan liteke. Ez dut uste inork Ukrainari eraso egingo dionik han langile asko baditugu eta zerikusia badugu lur arraroekin eta gure herriarentzat behar ditugun beste gauza batzuekin». Gerra hasi zenetik, AEBak Ukrainaren alde lerratu dira; baina, urtarrilean Trump Etxe Zurira heldu zenetik, atzerri politika aldatu du Washingtonek, eta Errusiarengana gerturatu da. Are gehiago, Trumpek adierazi izan du Ukrainarako menia AEBek eta Errusiak negoziatu beharko luketela —eta esan du akordio bat lortzeko zorian egon litezkeela—. Jarrera horrek zeresana eman du Europan, eta AEBekin elkarlanean aritzeko beharra aldarrikatu dute hainbat agintarik. Washington aliatu gisa mantentzeko helburuarekin bildu zen astelehenean Frantziako presidente Emmanuel Macron Trumpekin, eta, gaur, Starmerrek presio egiten jarraitu du. Mezu bera eraman zuen Macronek Etxe Zurira; izan ere, Europako agintariek azken hilabetean babestu duten tesiaren arabera, bestelako bake akordio batek ezegonkortasuna eragingo luke Europan. Eta, Trumpi adierazi izan diotenez, ezegonkortasun horrek eragin zuzena izango luke AEBetan ere. Europaren ardura Trump izan zen aurrenekoa proposatzen Europak «bakerako tropak» zabaldu beharko lituzkeela Ukrainan. Are gehiago, asteon esan du Errusia prest egon litekeela tropa horiek onartzeko, nahiz eta Moskuk ukatu duen halakorik. Etxe Zuriko maizterraren iritziz, «Europaren arazo bat» da Ukrainakoa, eta haiek arduratu beharko lukete bakea bermatzeaz. Macron bat etorri zen adierazpen horiekin, eta Erresuma Batuak ere ildo beretik jo du: besteak beste, herrialdeko BPG barne produktu gordinaren %2,5 defentsara bideratuko dute 2027tik aurrera. Gaur egun, NATO Ipar Atlantikoko Itunaren Erakundeko hiru kidek soilik bideratzen dute beren BPGaren %2,5 baino gehiago defentsara: Poloniak, AEBek eta Greziak. NATOri dagokionez, Trumpek gaur esan du Ukraina erakundean sartzea «ezinezkoa» dela. Gauzak horrela, eta Europa batzeko asmoz, bilera bat antolatuko du Starmerrek igandean, Londresen, herrialdeek datozen urteetan egingo dituzten defentsa politikak koordinatzeko helburuarekin. NATOko hamazortzi herrialde egongo direla bertan jakinarazi berri du Starmerrek, Etxe Zurian; zeintzuk izango diren, halere, oraindik ez dute publiko egin. Harremanak Trumpek Errusiarekin harremanak hobetu nahi dituela adierazi izan du behin baino gehiagotan. Eta, xede horrekin, bi herrialdeetako ordezkaritzak bildu dira gaur Istanbulen (Turkia)r. Bilerak sei ordu inguru iraun du, eta, Errusiako presidente Vladimir Putinek herrialdeko zerbitzu sekretuei jakinarazi dienez, «bide onetik» joan dira. Are gehiago, TASS Errusiako berri agentziak kaleratu duenez, Putinek azpimarratu du bi herrialdeen arteko harremanak «bideratzeko» nahia dutela. Ukrainako gerra hasi zenetik, 2022ko otsailean, bigarren aldiz bildu dira Washingtonen eta Moskuren ordezkaritzak. Iragan astean bildu ziren aurrenekoz, Riaden (Saudi Arabia). Bi aldeek azaldu dutenaren arabera, bilera horien helburua da «normaltasuna» berreskuratzea Errusiak AEBetan eta AEBek Errusian dituzten enbaxadetan. Izan ere, azken urteetan enbaxadako hainbat langile kanporatu dituzte herrialde horietatik. Putinek, bestetik, adierazi du AEBen eta Errusiaren arteko bilerek hautsak harrotu dituztela Mendebaldean: «Mendebaldeko elite batzuek erabaki dute munduak ezegonkor segitzea. Hasitako elkarrizketa porrokatzen edo kolokan jartzen saiatuko dira».

Euskal Herriko Etxebizitza Sindikatu Sozialistak deituta, 50 bat lagun sartu dira La Caixak Bilboko Plaza Biribilean duen egoitza nagusian, eta han protesta egin dute, «bankuak alokairu eskuragarriekin egiten duen espekulazioa salatzeko». Sindikatuaren arabera, bankuak higiezin ugari erosi zituen oso prezio merkean 2008ko krisia baliatuz, eta, orain, etxebizitza horiekin «espekulatzen» ari da: alokairu eskuragarri gisa aurkezten ditu, baina, gero, «abusuzko klausulak» sartzen ditu kontratuetan; hala, «maizterren eskubideak urratu eta errentagarritasuna handitzen» du. Sindikatuak esan duenez, behin baino gehiagotan saiatu dira bankuarekin harremanetan jartzen, La Caixak kudeatzen dituen zenbait etxebizitza blokeren egoera negoziatzeko, baina bankuak ez die erantzun eskaera horiei. Gaurko protestan, gutun bat helarazi diete arduradunei, eta berriro ere negoziazio mahai bat eratzeko eskatu diete. Etxebizitza Sindikatu Sozialistak salatu du Ertzaintzak identifikatu egin dituela protestan parte hartzen ari zirenak, eta isunak jartzeko mehatxua egin diela.

Koherentziaz bezainbeste ausardiaz, PKK Kurdistango Langileen Alderdiaren fundatzaile Abdullah Ocalan-ek bakearen aldeko apustua berretsi berri du. Halaxe egin du DEM alderdiaren ordezkariek gaur zabaldutako mezu batean, hura ikusten izan baitira Imrali uharteko segurtasun handiko kartzelan. Beharbada, mezuak harrituta eta nahasita utziko zituen batzuk, Ocalanek PKKri hau eskatu izanak batez ere: «Kongresua antolatzea —indarrez garaitua izan ez den edozein komunitatek egiten duen bezala, edozein alderdi modernok egiten duen bezala— eta erabaki bat hartzea». Eta Ocalanen ustez, hau da, alderdi horren fundatzailearen ustez, «armak uztea eta alderdia desegitea» erabaki behar da. Dena dela, Ocalanek joan deneko 30 urtean (hau da, atxilotua eta 1999an Imralin kartzelatua izan baino lehenago ere) zer adierazi duen irakurri eta entzun duena berehalaxe konturatuko da buruzagi kurduak orain egin duen proposamena bat datorrela hark buruan izan duen koexistentzia eta gobernantza eredu berriaren bilakaerarekin eta osaerarekin, eta konturatuko da, halaber, egokiera izan dutenean —askotan tarte laburrak izan dira, odola isuriz zapalduak— kurduek ahaleginak egin dituztela eredu berri hori aurrera ateratzeko, dozenaka izenez osatutako alderdi horren bitartez —behin eta berriz utzi baitute legez kanpo—. Horretan ahalegindu dira, esaterako, Turkiaren mendeko Kurdistango Autonomia Demokratikoan 2011z geroztik, eta, irmoago, Rojavan 2013az geroztik. Beraz, ez da harritzekoa Ocalanek hauxe idatzi izana gaurko mezuan: «Devlet Bahceli jaunak [AKPrekin batera gobernuan den alderdi MHPko burua] egindako deiaren eraginez, eta presidente jaunak [Erdogan] eta gainerako alderdiek dei horri emandako babesaren eraginez, egoera egokia da armak uzteko eska dezadan, horren erantzukizun historikoa neure eginez». Ocalanek, gainera, zera aitortu du: «Bururaino iritsi da [PPK-ren] bizialdia, haren kontrako alderdiena bezalaxe, eta, hortaz, desegin beharra dauka». Buruzagi kurduak Turkiako Gobernuaren eta Estatuaren ardurapean utzi du hurrengo pausoa, eta, jakina, ondotxo daki zein duen aurrean. Lider kurduak arretaz aztertu ditu beste mugimendu batzuk, hala nola Irlandakoa eta Euskal Herrikoa, eta halakoek erakutsia daukate zer behar duen bakea zinez eta eskuzabal lortu nahi duenak: koherentzia, ausardia eta sormena. Eta horretan ari da Ocalan. Bi orri eskasetan, Ocalanek zehaztu du PKK zergatik sortu zen «XX. mendean, gizakiaren historiako garairik bortitzenean», alegia, «guztiz ukatzen zelako kurduen errealitatea, eta haien oinarrizko eskubideak eta askatasuna murriztu, batez ere adierazpen askatasuna»; nolatan hartu zituen armak PKK-k—1984an sortu eta sei urtera—, «ezin baztertuzkoa baita gizarte demokratiko baten premia»; eta nola «aurkitu zuen oinarri soziala eta babesa, nagusiki kontuan harturik politika demokratikoaren bideak itxita zeuzkatela». Hiru lerrotan, Ocalanek argi eta irmo laburtu du zein den urte hauetan guztietan garatu duen ereduaren funtsa, eta nabarmendu du «gizarte eta jokaleku politiko demokratikoak» beharrezkoak direla eredu hori mamituko bada, «zeina nortasunen errespetuan oinarritzen baita, adierazpen librean, eta gizartearen alor bakoitzaren autoeraketa demokratikoan, beren egitura sozioekonomiko eta politikoen arabera». Ocalanek garbi dauka: «Errepublikaren bigarren mendeak senidetasuna ekarriko badu, eta senidetasuna luzaroko izango bada, beharrezkoa da demokrazia. Adostasun demokratikoa da bidea». Eta argi dauka, era berean, ez diola bere mezuak emango amaiera 40 urteko gatazka horri. Horregatik, hau errepikatu die DEMeko ordezkariei, eta halaxe kontatu du haietako batek, Sirri Surreya Onder diputatuak: «Praktikan armak uzteak eta PKK desegiteak, dudarik gabe, berekin ekarri behar du politika demokratikoaren errekonozimendua, baita alde juridikotik ere». Zalantzarik ez dago mezu hori mugarri bat izango dela. Guztientzat. PKKrentzat, mezua aztertu beharko baitu, kongresua antolatu, eta erabaki; Turkiako Gobernuarentzat eta Estatuarentzat —sakoneko estatuko indarrek ez dute bakerik nahi—; Turkia osoko biztanleentzat, bai eta Kurdistanen beste hiru parteentzat ere: Rojavarentzat, Iraken mendeko Kurdistanentzat eta Iranen mendeko Kurdistanentzat. Abdullah Ocalanek berretsi egin du: gelditu gabe segituko du bakea lortzeko lanean.

Zentral nuklearren itxiera berriro negoziatzea eskatu diote Iberdrolak eta Endesak Espainiako Gobernuari

EAEko hezkuntza publikoko irakasleen grebak % 75eko jarraipena izan du Steilas, LAB, ELA eta CCOO sindikatuen arabera. Eusko Jaurlaritzak, berriz, % 48ra apaldu du jarraipenaren zenbatekoa.

Tolosaldekoko Mankomunitateak gatazkan esku-hartzea “positibotzat” jotzen badute ere, langileek uste dute ez dagoela “berme nahikorik” zor dizkieten soldatak kobratzeko epeei buruz. udalek. Horrekin batera, enpresak azken hilabeteetan izandako kudeaketa ekonomikoa aztertuko dute.

Ez da erraza txapelketa bateko finalerdietara iristea, eta hara ailegatzeak badu meritua. Baina behin lortuta, hurrengo urratsa egitea da ametsa: finala jokatzea. Realak iaz ez zuen azken pauso hori eman Espainiako Kopan, finalerdietan Mallorcak kanporatu baitzuen, baina aurten beste aukera bat du, Real Madrilen kontra. Zaildu egin zaio, hala ere, bidea. 0-1 galdu du joaneko partida, Anoetan. Ezer ez dago erabakita, hala ere. Horren erakusle, hauxe: Kopan elkarren aurka aritu ziren azkenengo aldian txuri-urdinak nagusitu ziren, final-laurdenetan 3-4 irabazita, Bernabeun. Estadioaren kanpoaldean hasi da festa, taldeari egindako harrera beroan. Eta barruan segitu du. Anoetako harmailak leporaino bete dira, eta jokalariek nabaritu dute. Halaxe ekin diote partidari donostiarrek, harrotuta eta oldarkor. Bigarren minuturako, Barrenetxeak eman du abisua. Hortik gutxira, Kubok eta Braisek bat-bikoa egin, eta japoniarraren jaurtiketa Luninek urrundu du. Kornerrean ere gertu izan du gola Realak, baina Camavingak eragotzi du Aguerden errematea. Presio itogarria egin dio Realak aurkariari, eta madrildarrak deseroso aritu dira lehen minutuetan. Ordea, gola erraz egiten duen taldea da Real Madril, eta hori erakutsi du, beste behin. Lehen aukeran, sareetara bota du baloia. Bellinghamek pase ona eman dio Endricki, eta Remiroren aurrean ez du huts egin aurrelariak. Lanean eta arriskua sortzen segitu dute txuri-urdinek, baina Luninekin egin dute topo gehienetan. Aurrena, Braisek, eta, gero, Oiartzabalek. Aukera paregabea izan du kapitainak 27. minutuan. Baita Barrenetxeak ere, lehen zatiaren amaieran. Baina nola ez, Luninen eskuak galarazi du gola. Remirok ere izan du distira egiteko aukera; gelditu zoragarria egin dio Viniciusi. Lehen zati oso ona egin du Realak, madrildarrek baino askoz hobea, baina atsedenaldira markagailuan atzetik dela joan da Imanol Alguacilek zuzentzen duen taldea. Giroa ere gaiztotu da harmailetan. Epaileak jokalariak aldageletara joateko txistua jo aurretik, etenda egon da partida minutu batzuetan, eta irainik ez egiteko abisuak eman dituzte bai megafoniaz, bai estadioko pantailan. Aurrenekoa bukatu bezala, erasoan hasi du Realak bigarren zatia. Gertu izan du berdinketa Oiartzabalek, baina atepean handi egin da Real Madrileko atezaina. Berdinketa lortzeko adina aukera sortu dituzte txuri-urdinek, baina ate aurrean ezin asmatuta ibili dira. Madrildarrak ere beste txispa batekin atera dira zelaira bigarren zatian, eta izan dituzte bigarrena sartzeko aukerak. 51. minutuan langara bota du baloia Endrickek, eta 82. minutuan beste geldiketa ikusgarri bat egin du Remirok. Borrokan segitu dute Realeko jokalariek, baina ez da gehiago mugitu markagailua. Madrilen erabakiko da, beraz, kanporaketa. Gol baten aldea ez da hainbeste: badituzte aukerak txuri-urdinek. Reala-Real Madril Reala. Remiro; Aramburu, Zubeldia, Aguerd (Aritz, 77. min.), Aihen (Javi Lopez, 83. min.); Zubimendi, Sucic (Marin, 64. min.), Brais Mendez; Kubo, Oiartzabal (Oskarsson, 77. min.) eta Barrenetxea (Becker, 64. min.). Real Madril. Lunin; Asencio (Lucas Vazquez, 46. min.), Rudiger, Tchouameni, Fran Garcia; Camavinga (Mendy, 88. min.), Ceballos, Guler (Rodrygo, 83. min.), Bellingham; Endrick (Alaba, 72. min.) eta Vinicius (Brahim, 83. min.). Golak. 0-1: Endrickek (19. min.).

Irribarretsu agertu da Joana Halzuet (Miarritze, Lapurdi, 1997): pauso irmoz, kementsu. Arrauna utzi eta atseden hartzea erabaki zuen iaz, baina espero ez zuen eskaintza bat jaso du sasoi honetarako: bederatzi urtez Donostia Arraun Lagunak-eko patroi izan denaren, hau da, Andrea Astudilloren lekukoa hartzea. Ez du berehala eman baiezkoa, baina urratsa egitea erabaki du azkenean. Lagunak ditu asko: 2023an talde horretan aritu zen lapurtarra, arraunlari. Indarberrituta itzuli da, eta «gogotsu». Lehenengo aldiz arituko zara patroi Euskotren Ligan. Erronka bat da zuretzat? Bai. Lapurdin patroi izan nintzen bi urtez, ETE ligan, baina lehen aldia izango da baldintza hauetan. Desafio handi bat da niretzat. Urte asko dira ez naizela patroi ibili; ikara sumatu dut batzuetan, baina entrenamenduetan konfiantza hartzen ari naiz. Erronka handia da, baina polita: gogotsu nago. Eskarmentu handiko patroi bat ordezkatuko duzu, Andrea Astudillo. Gainera, denboraldi biribil baten ostean hartuko duzu haren lekukoa. Presioa sumatzen duzu? Bai, noski. Andrearen ondoren horretan aritzea ez da gutxi, Euskotren Ligako figura handi bat baita. Eta badakit jende asko egongo dela gure traineruari begira. Iaz itzelezko sasoia egin zuten. Ea aurten ere halakoa egiten dugun; lan asko bada oraindik. Astudillorekin hitz egin duzu? Eman dizu aholkurik? Bai, hitz egin dugu. Egia esan, aholku asko jasotzen dira ezker-eskuin: entrenatzailearengandik, beste batzuengandik… Gomendioak beti dira ongi etorriak, kontuan hartzen ditut, baina pentsatzen dut ikasi behar dudala trainerua nik sentitzen dudan bezala eramaten ere. Horretan ari naiz. Nolako patroia izan nahi zenuke? Zer ezaugarri izan? Galdera zaila da hori [barrez]. Nahi nuke ekipoari konfiantza transmititzen dion patroi bat izan. Ezinbestekoa iruditzen zait. Eta gaitasuna lortu nahi nuke arraunlari bakoitzari bere onena aterarazteko. Haiek nirekin anitz haserretu gabe, agian… Baina batzuetan hori behar bada, hori izango da nire rola. 2023ko denboraldian ere egon zinen Donostia Arraun Lagunak-en, eta ezagutzen dituzu taldekideetako asko. Hori lagungarria da? Oso. Horregatik ere erabaki dut baiezkoa ematea. Ez dakit hala izango zen ekipoa ezagutu ez banu. Asko lotu naiz ekipoko gehiengoari, urte bikaina pasatu genuen, eta lagunak bilakatu dira. Harreman horrek laguntzen du, noski: konfiantza ematen dit. Bandera guztiak irabazi zituen iaz taldeak. Mailari eustea da asmoa? Behin ikusita posible dela… bai, bai, noski: berriro egiten ahal bada, hobe. Baina badakigu beste ekipoak ere hor direla, gose handiz, eta badakigu ez dela erraza izango. Aurkari handiak izango ditugu parean. Jada egin duzu estreinaldia: irabazi egin duzue Orioko traineru jaitsieran. Egia esan, neguko estropadetara ez gara presio handiarekin joaten. Guretzat, entrenamenduaren parte dira. Hala ere, estropada iristen denean, urduritasun puntua beti hor da, eta irabazteko gogoz joaten gara. Neguko estropadak test ona izango dira. «Iaz itzelezko sasoia egin zuten. Ea aurten ere halakoa egiten dugun; lan asko bada oraindik» Zer moduz ari zarete entrenamenduetan? Ongi. Ni nire markak hartzen ari naiz pixkanaka. Hasieran urduriago nintzen. Orain jada martxa polita hartua dugu, esango nuke entrenamenduak oso eraginkorrak direla, eta ekipoa pozik dago, motibatuta. Oso gogotsu gaude, eta gozatzen dugu uretan. Eta aurkarien inguruan ze iritzi duzu? Gogotsu daude haiek ere, gose handiz. Pasaian entrenatzen garenez, ikusten ditugu ekipo batzuk uretan: Donostiarra, Tolosaldea, Hibaika… Uste dut aurten ere maila handia izango dela, eta borroka estua. Aldaketa asko egon dira ekipo askotan, eta horrek saltsa puntu bat ematen du, beste maila bat erakutsiko dutelako agian. Guk gureari eutsi beharko diogu, edo hobetu. Iaz etena egin zenuen. Zergatik utzi zenuen arrauna? Nekatua nintzelako. Zazpi urtez egon naiz sasoiak egiten bata bestearen atzetik, eta nekatzen du. Eta konpromiso aldetik, engaiamendu handia da: fisikoki eta buruz denbora asko hartzen du kirol honek. Bidaiatzeko gogoa ere banuen, eta lanarekin uztartzekoa ere… Erritmoa lasaitzeko beharra nuen, aire pixka bat hartzekoa. Itzultzeko asmoarekin utzi zenuen? Ez, ez zen nire planetan. Kostatu zitzaidan asko uzteko erabaki hori hartzea, baina, behin hartuta, azken urte honek on egin dit. Ez nuen asmorik itzultzeko. Kostatu zait erantzun bat ematea: ongi pentsatu nahi nuen, bai baitakit zer ekartzen duen horrek gibeletik: zer konpromiso eta zer engaiamendu. Baina orain jada badakit erabaki ona hartu dudala. Eskaintza jasotzean, beraz, zalantzak izan zenituen? Bai, ez nuen batere espero, eta patroi postura itzultzea ez nuen inoiz planteatu. Niretzat, Lapurdin nintzeneko kontua zen hori, eta gero arraunlari ibili naiz. Baina buruari buelta asmo eman ondoren, pentsatu nuen horrela biribildu nezakeela nire patroi ibilbidea. Beste desafio bat bizitzeko aukera da niretzat. «Aldaketa asko egon dira ekipo askotan, eta horrek saltsa puntu bat ematen du, beste maila bat erakutsiko baitute agian. Guk gureari eutsi beharko diogu, edo hobetu» Taldeko patroi bakarra zara oraingoz. Hori abantaila ala desabantaila da? Oraingoz bakarrik naiz. Pentsatzen dut beste bat aurkitu beharko dela liga jokatzeko, badaezpada. Eta abantaila… ez dakit. Patroi batzuek badute binaka egoteko beharra presioa sumatzeko eta konfort eremutik ateratzeko. Nik jada badut presio nahikoa, ez dut ondoan beste patroi bat izan beharrik presio hori sumatzeko eta nire onena atera ahal izateko. Orduan, ongi zait. Inportantea da patroiaren figura? Desberdin bizitzen da arrauna? Bai, oso desberdina da. Biak ezagutu ditudanez, badakit patroi figura ze garrantzitsua den arraunlari batentzat. Badakit patroiak zer garrantzi duen traineruan edo estropadan zarenean, edo entrenamenduan, dena ematen ari zarenean, eta nekea eta beste guztia pilatzen denean. Ardura handiko figura bat da traineruan, eta ohartzen naiz horretaz. Presioa horregatik da hor. Nire konfort eremutik atera naiz. Hasieran estres handiagoz bizi nuen; orain jada markak hartu ditut, eta lantzen segituko dut. Konfiantza hartzen ari naiz. Geroz eta erosoago ari zara, beraz? Bai, bai.