Gizon bat hil da gaur goizean Legazpin, Gipuzkoan, Gorostiaga mendira bidean izandako istripu batean; Mataburros izenez ezagutzen den aldapa batean izan da ezbeharra. Larrialdi zerbitzuak hara iritsi direnerako, ezin izan dute ezer egin. Jokin Uribetxeberria mendi korrikalaria da hildakoa. Tolosako (Gipuzkoa) Alpino Uzturre taldeko korrikalaria zen Uribetxeberria, duela lau urtetik.

Guztira 32.000 euroko isuna ezarri diete Donostiako udaletxean Guardetxearen alde protesta egin zuten dozenaka gazteri, AZGA Alde Zaharreko Gazte Asanbladak jakinarazi duenez. Hain zuzen, iazko maiatzaren hondarrean udaleko osoko bilkurara sartu ziren hainbat gazte, etxegabetze arriskuan zeudela salatzera eta horren kontra protesta egitera. Ondorioz, AZGAko kide bat atxilotu eta bertze bortzen kontrako prozedura judiziala abiatu zuten, eta seiak deklaratzera deitu zituzten. Desordena publikoak, autoritatearen kontrako atentatua eta lesioak egitea egozten diete, eta fiskalaren zigor eskaeren zain daude; espetxe zigorrak eskatzea espero dute. Prozedura judizial hori aski ez, eta orain isunak iritsi zaizkiela salatu dute gaur AZGAko kideek: osoko bilkurara joan zen kide bakoitzari 800 euroko isuna iritsi zaio, guztira 32.000 euro batuz. «Isun hauekin, Guardetxea eta bestelako gaztetxe eta gune autogestionatuen aldeko babesa kriminalizatu nahi dute Poliziaren beste azpijoko baten bitartez, zeina, beste behin ere, gezurretan eta akusazio faltsuetan oinarritzen den», adierazi dute gaurko agerraldian. Hala, errepresioaren aitzinean antolatzea erabaki dute, eta mobilizaziora deitu: hilaren 15ean manifestazioa eginen dute Donostian, 13:00etan, Trinitate plazatik abiatuta. Salatu dute oraingoan okupazioa ez ezik elkartasuna ere zigortu nahi dutela, «AZGAren jardun politikoa oztopatu eta geldiarazteko». Ordea, adierazi dute osoko bilkurara joan zirenean «adierazpen askatasuna gauzatzea» zela beren helburua: «Hiriko alkateari bilera eskaera formala egitea, bilkura oztopatzeko inolako asmorik gabe». AZGAren arabera, ondorioa hauxe izan da: «Bilera eskatzeko aukerarik gabe, indarkeriaren bitartez osoko bilkuratik kanporatu, eta, gainera, zigor ekonomiko eta prozesu penalak gure kontra». Absoluzioa Ez da Guardetxearen kontra zabaldutako prozedura bakarra. Izan ere, urtarrilaren 27an epaiketa bat izan zuten Donostian, gaztetxea okupatzeagatik; absolbitu egin zituzten, fiskalak berak hala eskatuta. Guardetxea gune autogestionatua izan zen hamar urtez, harik eta 2019an Donostiako Udalak eraikina itxi zuen arte. Hutsik dago geroztik, eta gaztetxeak bilerak egiteko hainbat eskaera egin ditu, baita okupazio sinbolikoak ere, «udalarekin biltzeko eta adjudikazio baldintzak negoziatzeko asmoz». Erantzunik jasotzen ez zutenez, Maiatzaren Lehenean eraikina berreskuratu zuten, kideek ordu hartan kontatu zutenez.

Irailean, Eusko Jaurlaritzaren Industria, Trantsizio Energetiko eta Jasangarritasun Saileko teknikariek Zaldibarko zabortegia aztertu zuten, 2020ko otsailean amildu ostean nolako egoeran zegoen jakiteko. Duela gutxi jakinarazi dituzte txosten horren emaitzak: mantentze lanak falta ditu, eta, ondorioz, hainbat arazo eta irregulartasun agertu dira, batez ere azpiegituraren egonkortasunari eta iragazgaiztasunari dagokienez. Orain, Zaldibar Argitu plataformak kezka agertu du irregulartasun horiek direla eta; haren iritziz, «ulertezina» da hutsegite horiek orain arte konpondu ez izana. Irailean egin zuten behaketa, baina emaitzak orain ezagutarazi dituzte; Zaldibar Argituren ustez, «onartezina» da «29 hutsegite jasotzen dituen txosten teknikoa bost hilabetez ezkutuan» gorde izana: «Jaurlaritzak herritarrak informatu beharko lituzke, are gehiago inguruko bizilagunen osasuna eta segurtasuna arriskuan badaude». Plataformak ez du ulertzen zergatik ez dituzten atzemandako arazoak konpondu, eta bereziki larria begitantzen zaio lixibiatuak «inongo kontrolik gabe» lurrera eta errekara isurtzeko arriskua, oinarrizko azpiegituretan mantentze lanak ez egitea eta sortzen diren gasak tratatzeko sistemarik ez edukitzea: «Ez dezagun ahaztu ingurumenaren eta herritarren osasuna eta ziurtasuna daudela jokoan». Arduraz jokatzeko eskea Plataformak «arduraz jokatzeko» eskatu dio Jaurlaritzari, eta «beharrezkoak diren neurri guztiak» har ditzala hutsegite horiek zuzentzeko. Halaber, herritarrei dei egin die martxoaren 15ean egingo duten elkarretaratzean parte har dezaten, 13:00etan Zaldibarko udaletxeko plazan. Zaldibarren ez ezik, Ermuan ere kezka sortu dute txosten teknikoaren emaitzek. Aste honetan bertan, Ermuko Udalak gutuna igorri dio Industria, Trantsizio Energetiko eta Jasangarritasun sailburu Mikel Jauregiri, eta azalpenak eskatu dizkio zabortegiaren mantentze faltaren inguruan.

«Gazte olatua». Horixe sortu nahi du Gazte Euskaltzaleen Sareak 24. Korrikaren bueltan. Horretarako, badituzte proposamenak: gazteak Korrika batzordeetan parte hartzera deitu dituzte, propio 24. Korrikarako sortu duten zapia soinean dutela lasterka egiteko eskatu diete, eta Korrikaren amaierarako, hilaren 29rako, egitaraua ondu dute Bilbon: 10:30ean, Casillan, gazte euskaltzaleen «olatua» osatu asmo dute. Gaur aurkeztu dituzte ekimenak, agerraldi jendetsu batean, Gernikan (Bizkaia), gazteak «erdigunean» jartzeko eta Korrikan «aktiboki parte hartzeko». Joanes Aranguren Arrieta da sareko kideetako bat. Korrika iristerako, zera proposatu dute: gazteek Korrika antolatzen lagundu eta Korrika batzordeetan parte har dezatela. «Ederra litzateke Korrika batzordeak gaztez beteta ikustea, eta batzuetan lortzen ari gara; gazteak ari dira euskararen bueltan antolatzen». Auzo eta herrietako batzordeetarako gida bat ondu dute. «Euskararen aldeko egitasmoak pizteko tresnak agertzen dira gidan, batzordeek duten potentzialtasun hori zukutzeko asmotan». Gida horren bidez euskararen egoeraren inguruan «kontzientziak piztu» nahi dituzte, eta, horretarako, besteak beste, proposatu dute Korrikaren «gazte simulakroak» egitea: «Gazte euskaltzaleen parte hartze politikoa bultzatu nahi dugu». «Helburua ez da Korrika bera indartzea soilik, baizik eta hori pizgarri izan dadila gazte euskaltzaleek aurrerantzean ere lanean jarraitzeko» JOANES ARANBURU Gazte Euskaltzaleen Sareko kidea Behin Korrika iritsita ere, badute proposamenik. Bat: gazteen zapia soinean dutela korrika egitea: «Zapiak izanen dira gure elementu bereizgarria». Halaber, gazte euskaltzaleek «lehen lerroak» hartzea beharrezkoa dela nabarmendu du Arangurenek, eta bestelako aldarriak ozentzeko garaia ere badela: «Korrikan, gazte euskaltzaleek tokian tokiko aldarriak atera ditzatela nahi dugu, hala nola ofizialtasunari buruzkoak eta zonifikazioaren kontrakoak. Eta, orokorrean, adieraztea gazteok hau guztia egiten dugula nahi dugulako eta konpromisoa daukagulako gure herria euskalduntzeko». Bilboko egitaraua 24. Korrika hilaren 19an Atharratzen (Zuberoa) hasi eta hilaren 29an helduko da Bilbora. Aranguren: «Indar erakustaldi bat egin nahi dugu. Gazte euskaltzaleak batu nahi ditugu mobilizazio erraldoi batean, Korrikan bertan». Zehaztu dutenez, 10:30ean, Casillan, «gazte euskaltzaleen olatua» sortuko dute: gazteak elkarrekin sartuko dira Korrikara, denek zapia lepoan dutela. Ondoren, 13:30ean, Hots Kolektiboa elektrotxarangak joko du. Eguna «festarako, saretzeko eta borrokatzeko» izatea dute xede. Halere, Gazte Euskaltzaleen Sarearen jarduna harago doa. Korrikaren biharamunean ere pentsatzen jarriak dira, eta espero dute 24. Korrika pizgarria izango dela gazteek euskararen alde borrokan jarraitzeko: «Aukera handia ikusi dugu gazte euskaltzaleen aktibaziorako. Helburua ez baita Korrika bera indartzea soilik, baizik eta hori pizgarria izan dadila gazte euskaltzaleek aurrerantzean ere lanean jarraitzeko».

Hilaren amaieran Segurtasun Nazionalerako idazkari berria izango dute AEBetan. Donald Trump presidenteak gaur jakinarazi du kargutik kenduko duela Kristi Noem, eta haren lekua Markwayne Mullin senatariak hartuko duela. Truth Social bere sare sozialean eman du berria; Noemek lan «bikaina» egin duela azaldu du, baina martxoaren 31tik aurrera Mullinek hartuko duela haren kargua. Hain justu, Segurtasun Nazionalerako Departamentua ataka larrian dagoen honetan iritsi da Trumpen erabakia: Senatuko demokratek blokeatuta dauzkate departamentu horretako aurrekontuak, migranteen aurka egindako operazioak direla eta. Aurrerantzean Noem Ameriketako Ezkutuaz arduratzeko mandatari berezia izango dela jakinarazi du Trumpek. Eta gehitu du larunbatean emango duela informazio gehiago «Mendebaldeko Hemisferioko segurtasuna bermatzeko» ekinaldi horren inguruan. Orain arte egindako lanagatik eskerrak eman dizkio, eta, «batez ere mugan» emaitza «ikusgarriak» lortu dituela nabarmendu du. Mullinek hartuko du Segurtasun Nazionalerako Departamentuaren gidaritza. 2013tik 2023ra Ordezkarien Ganberako kidea izan zen, eta ordutik Senatuan aritu da. Oklahomakoa da, eta, Trumpek nabarmendu duen moduan, politikaria izan baino lehen borrokalari profesionala izan zen. Trumpek ez du argitu zergatik kendu duen kargutik Noem, baina kontuan hartu behar da ICE Immigrazioko eta Aduanetako Polizia Indarren operazioek polemika sortu dutela azken hilabeteetan AEBetan. Besteak beste, ICEko agenteek bi pertsona hil zituzten urtarrilean Minneapolisen. Noemek hilketa horiek justifikatu zituen. Gainera, migranteen aurkako sarekada masiboak eta Poliziaren indarkeria salatzeko, Senatuko demokratek blokeatuta daukate Segurtasun Nazionalerako Departamentuaren aurrekontua.

Donald Trumpentzat ez da aski Iranen erregimen aldaketa behartzea, buruzagi berriaren aukeraketan ere parte hartu nahi du. «Denbora galtzen ari dira. Parte hartu behar dut izendapenean, Venezuelan Delcyrekin [Rodriguez] egin bezala», esan du Axios hedabideari eskainitako elkarrizketa batean. AEBetako presidenteak ohartarazi ere egin dio Teherani hurrengo aiatola ezin zitekeela izan Ali Khameneiren semea, ez eta ere joan den larunbatean hildako buruzagiaren politikak jarraituko dituen inor, hala balitz, AEBek beste gerra bat hasiko lukeelako «bost urtean». Bestalde, Iranek ukatu egin du Turkiara misil bat jaurti izana, eta herrialde haren subiranotasuna errespetatzen duela esanez erantzun die akusazioei. Izan ere, Turkiak salatu zuen atzo Iranen misil bat eraitsi zutela NATO Ipar Atlantikoko Itunaren Erakundeko aireko defentsa sistemek, eta ohartarazi «edozein ekintzari erantzuteko eskubidea» dutela. Iranek Turkiara misil bat jaurti izanak are gehiago nahasi zezakeen nazioarteko egoera geopolitikoa. Izan ere, Turkia NATOko kidea da, eta, erakunde horren bosgarren artikuluaren arabera, aliatu baten aurkako erasoa «aliatu guztien aurkakoa» da, eta horrek «defentsarako eskubide zilegia» aitortzen dio NATOri. Bada, Mark Ruttek gaur adierazi duenez, gertaera «larria» da, baina baztertu egin du bosgarren artikulua aplikatzea. «Gaur-gaurkoz, inork ez dauka bosgarren artikulua mahai gainean». Ruttek gaineratu du NATO ez dagoela zuzenean AEB Ameriketako Estatu Batuen, Israelen eta Iranen arteko gerran sartuta, baina AEBei «funtsezko laguntza» ematen ari dela. «Badakigu Iran misilak sortzeko gaitasun nuklearra eskuratzear zegoela. Trump babesten dugu Iranen ahalmen arriskutsu hori ezabatzeko gaitasuna duelako». Baina nazioartea Turkiara begira zen bitartean, Kaukasora zabaldu da gerra. Hainbat dronek Iranekin mugan dagoen Azerbaijango aireportua jo dute gaur goizean. Azerbaijango Defentsa Ministerioak Irani egotzi dio erasoaren erantzule izatea: «Irango Islamiar Errepublikak dauka gertatu den horren erantzukizun guztia», zabaldu dute ohar batean. Iranek, ordea, ukatu egin du ekintza horrekin zerikusia duela. «Herrialde guztien subiranotasuna errespetatzen dugu, batez ere herrialde musulmanena eta auzokoena», adierazi du Irango armadak. Baina argudio hori ez da aski izan Azerbaijanentzat, eta neurriak hartzeko eskatu du hango presidente Ilham Aliyevek: «Iranek azalpen ofizial bat zor dio Azerbaijani; barkamena eskatu behar du, eta bermatu erasotzaileek zigorra jasoko dutela. Erantzuleak lehenbailehen eraman behar dira justiziaren aurrera». Jakinarazi du bilera bat eskatu diola Irango enbaxadoreari horri buruz jarduteko. Astelehenean antzeko gertakari bat izan zen Zipren. Erresuma Batuak Mediterraneoko uharte horretan duen base militar bat jo zuen drone batek. Horren harira, Europako hainbat herrialdek gerraontziak bidali dituzte Ziprera. Gaur Londresek ziurtatu du drone hori ez zutela Irandik jaurti. Defentsa Ministerioak kaleratutako ohar batean adierazi dute hori. Kurduei eraso Irango indarrek eraso egin diete Iraken menpeko Kurdistango hainbat kuarteli. Argudiatu dute AEBek milizia kurduak armatzeko asmoa zutela, Iranen infiltra zitezen. Hori dela eta, Irango Segurtasun Nazionaleko Kontseilu Goreneko buru Ali Lariyanik ohartarazpen bat egin die kurduei eta oposizioko kideei: «Ez dugu tolerantziarik izango. Talde separatistek ez lukete aukera gisa hartu behar egungo egoera». Horren harira, Iraken menpeko Kurdistango administrazioak ukatu egin du erasoetan parte hartuko duela. «Ez dugu parte hartuko gure herritarren biziari eta segurtasunari kalte egiten dien gatazka batean edo ekintza militarren areagotze batean», esan dio Netxirvan Barzani eskualdeko presidenteak Reuters berri agentziari. Gainera, Karoline Leavitt Etxe Zuriko bozeramaileak atzo adierazi zuen «guztiz faltsua» dela AEBek talde kurduak armatzeko asmoa daukatela. Bestalde, Irango Atzerri ministro Abbas Araghtxik X sare sozialean idatzi du AEBek «ankerkeriaz» jardun zutela atzo, Iranen gerraontzi bat hondoratu baitzuten Indiako ozeanoan, eta gutxienez 87 soldadu hil —guztira 130 soldadu zeuden ontzian erasoa gertatu zenean—. «AEBek aurrekari bat ezarri dute, eta gogotik damutuko dira». Irango Guardia Iraultzaileak, berriz, gaur adierazi du Ormuzko itsasartea —munduko petrolio guztiaren %20 igarotzen da handik— errepublika islamiarraren esku dagoela «nazioarteko legeen arabera», eta ohartarazi du eskubidea daukala ezarrita dauden protokoloak betetzen ez dituzten ontziei eraso egiteko. Bada, Donald Trump AEBetako presidenteak iragarri du «eskoltatu» egingo dituztela itsasartean diren ontziak. Hori baino lehenago, Guardia Iraultzaileak adierazi du AEBetako petroliontzi bati eraso egin diola Persiar golkoan, eta ontziak su hartu duela. 1.332 AEBek eta Israelek egindako zenbat eraso erregistratu dituzten Iranen bonbardaketak hasi zirenetik. Irango Gurutze Gorriak adierazi du AEBetako eta Israelgo armaden 1.332 eraso erregistratu dituztela Iranen, larunbatean bonbardaketa abiatu zutenetik. Horrez gain, Tasnam albiste agentziak jakinarazi du jada 1.230 direla eraso horietan hildakoak. Horrez gain, Iranek erasoak egin ditu gaur goizean Israelen, bertako armadak adierazi duenez. Bitartean, Tel Avivek jarraitu egin du Teheranen eta Beiruten eraso egiten. Beirut hegoaldeko zenbait auzo bonbardatu ditu gaur goizean. Hezbollah talde xiitaren gotorlekuetako bat da eremu hori. Tel Avivek auzune horiek husteko agindu du. Aurrez, Israelgo armadaren bozeramaile Effie Defrinek prentsaurreko bat eman du, eta Libano hegoaldeari eraso egiten jarraitzeko asmoa daukatela baieztatu. Horregatik, «berehala ihes egiteko» esan die Israelgo armadak bertako herritarrei. Libanoko Osasun Ministerioaren arabera, astelehenetik gutxienez 102 lagun hil dituzte herrialde horretan egindako erasoetan. Gaur Tripolin (Libano) Hamaseko buruzagi bat hil duela ziurtatu du Israelek. Bestalde, X sare sozialaren bidez, Irango Atzerri Ministerioko bozeramaile Esmaeil Baqaeik AEBei eta Israeli leporatu die eremu zibilen aurka «nahita» egitea. «Gure herritarrak modu basatian hiltzen ari dira; zibilei nahita erasotzen diete, ahalik eta sufrimendu handiena eta ahalik eta hilketa gehien eragiteko». Iranen gutxienez 1.230 pertsona hil dira jada AEBen eta Israelen erasoen ondorioz.

Atzerako kontua: hamabortz egun bertzerik ez. 2.180 kilometro egiteko prest da Korrikako furgoneta, eta halatsu daude haren barnean —eta kanpoan— joanen direnak ere. Behin azken eginbeharretan sartuta, fase berri bat abiatu du AEK-k gaur: aktibazioarena. Hargatik elkartu dira Iruñean, 24. Korrikaren aurkezpen sozialean. Ez dute zalantzarako tokirik utzi furgonetan: «Euskararen erabilera unibertsala zor zaio euskaldunon komunitateari», erran du Xabi Gartzia AEKren Nazio Kontseiluko kideak. Eta helburu hori lortzeko «ezinbestekoa» da Korrika, Euskal Herri osoan eta herritar guztiek «euskaraz eroso bitzeko eskubidea» aldarrikatzen duelako, bertzeak bertze. Baina hizkuntza politika eta erremintak aldatu behar dira horretarako: «Ausartak, sendoak, doakoak, eta eskuragarriak izan behar dute, hezkuntza transmisioa eta helduen euskalduntzea bermatuko dutenak». AEK-ko kideak aurkezpen sozialean. A ARROITA / AEK Antolatzaileek ez dute ausaz aukeratu aurtengo leloa: Euskara gara. Izan ere, komunitatearen «izaera irekia eta askotarikoa» azpimarratzea izan dute xede, eta, batez ere, «euskararen herrian denontzako tokia» dagoela erakustea. Halaxe erran du Ane Elordi Korrikaren koordinatzaileak: «Euskara ez da muga, arnasa baizik. Zubi gisa landu behar da, kohesio sozialerako tresna moduan». Bi gauza baita Korrika: jaia eta aldarria. Eta ez baita folklorea, «baizik eta euskara». Elordik Korrikan parte hartzera gonbidatu ditu herritarrak, eta korrikaren mezua «urte osoan» zabaldu dezatela eskatu die. «Euskararen etorkizuna jokoan dago, eta guztion esku dago eragitea; denoi dagokigu euskaltzaletasuna lehen lerrora ekartzea».

Ziurra zen euskal talde bat ariko dela Espainiako Kopako finalean, baina argitzeke zegoen zein: Reala edo Athletic. Bada, argitu da: Realak 1-0 irabazi du Anoetan, Oiartzabalek penaltiz sartutako gol bati esker, eta merezita sailkatu da finalerako. Apirilaren 18an, beraz, elastiko txuri-urdinez beteko dira Sevillako kaleak. Txuri-urdinek Atletico Madril izango dute aurkari finalean. Gau magikoa izan da gaurkoa Realarentzat. Tristea, berriz, Athleticentzat. Batak zein besteak ez dute berehalakoan ahaztuko Anoetan jokatu duten derbia. Txuri-urdinak 0-1 nagusitu ziren finalerdietako joaneko partidan, eta gertuago zuten helburua. Hala ere, gol baten aldea gutxienekoa da, eta ezer ez zegoen erabakita. Hori jakinda, itxaropentsu zeuden Athleticeko jarraitzaileak ere. Realeko kapitainak ametsa zapuztu dien arte. Athletic hobeto zelairatu da, grinatsuago. Erasora jo du, eta estu hartu ditu atzelariak. Lehenengo minutuan, Berenguerrek buruz bakarrik errematatu du baloia area barruan, baina ez dio ondo jo. Realari kosta egin zaio nahi zuen jokoa egitea. Azkar galtzen zuen baloia, eta Athletic erraz iristen zen aurkariaren area ingurura. Gidoi horrek ez du luzaroan iraun, baina. Kontrakoa, minutu gutxi batzuetako kontua izan da. Pixkanaka, partidari neurria hartu diote txuri-urdinek, eta gora egin dute Matarazzok zuzendutakoek. Lerro artean Atheticek utzitako hutsuneak ondo aprobetxatu ditu Realak, eta jokoan nagusitu da. Hamaikagarren minutuan, Jauregizarrek falta arriskutsua egin dio Barrenetxeari, eta garesti ordaintzetik gertu egon da taldea. Solerrek bota du, eta Padillak salbatu du Athletic. Zelaian erosoago sumatzen zen Reala, eta txuri-urdinak ari ziren baloia izaten. 37. minutuan, aukera garbi-garbia izan dute. Jokaldi ona ondu du Realak: Oiartzabalek pase sakon ederra eman dio Guedesi, hark Carlos Solerri pasatu dio baloia, baina erdilariak ez du asmatu errematea egiten. Athletic ere, tantaka, gerturatu da Marrerok zaindutako ate ingurura, batez ere lehen zatiko azken minutuetan. Hala ere, finalean egon nahi bazuen, Bilboko taldeak zerbait gehiago egin beharra zuen bigarren zatian. Anoetak, eztanda Biziago zelairatu dira bizkaitarrak aldageletatik bueltan. Aldaketa bat egin du Ernesto Valverdek 56. minutuan: Ruiz de Galarreta sartu du Regoren ordez. Eta gutxira, aldaketa bikoitza egin du Pellegrino Matarazzok: Marin eta Herrera zelairatu ditu Barrenetxearen eta Turrientesen ordez. Hausten hasi da partida, eta tentsioa areagotu da. Hala ere, Realak nahiko ondo kudeatu du egoera. Sufritu behar zenean, sufritzen jakin du. Dena den, edozer gerta zitekeen. 73. minutuan eman du abisua Berenguerrek, baina jaurtiketa kanpora bota du. Aldaketek on egin diote Athletici, eta urratsa egin du aurrera. Reala, baina, ez da erabat atzean sartu. Eta 85. minutuan, oparitxoa jaso du: epaileak, VAR sistema erabilita, Herrerari egindako penaltia adierazi du. Izan ere, Ruiz de Galarretak kamisetatik tira egin dio erdilariari. Oiartzabalek bota du, sarera. Hortxe erabaki da kanporaketa. Athleticek ez du etsi, eta itsu-itsuan erasora jo du. Izan ditu aukerak, baita Realak ere, baina ez da gehiago mugitu markagailua. Giroa bero zegoen partida hasterako. Bada, Anoetak eztanda egin du epaileak amaierako txistua jo duenean. Realak finala jokatuko du, oraingo honetan, zaleen babesean. Reala-Athletic Reala. Marrero; Aramburu, Zubeldia, Jon Martin, Sergio Gomez; Gorrotxategi, Turrientes (Herrera, 59. min); Soler (Oskarsson, 83. min.), Guedes (Aihen, 93. min.), Barrenetxea (Marin, 59. min); eta Oiartzabal (Sucic, 94. min.). Athletic. Padilla; Vivian, Paredes (Areso, 68. min.), Laporte, Yuri; Rego (Ruiz de Galarreta, 56. minutuan), Jauregizar (Vesga, 82. min.); Iñaki Williams, Sancet (Navarro, 68. min.), Berenguer; eta Guruzeta (Serrano, 82. min.). Golak. 1-0: Oiartzabalek, penaltiz (87. min.).

Derbi berezia jokatuko dute gaur Realak eta Athleticek, Espainiako Kopako finalerako sailkatzea izango baitute jokoan. Ilusioa piztu da zaleen artean, eta sumatzen da giroan. Donostiako kaleak elastiko txuri-urdinez eta zuri-gorriz ari dira betetzen. [galleries:horizontal:128] Anoeta bete egingo da gaur, baina aurrez ere festa giroa da nagusi. Zaleak hasiak dira giroa berotzen. Realak egitarau oparoa osatu du. Gune bat prestatu du estadioko hamahirugarren atearen ondoko zabalgunean, eta zuzeneko musika eta jateko eta edateko aukera dago bertan. 17:00etatik 23:00etara egongo da zabalik, eta 23:00etan irekiko dute berriro. Horrez gain, Realeko zaleek harrera egin diote taldearen autobusari, 19:00etan, Anoeta hotelean. Baita Athleticekoek ere. Arima hotelean elkartu dira zale zuri-gorriak, 18:30ean. 🔥 Hitzorduak merezi du. Saria nabarmena da. Anoetara bidean! ✊ Zuengatik, athleticzaleak. #RealSociedadAthletic 🏆 #AthleticClub 🦁 pic.twitter.com/Pr3aTZX6SX — Athletic Club (@athletic_eus) March 4, 2026 🔛 Iristear. pic.twitter.com/4niOO5ORuz — Real Sociedad Fútbol (@RealSociedadEUS) March 4, 2026

Bizkaiko Matxitxako lurmuturraren aurrean, 36ko gerraren erdian, itsas gudu bat izan zen frankisten alde borrokan ari zen Canarias gurutzaontziaren eta Errepublikaren alde ari zen Eusko Itsas Gudarostearen artean. Bizkaya, Gipuzkoa