Ondorengo udalerrietako taxiek lan egin ahal izango dute Gipuzkoako hiriburuan: Pasaia, Errenteria, Oiartzun, Lezo, Astigarraga, Hernani, Usurbil, Andoain, Lasarte-Oria eta Urnieta. Donostian zerbitzuak dituen arazoak konpontzea da helburua.

Binakako Txapelketako lehen itzulia amaitzeko bi jardunaldi falta dira, eta bi dira oraindik punturik batzea lortu ez duten bikoteak: Peña II.a-Albisu eta Peio Etxeberria-Martija. Ustez bikote sendoak ziren biak ala biak. Baina gozakaitz ari dira txapelketan, eta gaurkoan ere ezin izan dute egoera iraultzen hasi. Peña II.a-Albisuk 22-17 galdu dute Altuna III.aren eta Arangurenen kontra; Peio Etxeberriak eta Martijak, berriz, 22-18 Lasoren eta Iztuetaren aurka. Larunbatean bietako batek lehen puntua lortu du, elkarren aurka arituko baitira. Altuna III.arentzat eta Arangurenentzat kolpea izan zen igandeak Artolaren eta Mariezkurrena II.aren kontra galtzea. Eskura zuten partida, baina 18-2ko partzial batek punturik gabe utzi zituen. Bada, gaur Tolosako Beotibarren gauzak bestelakoak izan dira. Izan ere 22-17 hartu dituzten mendean Peña II.a eta Albisu. Hala, bigarren garaipena lortu dute txapelketan, eta arnas apur bat hartu dute sailkapenean. Peña II.ak eta Albisuk, berriz, jokatu dituzten bost partidak galdu dituzte, eta egoera zailean geratu dira. 8-6 atzetik egon arren, Altuna III.a eta Aranguren bi tantoren abantailarekin iritsi dira lehen atsedenaldi luzera: 12-10. Eta partidaren bigarren zatian abantaila hori handitzen joan dira. 18-14koarekin ondo bideratua zuten neurketa, eta azkenerako lana biribildu ahal izan dute. Barañainen, Laso eta Iztueta 6-1 aurreratu diren arren, partida orekatzen joan da, eta 8nako berdinketaren ostean, Peio Etxeberria eta Martija 12-10 aurreratu dira. Lehen puntua lortzeko eguna izan zitekeela zirudien. Baina Lasok eta Iztuetak ondo erantzun dute, eta lau tanto egin dituzte erreskadan: 14-12. Inork ez zuen lortzen partidaren aginte makila lortzea, irekita zegoen. Baina Lasok eta Iztuetak bikote sendoagoa osatzen dutela erakutsi dute, azken txanpan eta azkenerako erabakigarria izan den abantaila lortu dute. Lau garaipenekin Lasok eta Iztuetak puntu batera dute lehen postua, eta Elordirekin eta Zabaletarekin berdinduta daude. Peio Etxeberriak eta Martijak, berriz, behar handia dutela jokatuko dituzte lehen itzuliko azken bi partidak. Izan ere, punturik batzen ez badute, bigarren itzuli biribila egin beharko dute txapelketan jarraitzeko. Bihar hasiko da seigarren jardunaldia. Lodosan (Nafarroa) izango da, eta bertan Ezkurdiak eta Rezustak Jakaren eta Imazen aurka neurtuko dituzte indarrak. Ezkurdiak eta Rezustak atzo jokatu zuten txapelketako partida, eta denbora gutxi izango dute atseden hartzeko. Baina hauspotuta jokatuko dute. Izan ere, orain arteko partida guztiak irabazi dituzte, eta sendo daude lehen postuan. Jaka eta Imaz, berriz, hirugarren puntua batzen ahaleginduko dira, atzetik datozenak gerturatu ez daitezen. Larunbatean beste bi neurketa jokatuko dira. Bilboko Bizkaia frontoian, Artolak eta Mariezkurrena II.ak Elordiren eta Zabalaren aurka neurtuko dituzte indarrak. Iruñeako Labriten, berriz, txapelketako azken bi sailkatuak arituko dira nor baino nor gehiago, Peña II.a eta Albisu Peio Etxeberriaren eta Martijaren kontra (18:00, ETB1). Igandean jokatuko da jardunaldiko azken norgehiagoka, Gasteizko Ogetan. Altuna III.ak eta Arangurenek Lasoren eta Iztuetaren aurka jokatuko dute.

Israelgo armadak Yemengo aireportu nagusia eta zenbait energia azpiegitura eta portu bonbardatu ditu gaur. Armadak zabaldu duen oharraren arabera, huthiek Israelen aurka egindako erasoei emandako erantzuna izan da, eta Yemengo talde xiitak erabiltzen dituen «helburu militarrak» izan dituzte jomugan. Israelek iragan ostiralean ere egin zituen erasoak Yemenen, eta Netanyahuk ziurtatu du gehiago egingo dituztela: «Zeregina amaitu arte jarraituko dugu». Huthien Al-Masirah telebista katearen arabera, hiru pertsona hil ditu Israelek gaurko erasoetan. Horietatik bi, Sana Nazioarteko Aireportuan; eta bestea, Ras Issa portuan, herrialdearen mendebaldean, Itsaso Gorriaren ertzean. Inguru horretako beste bi portutan ere egin dituzte bonbardaketak, baita bi energia azpiegituratan ere. Israelgo armadak adierazi du huthiek helburu militarretarako erabiltzen dituztela azpiegitura zibilak. Tedros Adhanom Ghebreyesus OME Osasunaren Mundu Erakundeko zuzendari nagusia Sanako aireportuan zen erasoa egin dutenean. X sare sozialean eman du berria: «Sanatik irteteko hegaldia hartzera gindoazenean, aireportua bonbardatu dute. Gure hegazkineko tripulazioko kide bat zauritu dute». Jakinarazi duenez, bera eta haren lankideak onik daude, baina aireportuko kontrol dorrea eta lurreratze eremua hondatu dituzte. Israelek eta huthiek behin baino gehiagotan egin diote elkarri eraso iazko urriaren 7az geroztik. Mugimendu xiitak misilak eta droneak erabili izan ditu Israelen aurka. Joan den larunbatean, esaterako, misil bat jaurti zuten Tel Avivera, eta hamasei pertsona zauritu zituzten. Itsaso Gorrian, Israelekin nolabaiteko harremana duten itsasontzien aurkako erasoak ere egin izan dituzte huthiek; haien arabera, Gazako palestinarrei babesa erakusteko. Israelek, berriz, zenbait eraso ere egin ditu Yemenen. Aurreko ostegunean lehen aldiz bonbardatu zuen herrialdeko hiriburua. Benjamin Netanyahu Israelgo lehen ministroak huthien aurkako erasoekin jarraitzeko asmoa azaldu du gaurko bonbardaketen ostean. Bideokomunikatu batean adierazi du «zeregina amaitu arte» segituko dutela: «Iranen adar terrorista moztuko dugu». Netanyahuren alboan, Israel Katz Israelgo Defentsa ministroak ere hitz egin du: «Israeli eraso egiten diotenei eraso egingo diegu». Eta ziurtatu du buruzagi huthi guztiak «ehizatuko» dituztela, «beste leku batzuetan egin moduan». Zazpi fronte Israelek azaldu izan du herrialdeak zazpi fronte dituela zabalik Erresistentziaren Ardatzaren aurka —Israelek «Gaizkiaren Ardatza» ere deitzen dio—. Erresistentziaren Ardatza esaten diete Irani eta hark militarki eta ekonomikoki babesten dituen miliziei. Horien artean daude Yemengo huthiak, Gaza eta Zisjordaniako milizia palestinarrak —Hamas, nagusiki—, Libanoko Hezbollah, Siriako zenbait milizia, Irakeko Erresistentzia Islamikoa, eta Iran bera. Ekialde Hurbileko eta munduko ezegonkortasunaren erantzule egiten ditu Israelek milizia horiek. Hori bera egotzi dio Iranek Israeli, Yemengo erasoen ostean. Nazioarteko bakearen eta segurtasunaren urraketa gisa definitu ditu gaurko erasoak Esmaeil Baqaei Irango Atzerri Ministerioko bozeramaileak, AFP berri agentziak jaso duenez. Agentzia berak jaso ditu huthien eta Hamasen adierazpenak ere. Huthien bozeramaile Mohammed Abdulsalamek Yemengo herritarrei eraso egitea egotzi dio Israeli. Hamasek ere gaitzetsi ditu gaurko erasoak, eta, zabaldu duen oharrean, salatu du Tel Avivek jomugan jartzen dituela herritarrak dauden guneak, eta Sanako aireportua jarri du adibidetzat. Israelek 20 pertsona hil ditu Gazan Israelgo armadak Gazako hainbat leku bonbardatu ditu gaur goizaldean, eta eraso horretan gutxienez 20 pertsona hil ditu, Palestinako hedabideen arabera. Hildakoen artean daude Al-Quds telebista kateko bost kazetari. Israelgo armadak ohar batean adierazi duenez, «zehatzak» eta Hamasen aurkakoak izan dira egindako erasoak. Iturri horrek berak jakinarazi du bukatutzat eman duela azken bi egunetan Zisjordanian egindako sarekada; gutxienez, bederatzi palestinar hil dituzte horretan, argudiatuta «terroristak» zirela. Bestalde, Itamar Ben Gvir Israelgo Segurtasun Nazionalerako ministroa Jerusalemgo Meskiten Zabalgunera joan da. Hori egin izana gaitzetsi du Hamasek.

Baku Azerbaijango hiriburutik Grozny Txetxeniako hiriburura zihoan hegazkin batek lurra jo zuen atzo Kazakhstanen, eta 38 bidaiari hil ziren. Istripua Errusiako aireko defentsako misil batek eragin zuela ziurtatu zuen atzo gauean Ukrainako Desinformazioaren Aurkako Zentroko buru Andri Kovalenkok. Gaur, ikerketen emaitzei itxaroteko eta espekulaziorik ez egiteko eskatu du Moskuk. Dmitri Peskov Kremlineko bozeramaileak egunero eman ohi duen prentsaurrekoan jakinarazi du abian dela istripuaren zergatiak argitzeko ikerketa. Eta emaitzak jakin bitartean ez espekulatzeko eskatu du. Kazakhstango Senatuko presidente Aximbaiev Maulen ere iritzi berekoa da. Esan du ez Errusiak, ez Kazakhstanek, ez Azerbaijanek ez dutela ezer ezkutatzeko, eta ziurtatu du herritarren eskura jarriko dutela informazio guztia. iFrameResize({ log: true },’#kazakhstanIstripua’); Azerbaijango presidente Ilham Aliyevek atzo istripua gertatu ostean zabaldutako oharrean azaldu zuen eguraldiagatik aldatu zuela ibilbidea hegazkinak. Eta istripuaren inguruan hainbat teoria egon arren, ondorioak ateratzeko goizegi zela esan zuen, baita kasua ikertzeko batzorde bat martxan jarri zutela ziurtatu ere. Ikerketaren lehen emaitzak ezagutzen dituzten iturriak aipatuz, Reuters berri agentziak gaur zabaldu du hegazkina Errusiako misil batek jo zuen zantzuak daudela. Aurrez ere, Kievek Errusia egin zuen istripuaren erantzule. Ukrainako Gobernuaren Desinformazioaren Aurkako Zentroko buruak atzo gauean esan zuen Errusiako aireko defentsako misil batek jo zuela hegazkina. X sare sozialean zabaldutako mezuan, azaldu zuen Errusiak Groznyko aire espazioa itxi behar zuela. Hori egin ez, eta hegazkina jo ostean, Kazakhstanera bidali zuela esan zuen Kovalenkok. Errusiako zenbait hedabidek iradoki dute aireko defentsa sistemek drone batekin nahastuko zutela agian Azerbaijandik iritsitako hegazkina. Bada, atzo goizean Groznyri droneekin egin ziotela eraso jakinarazi zuen Txetxeniako Segurtasun Batzordeko idazkariak, Instagramen. Hegazkinak 62 bidaiari eta tripulazioko bost kide zeramatzan; horietatik 29 bizirik atera ziren. Bakutik Grozny ingurura iritsi zen hegazkina, baina handik laurehun kilometro baino gehiago aldendu eta Aktaun (Kazakhstan) jo zuen lurra. Hilketa asmoak, zapuztuta Gaur, Errusiako zerbitzu sekretuek jakinarazi dute Ukraina Errusiako armadako zenbait goi kargudunen aurkako erasoak prestatzen ari zela. Zabaldutako oharrean azaldu dute lau pertsona atxilotu dituztela eraso horiek prestatzea egotzita. Gainera, ezkutatutako zenbait bonba atzeman dituzte. Aurreko asteartean, Ukrainak Errusiako armadako babes nuklearrerako, biologikorako eta kimikorako tropen buru Igor Kirillov hil zuen. Patinete elektriko batean ezkutatutako lehergailuak eztanda egin, eta Kirillov eta haren laguntzailea hil zituen.

Zapietan protesta egin dute Eusko Jaurlaritzaren aurrean, Bilbon, Aurrekontuetako murrizketa sozialen aurka. Berri-Otxoak, Kakitzak eta AHT Gelditu taldeek uste dute 2025eko aurrekontuek ez dutela inflazioaren, krisi ekonomikoaren eta soziosanitarioaren testuingurua aintzat hartzen.

Araudi berriak jasotzen dituen berrikuntzen artean dago etxebizitza erosteagatiko edo alokatzeagatiko kenkaria kentzea, zergadunaren errenta 85.000 eurotik gorakoa denean. Orain etxebizitzagatiko kenkaria unibertsala da, eta kenkariaren onuradun izan daitezke zergadun guztiak, errenta-mugarik gabe.

Txapelketa luzea da binakakoa, eta ez da komeni izaten ondorioak garaiz ateratzea. Baina dagoeneko bost jardunaldi igaro dira, eta bada atera daitekeen bat: Ezkurdia eta Rezusta merezita daudela sailkapeneko lehen tokian. Jokatutako bost partidak irabazi dituzte. Aurreko neurketetan baino distira gutxiagorekin bada ere, gaur 22-15 hartu dituzte mendean Artola eta Mariezkurrena II.a, Eibarko Astelena frontoian. Irabazleak oso nagusi izan dira hasieran, baina gero bazirudien Artolak eta Mariezkurrena II.ak, igandean Altuna III.aren eta Arangurenen kontra egin zuten moduan, partida iraul zezaketela. Oraingoan, ordea, ez da horrela izan. Azken txanpan, lau pilotariak nekea antzematen hasi dira, eta hor oker gutxiago egin dituzte Ezkurdiak eta Rezustak. Horri esker, irabaztea lortu dute, eta sendo jarraituko dute sailkapenaren buruan. Artolak eta Mariezkurrena II.ak argi erakutsi dute hasieratik zein izango zen beren asmoa: pilota atzean jartzea, Rezusta behartzeko. Horren jakitun, Ezkurdia askotan sartu da jokoan, pilota kendu eta bikotekidea fresko mantentzeko. Hura izan da pilotakada gehien jo duena: 162. Rezusta jokoan sartu denean, gainera, luze jo du pilota, eta ondo eutsi die aurkarien ekinaldiei. Hala, Ezkurdiak behetik ezkerrez amaitutako tanto batekin, lehen aldea ezarri dute: 5-2. Hurrengo tantoa ere haiena izan da, eta, ondorioz, Artolak eta Mariezkurrena II.ak lehen etena eskatu dute. Horren ostean, Artolak pare bat tanto on egin ditu, lehena bi-pareta bikain batekin. Artolak eta Mariezkurrena II.ak pilota aldatu dute, eurentzat aproposagoa zen bat bilatuz. Baina gutxi iraun die. Izan ere, hurrengo tantoan Alegiakoari zabalegi joan zaio pilota. 10-4koarekin, Mariezkurrena II.ak indarrez jo du pilota, eta bikotekideari eman dio buruan. Artolak aldageletara joan behar izan du, zauri txikiren bat baitzuen buruan. Partida etenda egon da minutu batzuk. Ikusi beharra zegoen bueltan horrek zerbait aldatzen zuen. Baina garaileek sendo jarraitu dute, Mariezkurrena II.a asko mugituz. Atzelariak gozakaitz jarraitu du, eta pilota asko galdu ditu: lan erdietan sei zituen galduak: 12-5. Artolak eta Mariezkurrena II.ak hortzak estutu behar zituzten, partida iraultzeko. Eta hala egin dute. Berriro ere pilota aldatu dute. Astunago bat atera dute, eta Rezusta deserosoago aritu da horrekin. Gainera, Ezkurdia presaka aritu da pilota batzuetan sartzeko orduan. Hala, hiru tantora murriztu dute aldea: 12-9. Ordu arteko unerik zailenean ziren Ezkurdia eta Rezusta. Hurrengo tantoa egitea funtsezkoa zen haientzat, eta lortu dute. Ezkurdiak egin du, zabalera egindako gantxo batekin. Baina partidaren norabideak aldatzen jarraitu du, batez ere Mariezkurrena II.a nagusitzen hasi delako. Maizago erakutsi dio bizkarra Rezustari. Bi tantora jarri dira galtzaileak: 13-11. Dena den, hor amaitu da haien erreakzioa. Izan ere, segidan bi tanto galdu dituzte, eta, gainera, Ezkurdiak tanto bikain bat egin du pilota azpitik hartu eta norabidea aldatuz. Irabazleek arnasa apur bat hartu dute, ataka zailean baitziren: 16-12. Azken txanpan partida gehiago gogortu da, eta lau pilotariak nekea antzematen hasi dira. Hor ere sendoago aritu dira Ezkurdia eta Rezusta, eta oker gutxiago egin dituzte. Mariezkurrena II.ak, haatik, pare bat pilota argi galdu ditu, eta hor amaitu da partida. Bi partida bihar Txapelketako bosgarren jardunaldia bihar amaituko da, falta diren bi partidak jokatuko baitira. Tolosako Beotibar pilotalekuan (Gipuzkoa), Altuna III.a eta Aranguren nor baino nor gehiago arituko dira Peña II.aren eta Albisuren kontra. Bi bikoteak garaipen beharrean dira. Izan ere, Peña II.ak eta Albisuk ez dute bakar bat ere lortu lehen lau jardunaldietan, eta txapelketa luzea izan arren, gaur ere galdu egiten badute egoera zailean geratuko dira. Bestalde, Altuna III.ak eta Arangurenek bakarra dute irabazia, eta igandean kolpea hartu zuten, eskura zuten partida bat galdu baitzuten Artolaren eta Mariezkurrena II.aren kontra. Beste partida Barañainen (Nafarroa) jokatuko dute. Lasok eta Iztuetak Peio Etxeberriaren eta Martijaren kontra neurtuko dituzte indarrak. Lehenbizikoek Ezkurdia eta Rezusta estutu nahi dituzte lehen posturako borrokan; Peio Etxeberria eta Martija, berriz, txapelketako lehen puntua lortzen ahaleginduko dira.

Ipar Euskal Herriko hainbat tren geldirik daude Eguberri egun honetan, SNCF enpresako tren gidariek eta kontrolatzaileek abiatu duten greba mugimendua dela eta. Merkantzien tren zerbitzuaren eta aldirietako trenen konkurrentziaren inguruan dute kexua langileek. Aldirietako tren zerbitzuan izan du eraginik handiena. Baiona-Hendaia eta Baiona-Donibane Garazi lineak bertan behera utzi dituzte. Abenduaren 11n egin zuten beste greba deialdi bat, eta negoziatzen aritu dira ordutik, baina ez da fruiturik izan. Horren ondorioa da gaurko deialdia.

Moskuk «eraso masibo bat» egin du gaur Ukrainako azpiegitura energetikoen aurka. Hala baieztatu du Errusiako Defentsa Ministerioak, ohar baten bidez. Haren arabera, Ukrainako industria militarra hornitzen duten azpiegiturak izan dituzte jomugan. «Erasoaren helburua bete dugu. Azpiegitura guztiak jo ditugu», gehitu du ministerioak, oharrean. Ukrainako aireko armadak jakinarazi duenez, Moskuk 78 misil eta 106 drone erabili ditu gaurko erasoetan. Horietatik zenbait atzeman eta eraitsi dituztela ere gaineratu du, baina beste zenbaitek kalteak eragin dituzte. Ukrainako Energia ministro German Galustxenkok Facebooken jakinarazi du erasoaren ondorioz murrizketak izan direla energia hornikuntzan. Ukraina ekialdeko guneetan jasan dituzte kalterik larrienak. Errusiarekin muga egiten duen Kharkiv eskualdean, eta hegoalderago dagoen Dnipropetrovsk eskualdean. Zero eta lau gradu arteko tenperatura izan dute gaur han. Reuters berri agentziaren arabera, milioi erdi herritar berogailuak erabili ezinik egon dira Kharkiv eskualdean, eta itzalaldiak izan dira Kieven. Eta Dnipro hiriko alkate Boris Filatovek Telegram bidez salatu du hiri horretako zenbait etxebizitza argindarrik gabe geratu direla, baita ospitale bat ebakuatu behar izan dutela ere. Zenbait familia berogailua erabili ezinda geratu direla azaldu du, eta zazpi eskolatan kalteak jasan dituztela. Horrez gain, Dniproko alkateak jakinarazi du ehun gaixo baino gehiago zituen ospitale bat hustu behar izan dutela, eta han zeudenak beste erietxe batzuetara eraman behar izan dituztela. DTEK Ukrainako energia enpresa pribaturik handienak jakinarazi du bere azpiegiturak hondatu dituztela. DTEK enpresak Telegramen zabaldu duenez, Moskuk Ukrainako energia sektorearen aurka aurten egindako hamahirugarren erasoa izan da gaurkoa. Gainera, Ukrainako agintarien arabera, herritar bat hil dute Dnipropetrovsk eskualdean, eta beste sei zauritu dituzte, Kharkiv hirian. Kremlinek ere eman du Kievek egindako erasoen berri. Errusiako Defentsa Ministerioaren arabera, Ukrainatik bidalitako 59 drone eraitsi dituzte bart. Bestalde, Kursk eskualdeko (Errusia) gobernadoreak Telegramen esan du Ukrainako militarren erasoetan lau herritar hil dituztela. Erasoak, Eguberri egunez Volodimir Zelenski Ukrainako presidenteak salatu du Vladimir Putin Errusiako presidenteak «nahita» aukeratu duela gaurko eguna, Eguberri eguna, eraso horiek egiteko: «Izan liteke gizagabeagoa?», gaitzetsi du Putin X sare sozialean. Gaineratu du gaurko erasoak eragindako kalteak konponduko dituztela: «Errusiak ez du Ukraina hautsiko, eta ez ditu Gabonak hondatuko». AEB Ameriketako Estatu Batuek Ukrainan duten enbaxadore Bridget Brinkek ere gaurko eguna izan du hizpide. X sare sozialean esan du erasoak «Errusiaren Eguberri opariak» izan direla. Eta gehitu du Moskuk misilak eta droneak erabili dituela Eguberriak etxean ospatzen ari ziren familien eta horiek bero mantentzen dituzten azpiegituren aurka: «Errusia negua arma gisa erabiltzen ari da». Iaz hasi zen Ukraina Eguberri eguna abenduaren 25ean soilik ospatzen. Ordura arte, urtarrilaren 7a ere jai eguna zen; juliotar egutegiaren arabera —kristau ortodoxo gehienek erabiltzen dute— orduan ospatzen baita Eguberria. Iaztik, ordea, Ukrainan gaurko eguna baino ez da ofizialki Eguberri eguna. Errusiarekin dituzten antzekotasunak murrizteko asmoz egin zuten aldaketa hori. Errusian, urtarrilaren 7an ospatuko dute Eguberria. Moskuk «ekintza terroristatzat» jo du errusiako ontzi baten hondoratzea Ursa major Errusiako itsasontzia «ekintza terrorista» baten ondorioz hondoratu zela jakinarazi du gaur Errusiako RIA albiste agentziak, iturri gisa ontziaren jabe Oboronlogistika enpresa aipatuz. Errusiako Defentsa Ministerioaren jabetzakoa da Oboronlogistika; eta ministerioak berak eman zuen atzo hondoratzearen berri. Astelehen gauean hondoratu zen ontzia, Mediterraneo itsasoan —Espainia eta Aljeria artean—, hamasei lagun zeramatzala. Horietatik, hamalau erreskatatu zituzten, eta bi galduta daude oraindik.

Orain arte aplikatu izan den bezala, Espainiako Gobernuak bidaia-txartelaren kostuaren % 30 hartuko du bere gain, eta Nafarroakoak, gainerako % 20a, % 50eko deskontuak mantentzeko.