Espainiako Gobernuak gaur onartuko du sindikatuekin adostutako langabezia-subsidioaren erreforma. Kotizaziopeko langabezia-prestazioa bateragarria izango da soldata batekin, eta sorospena 480 eurotik 570 eurora igaroko da lehen sei hilabeteetan.

ELA sindikatuaren ustez, Eusko Jaurlaritzak legea urratu du aurrekontuen proiektua eratzean, eta epaitegietara joko du hura salatzeko. Sindikatuaren arabera, Eusko Jaurlaritzak sindikatuekin bildu gabe onartu du proiektua, eta, horrenbestez, alde bakarrez ezarri ditu bere menpeko langile publikoen baldintzak. Are gehiago, sindikatuaren ustez, aurrerago etor daitezkeen hobekuntzei bidea moztu die. Salaketak egingo duen epaibidea ikusi beharko da, baina ELA oso kritiko agertu da salaketaren berri emateko bidalitako oharrean. Sindikatuaren ustez, Jaurlaritzak langile publikoen Mahai Orokorrera deitu behar zuen aurrekontu proiektua egin aurretik, eta ez du halakorik egin. Are gehiago, ELAk gogoratu du Iñigo Urkulluk, «formalki izan bada ere», beti deitu izan duela mahaira aurrekontuen proiektua aurkeztu aurretik. Espainiako aurrekontuen baitan Eta zein da haserrearen muina? Bada, erabaki horrekin, betiere ELAren ustez, Jaurlaritzak «zuzenean inposatu ditu» langile publikoen baldintzak, negoziatzeko oinarrizko eskubidea «ukatuz eta urratuz». Izan ere, sindikatuak gogoratu du 2025eko Espainiako aurrekontuak eztabaidatzeke daudela oraindik, eta negoziazio horietan aukera badagoela Hego Euskal Herriko funtzionarioentzako bestelako soldata igoerak lortzeko eta aurreko urteetan lan baldintzak negoziatzeko ezarri dituen «mugak» kentzeko. ELAren interpretazioaren arabera, egungo aurrekontu proiektuarekin Jaurlaritzak ziurtzat jotzen du EAEko langile publikoen soldata igoera Espainiako Kongresuan onartuko dena izango dela, sindikatuekin hortik gorako baldintzak negoziatzeko aukerarik gabe. Ate hori itxi izana da epaitegietara jotzeko arrazoia.

Gazte Koordinakunde Sozialistak eta Ikasle Abertzaleek antolatutako Gazte Topagune Sozialista gaur hasi da, Altsasun (Nafarroa). Igandera bitarte, hitzaldi, mahai inguru, ekitaldi eta musika emanaldi ugari izango dira «hausnarketarako, eztabaidarako eta komunitatea eraikitzeko» xedez antolatutako jardunaldi horietan. Gaur Europako krisi ekonomikoa, gazte mugimenduaren historia eta emakumeen lan prekaritatea landu dituzte, besteak beste. Bihar ere, ekitaldi ugari izango dira: 11:30ean, aktualitate politikoari buruzko solasaldia egingo dute, eta, ondoren, argazkia egingo dute «Palestinako eta Libanoko herri langileei elkartasuna» adierazteko. Larunbatean, berriz, manifestazioa egingo dute Altsasuko Foru plazatik, 17:30ean, Gerraren eta faxismoaren aurrean gazteok sozialismora batu lelopean.

Gustukoa dute askok beldurra. Sortzen dituzten emozioek eta adrenalinak jendea harrapatzeko ahalmena dute, bai pantaila batetik, baina baita liburu bateko istorioen bitartez ere. Adar asko ditu beldurrak literaturan, eta haietako bat da genero gotikoa. «Euskaraz ez genuen literatura gotikoko bildumarik, eta hori aldatu egin dugu», azaldu du Aitor Arana idazle eta itzultzaileak. Erroteta argitaletxearen eskutik, Liburutegi Gotikoa bilduma kaleratzen hasi dira aurten, genero horretako eleberri klasikoak euskaratuz. Gazteak literaturara hurbiltzeko helburuarekin egindako bilduma bat da, eta lehen lau liburuak aurkeztu dituzte. Udaberrian eman zioten hasiera bildumari, eta, lehenengo bi liburuek —Frankestein-ek eta Ipuin ankerrak-ek— lortutako «arrakasta» ikusiz, beste bi kaleratzeko erabakia hartu dute. Arana: «Gure asmoa hamar zenbakietara iristea da, baina nik uste dut dena ondo joaten bada hogei izango ditugula». Genero oparoa da itzultzailearen ustez, eta, horregatik, erraza da beste hainbat eleberri klasiko aurkitzea. «Liburuak gazteentzako bideratu ditugu. Testu arinak, errazak eta laburrak dira. Frankestein-ek, adibidez, 280 orri ditu, eta guk 110era laburtzea lortu dugu». Laburpenak «duinak» dira itzultzailearen ustez, liburu bakoitzaren haria eta estruktura errespetatzen baitituzte. Frankestein genero gotikoko libururik famatuenetariko bat izan arren, beste begi batzuekin ikusten du Aranak: «Askotan pentsatzen dut gotikoa baino gehiago maitasunezko istorio bat dela Frankestein-ena. Munstroa ez zen munstro bat, gizakiak bihurtu zuen halako, itsusia zelako». Mary Shelleyk idatzi zuen eleberria, 1818an, eta lehenago euskaratua izan den arren, istorioa laburtuta eskaintzen du Liburutegi Gotikoak. «Gaztelaniatik itzuli ditugu bildumako liburuak, betiere ingelesezkoak lagungarriak izan ditugun arren». Ipuin ankerrak Villiers de L’Isle-Adamen eleberria da. «Heriotzaren inguruko arlo guztiak ukitu zituen Villiersek; horregatik, oso aproposa da bilduma honetan egoteko». Banpiroen istorioak Bildumako hirugarren zenbakiak garrantzi handia du Aranaren ustez. Joseph Sheridan Le Fanuk idatzitako Karmilla da bilduman sartutako azken-aurreko eleberria. «Le Fanuk emakumezko banpiro baten istorioa sortu zuen Karmillan. Bram Stokerrek Drakula idatzi zuenean, Karmilla argitaratuta zegoen, eta badakigu harentzat inspirazio iturri handia izan zela». Itzultzaileak aurreratu du Drakula bilduma gotikoaren parte izango dela beste hainbat liburu berrirekin batera. Katakunba berria eta beste ipuin batzuk da bildumako laugarren zenbakia. «Arthur Conan Doyleren liburua da. Bitxia da askorentzat; Conan Doyle Sherlock Holmesen liburuengatik egin zen famatu eta, baina eleberri gotikoetan ibilbidea egin zuen, eta kalitate handiko lanak ditu», esan du Aranak. Aranak esan du genero gotikoa 1763. urtean hasi zela : «Otrantoko gaztelua eleberriarekin hasi zen generoa. Batzuek diote oraindik gaur egun bizirik dagoela, eta beste batzuek, XX. mendeko lehen laurdenean amaitu zela». Horace Walpole izan zen genero gotikoa estreinatu zuen idazlea. Walpoleren liburuan, Otrantoko (Italia) gazteluko familiaren gertakariak kontatzen dira, haien gaztelua maldizio baten menpe dago eta. Genero gotikoa deskribatzerakoan, «gazteluak, ekaitzak, iluntasuna edota mamuak» aipatu ditu itzultzaileak. «Garai hartan ez ziren zonbiak existitzen, baina hildakoen figura erabiltzen zen. Orain, berriz, zientzia fikzioarekin asko lotzen da gotikoa».

Entitatearen negozio nagusia % 16,4 hazi da, 1.514,5 milioira arte. Gainera, handizkako segmentuaren finantzaketa 1.000 milioi euro baino gehiago handitu da.

Repsolek 1.792 milioi euro irabazi ditu irailera arte, % 36 gutxiago, petrolioaren eta gasaren prezioagatik. Hirugarren hiruhilekoaren amaieran konpainiaren zor garbia 5.532 milioi euroraino hazi da, eta bere likidezia, berriz, 9.528 milioi euroan kokatu da.

Orotara, urtarriletik irailera 92.200 milioi euroko diru-sarrerak izan dituzte (marjina gordina), iaz baino % 10,5 gehiago.

Osasuna gaur zen jokatzeko Espainiako Kopako lehen kanporaketako partida, Chiclanaren zelaian. Baina neurketa bertan behera geratu da, euriarengatik. Eguerditik euri dezente egin du Chiclanan (Cadiz, Espainia), eta zelaiaren egoera asko okertu da, baita harmailena ere. Hala, egoera aztertuta epaileak bertan behera uztea erabaki du. Kanporaketak badu data barria: asteartean jokatuko da, hilak 5, 19:00etan. Hori adostu dute bi klubek, eta Espainiako Futbol Federazioak berretsi egin du erabakia. Realak ere ez du jokatuko, bihar, Kopako kanopraketa. Imanol Alguacilen taldea Alacanten aritzekoa zen, Rico Perez estadioan, Jove taldearen kontra. Euriteek kale eta hondamendi handia eragin dute Valentzian, eta inguruetan, eta hori dela eta kasu honetan ere norgehiagoka ez da jokatuko. Momentuz Espainiako Federazioak ez du argitu kanporaketako data berria, baina ziurra da ez dela hurrengo astean izango, talde txuri-urdinak Plzenen jokatuko baitu ostegunean Europa ligako partida (21:00), eta igande honetan Sevillaren zelaian du ligako norgehiagoka. Gaur lehian izan diren euskal taldeen artean, soilik Barakaldok egin du aurrera. Bizkaiko taldeak 1-3 hartu du mendean Lleida, eta hurrengo kanporaketan izango da. Revillak gol bat sartu du (37. min.), eta Pablo Santiagok bi (66. min. eta 32. min.). Ezustean kanpoan geratu dena Eibar izan da.Luzapenean galdu du Joseba Etxeberriak zuzentzen duen taldeak Logroñesen zelaian: 1-0. Hala, bolada txarrean jarraitzen du Ipuruatik urrun. Denboraldi osoan partida bakarra irabazi du bisitari moduan. Beasainek eta Cortesek ere ezin izan dute kanporaketa gainditu. Gipuzkoarrek azken unean ematen dute amore, Cartagenak 90. minutuan sartu sailkapena eman dio gola; Nafarrek, berriz, 0-2 galdu dute Granadaren kontra. Ezustekorik ezean, bihar arituko direnak Amorebieta eta Tudelano dira. Barbastron jokatuko du Bizkaiko taldeak, Julen Guerrero entrenatzaile kargutik kendu eta gero (19:00). Nafarrek, berriz, Deportivo Mineira jasoko dute (20:00).

Espainiako Gobernuak bertan behera utziko du enpresa energetikoen gaineko zerga. Foru ogasunen esku geratuko diren bi zergari buruzko ohar batean, EAJk Exekutiboaren erabakiaren berri eman du. EH Bilduk zerga iraunkor egitea nahi du, baita Espainiako Gobernuko kidea den Sumarrek ere.

Espainiako Gobernuak energia konpainiei ezohiko irabaziengatik ezarritako zerga iraunkor bilakatzea eragotziko duen lege zuzenketa bat onartu dute. Era berean, asko leunduko du bankuen irabazitakoei ezarritakoa. Azken asteetan, zerga horiek iraunkor bilakatzeko aukera eztabaida iturri izan da Espainiako Gobernuaren eta inbestidurari bide eman zioten alderdien artean, eta EAJ eta Juntsek jendaurrean esana zuten neurria ez zutela gustuko. Ezkerreko bazkideei dagokienez, EH Bilduk, ERCk eta Sumarrek horren aurka doazen zuzenketak aurkeztu dituzte. Noiz-eta enpresa multinazional handiei —750 milioi eurotik gorako negozio bolumena dutenei— gutxieneko zerga bat ezartzeko lege aurreproiektuari zuzenketak ezartzeko azken egunean iritsi dira aldaketak. Espainiako Gobernuak legezko bide hori erabili zuen iraunkor bilakatzeko energia enpresa eta bankuen ezohiko irabaziei ezarritako zerga. Azken egunetan Espainiako energia enpresa handiek presio handia egin dute, eta zerga indargabetu ezean inbertsio estrategikoak arriskuan egon zitezkeela esan. Repsol petrolio konpainiak, esaterako, Katalunian egin asmo dituenak aipatu zituen. EAJk argitu du haien jardunarekin zerikusirik ez duten faktoreengatik «indargabetu» duela Espainiako Gobernuak energia enpresen tributua Presio horiek eragina izan dutela dirudi, baita EAJ eta Juntsen jardun politikoak ere. EAJ izan da hain zuzen energia enpresen zerga «indargabetzeko» zuzenketa onartua izan dela zabaldu duena. Hori bai, alderdi jeltzaleak ohar bidez argitu du haien jardunarekin zerikusirik ez duten faktoreengatik indargabetu duela Espainiako Gobernuak tributu hori. Are gehiago, zehaztu dute, euskal ogasunen esku utziz gero, prest leudekeela energia enpresen irabazien gaineko zerga hori iraunkor bilakatzeko. Ohar berean alderdi jeltzaleak nabarmendu du bankuen eta multinazional handien irabaziei erantsiko zaizkien zerga berriak Hego Euskal Herriko ogasunen menpe geldituko direla, eta haiek arautu ahal izango dituztela. «Erabaki garrantzitsu honek euskal autogobernua indartu egiten du», goratu du Aitor Esteban diputatu jeltzaleak. Zerga horiekin Eusko Jaurlaritzak 119 milioi euro jasotzea espero zuen hurrengo urtean; hori bai, aldaketen aurretik eginikoa da kalkulua. Bankuena, 2028ra arte Lege aurreproiektuari eginiko zuzenketen inguruko xehetasun guztiak oraindik plazaratu ez diren arren, Madrilgo hedabide batzuek zabaldu dute bankuen irabazien inguruko zerga leunduko dela, eta hura gutxitzeko eskema mailakatu bat ageri dela zuzenketetan. Gainera zerga ez da betierekoa izango, oraingoz hiru urtez mantenduko baita, 2028ra arte. Aldaketa horiekin batera tabakoaren —bapeatzeko gailuen likidoen gaineko zerga igo dute—, hidrokarburoen eta kapitalaren errentei eragiten dieten hainbat aldaketa adostu dituzte. Espainiako Gobernuari dagokio orain azalpenak ematea eta aldaketaren zergatia argitzea. Ziurtzat jo daiteke inbestidurari bide eman zioten ezkerreko alderdiek txartzat jotzea. Sumar oso irmoa izan da haren aurka, eta EH Bilduk eta ERCk zerga horiek iraunkor bilakatzeko zuzenketak erregistratu dituzte. Aldaketa guztiak Espainiako Kongresuan bozkatu beharko dira.