Hamalau pertsona hil, beste 25 bat zauritu, eta gero bere buruaz beste egin zuen David Kozakek, bart, Pragan. 24 urte zituen, eta ez zuen aurrekaririk, baina, iturri batzuen arabera sare sozialetan iragarri zuen sarraski bat egiteko asmoa zuela. Ikertzaileak ari dira argitzen zer gertatu den, eta uste dute, gainera, Pragako hilketen aurretik beste hiru pertsona ere hil zituela. Kozakek Historia ikasten zuen, Pragako Karolina Unibertsitatean. Filosofiako fakultatera arma luze batekin sartu zen atzo arratsaldean, eta alde batera eta bestera tiroka hasi zen. Teilatura igo zen gero, eta kalera tiroka hasi zen, baita oinezko batzuk zauritu ere. Larritasuna eragin zuen erasoak. Poliziek unibertsitateko eraikinak hustu zituzten, unibertsitate inguruko kaleak itxi, eta kalera ez ateratzeko eskatu zien herritarrei. Garraio publikoa ere bertan behera utzi zuten. Azkenean, Txekiako Errepublikako Poliziak inguratu zuen, eta bere buruari tiro eman zion gazteak. Agintariek berehala baztertu zuten «nazioarteko terrorismoarekin» inolako loturarik zuenik. Ostegun arratsaldean gertatu zena argituta, baina, beste galdera batzuk erantzun nahian ari dira poliziak orain. Izan ere, abenduaren 15ean 32 urteko gizon baten eta haren bi hilabeteko alabaren gorpuak aurkitu zituzten Pragatik gertuko baso batean, eta ikertzaileek uste dute Kozakek hil zituela haiek ere. Ales Strach Pragako poliziaburuaren esanetan, abenduaren 21ean Pragan gertatu zen hilketa saihesteko «egun gutxi batzuk» beharko zituzten, Kozaken susmoa hartzen hasiak zirelako. Ez da hori, baina, gaztearekin lotutako auzi bakarra. Asteazkenean, Pragako hilketa baino egun bat lehenago, gizon baten gorpua aurkitu zuten Hostounen, hiriburutik 35 bat kilometrora. Uste dute Kozaken aita dela hildako gizon hori, eta ikertzen ari dira berak hil ote zuen hori ere. Susmo horiek eraginda, Karolinako unibertsitatearen inguruan polizia operazio bat hasi zuten ostegunean, espero baitzuten gaztea Historiako klasera joatea egun horretan. Historiako fakultatera beharrean, ordea, Filosofiakora jo zuen, eta han ekin zion tiroka. Berri agentziek zabaldu dutenez, gazteak Telegramen idatzita utzi zuen halako sarraski bat egiteko prest legokeela; antza, Errusian ikasle batek berriki halako tiroketa batean bi pertsona hil zituela ere aipatu zuen, eta horretan inspirazioa bildu zuela. Kozakek armak erabiltzeko baimena zuen; zehazki, zortzi arma erabiltzeko. Txekiar Errepublikan ez dira ohikoak halako erasoak, baina duela lau urte, 2019an, ospitale bateko tiroketa batean sei lagun hil ziren. Bohuslav Svoboda Pragako alkatea kezkatuta mintzatu zen bart telebistan: «Pentsatzen dugu halakoek ez dutela gurekin zerikusirik, baina ikusten ari gara gure mundua aldatzen ari dela, eta tiratzaile indibidualen arazoa ugaritzen ari da». Gobernuak lutu egun izendatu du abenduaren 23a.

NBE Nazio Batuen Erakundeko Segurtasun Kontseiluak adierazpena onartu du, hainbat egunez hitzak neurtzen ibili eta gero. Batetik, eskatu du palestinarrei «giza laguntza emateko bide seguru eta berehalakoa» bermatzeko. Bestetik, aldeei eskatu die sor ditzatela «liskarrak modu iraunkorrean amaitzeko baldintza egokiak». AEBak eta Errusia abstenituta eta Segurtasun Kontseiluko gainerako hamahiru kideek aldeko botoa emanda onartu dute adierazpena. Segurtasun Kontseiluak eztabaida luzea izan du New Yorken gaur onartu beharra zuen adierazpenaren inguruan. Su eten bat eskatzeko ahaleginean aritu badira ere, AEBek ez dute horretarako biderik utzi, eta borrokak eteteaz aritu dira. Azkenean, giza laguntza helarazteko «baldintzak» sortzea besterik ez dute aipatu. Gaur onartutako adierazpenean, bestalde, galdegin dute Gazako zerrendako errepide guztiak segurtasunez erabili ahal izatea giza laguntza helarazteko, eta mekanismo bat sortzea NBEri laguntza baliabideak lehenbailehen bideratzeko. Bahituak askatzeko eta Gazan fuela sartzeko ere eskatu du, oinarrizko beharretarako. Gazan su etena eskatzeko ebazpen bat bozkatu zuten organo horretan abenduaren 8an, eta AEBek betoa jarri zioten —horretarako aukera dute, kide iraunkor gisa—. Aste honetan eztabaidatu duten agiria, berriz, Arabiar Emirrerri Batuen iniziatiba izan da, hark aurkeztu zuen lehen proposamena Segurtasun Kontseiluan. The Guardian Erresuma Batuko egunkariak jakinarazi duenez, astean honetan hainbat aldaketa egin dizkiote eztabaidagai izan duten idazkiari, eta, besteak beste, «liskarrak» berehala eteteko atala ezabatzea proposatu zuten AEBek. Trukean, «premiazko sarbide humanitarioari oztoporik gabe eta segurtasunez bide emateko eta liskarrak modu iraunkorrean amaitzeko baldintza egokiak garatzeko» eskaera gehitu zioten zirriborroari. Segurtasun Kontseiluak onartutako ebazpenak lotesleak dira berez, nahiz eta azken 75 urteetan Israelek ez dituen bete gehienak. Egunkari horrek adierazi duenez, aldaketa horiek eta beste batzuk gauzatu ahal izateko, negoziatzen aritu dira AEBetako eta Segurtasun Kontseiluko beste herrialde batzuetako agintariak azken egunetan. AEBek NBEn duten ordezkari Linda Thomas-Greenfieldek gaur goizaldean egin ditu horien inguruko adierazpenak: «[Proposamenak] bat egingo du Egiptok dituen lehentasunekin: berehalako laguntza humanitarioa eskaintzeko aukera emango digu hala izatea erabakitzen duten lurraldeetan, eta aurrera egiteko nahia dugu». Alde horretatik, ziurtatu du Arabiar Emirerri Batuek sortu duten testuaren bertsio horrek «gehikuntzak» dituela eta «arabiarren» eskaerak betetzen dituela. Guterresen zaputza Antonio Guterres NBEko buruak Israeli egotzi dizkio laguntza Gazara iristeko zailtasunak: «Egiazko arazoa zera da, Israel nola egiten ari den bere ofentsiba, horrek sortzen baititu arazoak Gazan giza laguntza banatzeko». Azken asteetan esan duen bezala, gaur ere errepikatu du «su eten humanitario bat» dela gazatarren beharrei erantzuten hasteko bide bakarra. Segurtasun kontseiluaren partetik gehiago espero zuela erantsi du. Riyad Mansour Palestinak NBEn duen enbaxadoreak adierazi du «norabide egokian» doan urrats bat dela adierazpen hau: «Inplementatu egin behar da, eta su eten berehalakoa ezartzeko presio erraldoi bat egin behar da aldi berean. Berriro esango dut: su eten berehalako bat». Behin eta berriro errepikatu du «su etena», segurtasun kontseiluak aste oso saihestu duen hitza. Israelgo enbaxadorea, ordea, kritiko agertu da: «130 bahituak, emakumeak, umeak, eta zaharrak, atxikita dauzkate oraindik Gazan, eta ezin dira orri baten azpiko aldeko ohar bat bihurtu. Giza laguntza egunero sartzen da Gazan. Baina Hamasek bahitutakoek ezin dute Gurutze Gorriaren bisitarik jaso. Bahituek izan beharko lukete batzar honen agendaren lehen puntua». Aste honetan egin dituzten adierazpenetan, AEBetako ordezkariek adierazi dute su etenari buruzko jatorrizko ebazpen proposamenak NBEren esku uzten duela urtebetez «laguntza humanitarioa kudeatzeko kontrolaren parte handi bat». Haien ustez, horrek larrialdietako horniketak bideratzea «oztopatuko» luke. Ondorioz, NBEko idazkari nagusi Antonio Guterresi eskatu diote «goi mailako» koordinatzaile bat izenda dezala laguntza humanitarioarekin zerikusia duten kontuak ikuskatzeko, eta, hala, egin beharreko prozesu guztiak «errazteko». AEBek uste dute «ahalik eta lasterren» izendatzea komeni dela, eta ohartarazi dute «gatazkako alde guztiek» kooperatu beharko luketela koordinatzailearen lana ez zailtzeko. Richard Gowan nazioarteko krisiei aurre egiteko NBEko taldearen zuzendariak zalantzak ditu horren emaitzekin, The Guardian-en esan duenez: «Washingtonek horren alde egingo du, asko leundu baitu testua; baina Errusiak zailtasunak izango ditu onartzeko». Azkenean, baina, Errusia abstenitzeko modua topatu dute. Aste honetan eztabaidatutako testuetan beste aldaketa batzuk egitea ere proposatu dute AEBek. Besteak beste, nazioarteko zuzenbide humanitarioarekin lotutako eskubideen urraketak gaitzesten dituen adierazpena ezabatzea. «Zibilen eta horien ondasunen aurkako erasoak, indarkeria eta terrorismo ekintzak» gaitzesten zituen, zehazki, Arabiar Emirerri Batuen jatorrizko proposamenak. 20.000 hildako Bien bitartean, The Guardian-ek iragarri du Israelek atzera bota dituela Gazaren kontrako erasoaldiari amaiera emateko epeak; hamar aste igaro dira urriaren 7an erasoa hasi zenetik. Horrekin guztiarekin lotuta, Gazako Osasun Ministerioaren arabera 20.000 lagun inguru hil ditu Israelek orain arteko bonbardaketetan; horietatik 8.000 umeak dira. Horrez gain, Israelgo armadako soldaduek eta Zisjordaniako kolonoek hirurehun palestinar inguru hil dituzte. The Times of Israel egunkariak egin duen inkesta batek erakutsi du Israelgo herritarren %40k nahi dutela Joe Bidenek jarraitzea AEBetako presidente, eta %26k nahiago dutela Donald Trump 2017 eta 2021 arteko Etxe Zuriko maizterra itzultzea. AEBetako presidentetzarako bozak datorren urteko azaroan dira egitekoak. 2020an The Times of Israel egunkariak egindako inkestetan, bestelakoak izan ziren emaitzak: Israelgo herritarren %60k nahiago zuten Trump. Hedabide horrek azaldu duenez, azken hogei urteotan lehen aldia da Israelen demokratek aurrea hartzen dutena.

Mitxel Lakuntza (ELA) rechaza los presupuestos del Gobierno Vasco para 2024, considera que “tienen la marca Urkullu: inercia, autocomplacencia y propaganda”, y ha avisado de que el sindicato “seguirá organizando el enfado y el malestar social” ante una política que “no da por buena”.

UGTk eta CCOOk grebari eutsiko diote, urtarrilaren 5etik 8ra, eta Loiuri eragingo dio. Iberiak Estatuko zortzi aireportu nagusitan, tartean Bilbon, ‘handling’ zerbitzua galdu ostean piztu da gatazka.

EAJk eta PSE-EEk aldeko botoa eman diete EAEko 2024ko Aurrekontuei, Eztabaidan, akordioak lortzeko “borondate eza” leporatu diote elkarri Gobernua babesten duten taldeek eta oposiziokoek.

Hiru punturekin agurtu nahi zuten urtea Alavesek eta Osasunak, baina bi taldeak esku hutsik joan dira etxera. Alavesek bikain lehiatu du Real Madrilen aurka, eta garaipenean sinesteko arrazoi asko izan ditu Nachok 54.minutuan txartel gorria ikusi ondoren. Hala ere porrota jaso du, Lucas Vazquezek luzapeneko korner batean gola sartu ondoren. Osasunak, ordea, ez du behar bezain ondo lehiatu, eta jokoan aspalditxo dabil asmatu ezinik. Irabazten hasi da, baina gehiegi eman dio Mallorcari, eta Balearretako taldeak hiru gol sartu dizkio Sergi Herrerari. Mendizorrotzakoak partida handiaren itxurara hartu du hasi eta berehala. Zaleek izugarri bultzatu dute etxeko taldearen hasiera, eta oso ausart hasi da Alaves. Kontraerasoan bi alboetatik saiatu da, eta zazpigarren minutuan Luis Riojak izan du lehen aukera argiena. Eskuinetik jokaldi ona egin ondoren, ate osoa beretzat zuela iritsi zaio baloia, baina Fran Garciaren bizkarrarekin egin du topo, Kepa Arrizabalagaren atearentzat oso jaurtiketa arriskutsua zena eragotziz. Etengabeko hartu-emana izan dira bi taldeen arteko lehen 20 minutuak. Kanpokoek erritmoa zeramaten haien jokaldietan, arrisku gutxirekin, eta etxekoek euren aukeraren zain zeuden, aurkako atera abiadura handiz iristeko. Izan ere, Rafa Marin, Alavesen utzita dagoen harrobi zuriko jokalariak, aldaratze bat aurkitu du korner batean eta gola urratu du, baina ezin izan du errematea eroso egin eta Kepak aukera zapuztu du. Alaves sendo izan da lehen zatian, eta bazuen bigarren zatian nola jokatzeko modurik. Baina partidaren norabidea aldatu da guztiz 54.minutuan, bi taldeentzako. Nacho Fernandezek txartel gorria ikusi du Samu Omorodioni sarrera bortitz bat egin ostean. Eta Alavesek gailendu behar zuela ematen zuenean, kontrakoa gertatu da. Real Madril baloiaren jabe egin da. Jude Bellingham jokoan gehiago sartzen saiatu da, eta lehen zatian baino errazago lortu du konektatzea Rodrygorekin. Aurrelari brasildarrak izan zuen bigarren zatiko aukerarik onena, ezkerretik agertu zen kontraeraso batean, eta bere jaurtiketa atearen eskuadratik oso hurbil geratu da. Real Madrilek ez du gutxiagotasunik jasan, eta partida amaierara arte bizirik mantendu da. Bertan, Ancelottiren taldea gustura sentitzen da, eta 92. minutuko korner batean lortu du gola. Lucas Vazquezek egin du gola, Siveraren aurrean eragozpenik gabe. Burua ezin altxatu Osasuna ez dabil ondo, eta gaur beste partida kaskar bat osatu du Jagoba Arrasateren taldeak. Azken jardunaldian, mirarizko hiru puntu lortu zituen Rayoren aurka, baina jokoan asmatu ezinik jarraitzen duela berretsi du. Eta hori, ezin-hobe sartu dela gaurko partidan, zazpigarren minuturako aurrea hartuz Pablo Ibañezen golarekin. Baina Balear Uharteetako taldeak sei minutu behar izan ditu Ibañezen gola indargabetzeko. Matija Nastasic erdiko atzelari serbiarrak egin du berdinketaren gola, Dani Rodriguezek jaurtitako korner batean. Mallorca, Osasuna baino gehiago izan da lehen zatian, nahiz eta Javier Aguirrek aulkian utzi hainbat jokalari garrantzitsu. Jaume Costak, Pablo Maffeok eta Antonio Sanchezek 2-1ekoa izan dute, baina ez dute asmatu, edo Herrera bikain batekin egin dute topo. Nafarroako taldea lokartuta atera da atsedenaldiaren ondoren, eta hamar minutu baino gutxiagoan bi gol jaso ditu, Dani Rodriguezek eta Antonio Raillok egindakoak. Gaur, gainera, Osasunak ez du hobera egin aldaketekin; gorritxoak ez dira inoiz eroso sentitu berdegunean eta, are gehiago, azken txanpan beste golen bat jasan ahal izan dute. Dena erabakita zegoela zirudienean, Raul Garciak Osasunaren bigarren gola sartu du luzapenean, eta Mallorca bere abantailari eusteko ahalik eta ahalegin handiena egitera behartu du azken minutu ikaragarri batzuetan. Baina gaurkoan ez da iritsi luzapeneko gola, eta ez du punturik ostu Osasunak.

Realari aho zapore garratza utzi dio 2023. urteko azken partidak. Marka da hori, berebiziko urtea osatu eta gero. Egiari zor, Espainiako ligaren bide luzean koska bat gehiago besterik ez da jardunaldi bakoitza, baina garaiak sortzen du esangura. Ez alferrik, beti baita garrantzitsua eten bati pozarren ekitea, geldialdia arinagoa egiteko. Txuri-urdinek ez dute halakorik lortu, hiru puntuak lortu nahi zituztelako. Bakarra eskuratu du Cadizen. Izan ere, hasi bezala amaitu da Nuevo Mirandilla estadioko partida: golik gabe. Bi taldeek puntuak banatu dituzte, eta hori sari txikia da gorengo postuen peskizan ari den talde batentzat. Imanol Alguacilen multzoak aukera bikaina zuen gaur, Txapeldunen ligako postuen lehian ari diren taldeen erritmoari eusteko, baina apur bat atzera geratu da. Atletico Madril laugarrenak eta Athletic bosgarrenak lau punturen aldea dute orain; bi puntura geratzeko abagunea galdu du. Sasoi hasieratik erabilitako jokalari multzoa kontuan hartuta, Imanolek talde egokia zelairatu du. Atzealdeko bi hegaletan txertatu ditu berritasun nagusiak, uste baino lehen osatu den Brais Mendezekin batera. Kieran Tierneyk eta Alvaro Odriozolak egin dituzte defentsako hegaleko lanak. Hori bai, bitxia izan da eskuin aldekoen kasua, partidan zehar jazotako gora-beherengatik. Orotara lau lagun aritu dira postu horretan. Hamari Traorek hartu dio erreleboa Odriozolari, lehen zatian, baina ez du asko iraun. Malikoak min hartu du, eta Aritz Elustondok ordeztu du. Beasaindarrari ere sarrera itsusia egin diote, barren, eta hura ere aldaketa beharrean izan da. Azkenerako, Aihen Muñozek ezohiko lekuan jokatu behar izan du. Bost aldaketatik hiru horretarako erabili ditu Imanolek, bestelako erremediorik ezean. Hura izan da neurketak eman duen hizpideetako bat, eta sintomatikoa da. Esan nahi du bi taldeak hutsal aritu direla erasoan. Cadiz aritu da biziago hasieran, garaipen premiak eraginda —irailaren lehenean irabazi zuen azken partida—, baina espejismoa izan da. Gabezia handiak ditu ate aurrean, eta izan dituen aukera apurrak ondo saihestu ditu Alex Remirok. Hain justu ere, atezain nafarra izan da Realekoen jokalari onentsuenetako bat. Neurketak izandako bilakaeraren beste sintoma bat da hori. Eraginkortasunik gabe Realak ez du beste aldietako nagusitasunik erakutsi. Distira falta izan zaio jokoan, azken metroetan batez ere, eta gol aukera urriak izan dituzte txuri-urdinek. Umar Sadiqen bakarkako saialdiek ez dute eraginik izan, eta gainontzeko jokalari esanguratsuak ere tantaka agertu dira erasoko jokoan. Hala, Martin Zubimendik izan du Realekoen aukerarik argiena. Eskuin hegaletik antolatutako jokaldi baten ostean, erdilari donostiarrak baloi galdu bat jaso du arean, baina haren ezkerkadak langa jo du. Beste behin, Zubimendik erakutsi du ahalaz gain fedea ere baduela. Ezohiko posturan errematatu du baloia, baina hark izan du gola gertuen. Ordutik aurrera, deus gutxi berdegunean. Imanolek Beñat Turrientes eta Carlos Fernandez zelairatu ditu, jokoa suspertu asmotan. Erdilari beasaindarrak azkenaldiko joerari eutsi dio, eta borondatetsu aritu da zelaian. Aurrelari espainiarra, ostera, bere lekua aurkitu ezinean ari da. Bien bitartean, Sadiqek nahigabe aurpegiarekin utzi du zelaia. Edonola ere, azkenerako bi taldeak katramilatu egin dira zelaian, eta jokalariek egindako falta kopuru handiak makaldu egin du jokoa. Joko eta distira gutxiko norgehiagoka izan da Cadizekoa, eta lehiaketari dagokionez urtea amaitu ondotik, egun batzuetako atsedenera joko dute orain. Realaren kasuan, aurrean dituen helburu garrantzitsuen aurretik atseden hartzeko garaia izango da, eta datorren urtea 2023aren trazakoa baldin bada, gaitzerdi.

Iruñeko udaletxetik 300 metro eskasera den Pamplona Catedral hotela aukeratu dute EH Bilduk, Geroa Baik eta Zurekin Nafarroak udal gobernuko akordioa sinatzeko. Orotara, lehentasunezko 60 ekintza jasoko ditu dokumentuak. Ikusmin handia piztu du agerraldiak, eta hiru alderdietako ordezkariak pozarren agertu dira kameren eta kazetarien aurrean. «Ilusioa» eta «anbizioa» transmititu dute. Zurekin Nafarroako Txema Mauleonen hitzetan, agintaldiko hiru urteetatik harago doan akordioa da, eta «azkar eta eraginkor» ibili dira haren edukia sinatzeko. Geroa Baiko Mikel Armendarizen arabera, «Iruñea azken hilabeteetako paralisitik aterako du, eta egonkortasuna emango dio». EH Bilduko Joseba Asironentzat, berriz, «egun garrantzitsua eta historikoa da, ziklo berri bat irekitzen duelako. Bizikidetza, desberdinen arteko begirunea eta gure aniztasunaren balioa nabarmentzea funtsezko zutabeak izango dira». Ekainaren 17an haren hautagaitza aurrera atera ez bazen ere, Asironek azpimarratu du zentsura mozioa ez dela «bigarren itzuli bat» izango. «Egun garrantzitsua eta historikoa da, ziklo berri bat irekitzen duelako. Bizikidetza, desberdinen arteko begirunea eta gure aniztasunaren balioa nabarmentzea funtsezko zutabeak izango dira». JOSEBA ASIRON EH Bilduko alkategaia Abenduaren 13an erregistratu zuten zentsura mozioa hiru alderdiek eta PSNk Iruñeko Udaleko idazkariaren aurrean. Egun berean, EH Bilduk eta Alderdi Sozialistak mugimendu politiko horri guztiari bide eman dion akordioa ezagutarazi zuten. Hain zuzen ere, Asironek nabarmendu du agiri hori izan dutela oinarri gobernu akordioa hitzartzeko. Hala, udal gobernua EH Bilduk, Geroa Baik eta Zurekin Nafarroak osatuko badute ere, PSNk emandako babesa eskertu du Asironek. Gaineratu du akordioaren berri badutela sozialistek, eta haien botoak gehituta «babes garrantzitsua» izango duela gobernuak. Lanerako prestasuna eskertu die alderdiei: «Nire eskerrik zintzoena lau indar aurrerakoiei. Elkarrizketa, negoziazio eta akordioetarako garaia hasiko da orain». Akordioaren edukia Lau ardatz izango ditu akordioak, eta 60 neurri inguru jasoko ditu. Lehenik eta behin, berdintasuna, bizikidetza, aniztasuna eta zaintza bultzatuko dituzte. Azken asteetan etxerik gabekoen aterpeekin sortu diren arazoak izan dituzte hizpide, eta Asironek adierazi du kale gorrian diren pertsona guztientzako arreta bermatzea dutela helburuetako bat. Bigarrenik, hiriari begirako ekipamenduak dira beste ardatzetako bat. Besteak beste, etxebizitzaren arazoari aurre egin nahi diote. Bertan, etxebizitza plan bat egingo da, babes ofizialeko, alokairu sozialeko larrialdiko, gazteen emantzipaziorako edo familia kalteberen etxebizitzak bultzatzeko. «Etxebizitza plana anbiziotsua da. Oraintxe bertan gazteen eta sendi askoren eskari nagusia da, eta funtsezko elementua izango da», aipatu du Txema Mauleonek. Ardatz horretan, gainera, hiriko beste hainbat proiektu jasotzen dira. «Hiri osoan zerbitzu sozialen inbertsio ugari egingo ditugu, haur eskoletatik hasita, eguneko zentroak, kiroldegiak…», goraipatu du Mauleonek. Proiektuei dagokienez, beste hainbat konpromiso jaso ditu: Sarasate pasealekua berriz urbanizatzea, Sanduzelaiko biribilgunea, Euskal Pilotaren Museoa, Erorien Monumentuari bestelako esanahi bat emateko egitasmoa herritarren parte hartzearekin batera eta Nafarroako Gobernuarekin elkarlanean. Horri loturik, Asironek argitu du UPNk bultzatutako Zangoza kaleko aparkalekua bertan behera geratuko dela, baina gaineratu du Iruñeko Bigarren Zabalgunean aparkatzeko arazoa aztertzeari ekingo diotela berehala. Hirugarrenik, trantsizio energetikoari eta mugikortasun iraunkorrari lotutako hamasei neurri ditu akordioak. Besteak beste, Iruñean 25.000 zuhaitz landatuko dituzte, eta Mugikortasun Plana sustatuko du. Gainera, plastikoaren erabileraren inguruko araudi bat onartuko dute. Azkenik, auzoak izango dituzte ardatz eta hamabost neurri antolatu dituzte bertan. «180 graduko bira emango diogu hiriari. Iruñearen ikuspegi zentralista baten ordez udalak bere auzoei begiratuko die, batik bat zailtasun gehien dituztenei», azaldu du Mauleonek. Adibidez, zaharkituta diren Arrotxapeko eta Arrosadiko liburutegiak hobetu nahi dituzte. Gobernu egitura Udal gobernu berriak lehengo egiturari eutsiko dio. Alkatetza eta zortzi sail izango ditu. EH Bilduk hartuko ditu horietatik sei: Ogasuna eta Giza Baliabideak (Garbiñe Bueno); Gobernu Estrategikoa, Hirigintza eta Etxebizitza (Joxe Abaurrea); Kultura Saila, Jaiak eta Hezkuntza (Maider Beloki); Hiri Bizigarria eta Jasangarria (Borja Izagirre); Berdintasuna (Zaloa Basabe); eta Herritarren Segurtasuna eta Bizikidetza (Endika Alonso). Geroa Bairen esku egongo da Sustapen Ekonomikoa, Berrikuntza eta Europako Proiekzioa. Sail horren ardura izango du Koldo Martinezek. Azkenik, Zurekin Nafarroako Txema Mauleonek Gizarte Ekintza kudeatuko du. Kargu horiez gain, bi zinegotzi berezi izango dira. EH Bilduko Aitziber Campionek Herritarren Partaidetza eta Euskara izango du bere ardurapean sail berezi horretan; Geroa Baiko Mikel Armendarizek, berriz, Berrikuntza eta Garapenerako Lankidetza. Behin akordioaren xehetasunak ezagutarazita, Armendarizek azpimarratu du lehen egunetik buru-belarri aritzeko borondatea dutela. Alta, ikusteko dago UPNk zer jarrera izango duen. Horri buruz galdetuta, Asironek erantzun du «logikoa» dela hasierako haserrea, baina espero du lehenbailehen oneratzea eta oposizio kritikoa egitea. «Guk egin dugun bezalaxe», gaineratu du. Trantsizio ordenatu baterako UPNren deirik jaso duen galdetuta, Cristina Ibarrolaren erantzunik ez du jaso. «UPN beharrezkoa da hirian, hiriaren sektore garrantzitsu bat ordezkatzen du, eta espero dugu hasierako haserre horren ostean oposizioa eraikitzailea izatea». Alta, iragan asteko tonu berari eusten dio oraingoz Ibarrolak. «Duintasun politikoa» eskatu die hiru alderdiei: «Zentsura mozioaren ostean, gezur handiaren hurrengo atala da akordio politikoaren aurkezpena». gobernu taldea Joseba Asiron Saez. Iruñeko alkatetza. Garbiñe Bueno Zabalza. Giza baliabideak, Ogasuna eta Kontratazio Arduratsua (EH Bildu). Joxe Martin Abaurrea San Juan. Gobernu Estrategikoa, Hirigintza, Etxebizitza eta 2030 Agenda (EH Bildu). Maider Beloki Unzu. Kultura, Jaiak eta Hezkuntza (EH Bildu). Endika Alonso Irisarri. Herritarren Segurtasuna eta Bizikidetza (EH Bildu). Borja Izagirre Larrañaga. Hiri Bizigarria eta Jasangarria (EH Bildu). Zaloa Basabe Gutierrez. Berdintasuna, Ekintza Komunitarioa eta Auzoak (EH Bildu). Aitziber Campion Ganboa. Herritarren Partaidetza eta Euskara (EH Bildu) Koldo Martinez Urionabarrenetxea. Sustapen Ekonomikoa, Berrikuntza, Europar Proiekzioa, Garapenerako Lanidetza eta Gazteria (Geroa Bai) Mikel Armendariz Barnetxea. Berrikuntza, Europar Proiekzioa eta Garapenerako Lankidetza (Geroa Bai) Txema Mauleon Etxeberria. Ekintza Soziala (Zurekin)

EAJk eta PSEk alde bozkatu dute; PP eta Elkarrekin Podemos abstenitu egin dira, eta EH Bilduk eta VOXek kontrako bozka eman dute. Mendiak nabarmendu duenez, lege honekin “beste pauso bat eman da autogobernuaren eraikuntzan”.

Athletic osatzen duten guztiek zoriontsu igaroko dituzte Gabonak. Batek baino gehiagok ez luke nahi ligak etena izatea. Aspaldi ez bezala ari dira gozatzen. Ikusgarri ari da talde zuri-gorria. Espainiako Lehen Mailako lehen hemezortzi jardunaldiak jokatuta, 35 puntu ditu. Duela mende erdi ez zen horren ondo aritu: 36 puntu zituen 1983-1984 denboraldian. Athletic ligako txapeldun izan zen azkeneko sasoia izan zen. Orduan, bi puntu balio zituen garaipenak. Hiru puntu balio dituenetik ez da horren ondo aritu: 1995-1996 denboralditik. Duela hamar urtekoa zuen markarik onena: 33 puntu, 2013-2014 sasoian. Orduko hartan ere Ernesto Valverde zen entrenatzailea. Lehen denboraldia zuen Athleticen aulkian esertzen zen bigarren aldian. Jarraitzaile zuri-gorriek ez dute ahaztu, euren taldea azkenekoz Txapeldunen Ligarako sailkatu zen aldia izan baitzen. Egun, gol aldeagatik ez dago Txapeldunen Ligako postuetan: bosgarrena da, laugarrenarekin berdinduta; hau da, Atletico Madrilekin. Espainiako taldeak, hala ere, partida bat gutxiago jokatu du. Larunbatean jokatuko du, etxean, Sevillaren aurka. Eustea da orain erronka. Ez litzateke lehen aldia Eguberrietako etenaldira lan bikain eginda iritsi, sekulako txakalaldia izan, eta Europatik kanpo geratu dela. Hala ere, gaur-gaurkoz, ez du itxura halako zerbait gerta dakiokeenik. Oso sendo ari da. Zortzi jardunaldi daramatza galdu gabe, eta jokoan egon diren 24 puntuetatik hemezortzi eskuratu ditu. Onenen artean dago erasoan eta defentsan. Itxura ederra du. Vallesen partida ikusgarria Las Palmas izan da zuri-gorriek mendean hartu duten azkeneko aurkaria. 1-0 irabazi diote gaur gauean San Mamesen. Laugarren garaipena dute jarraian euren zaleen aurrean. Oso ondo ari zen Espainiako taldea: zortzigarrena zen, eta azken bederatzi puntuetatik zazpi lortu zituen. Baina, gaur, esku hutsik geratu da. Athletic hobeto aritu da, baina Las Palmaseko atezainak, Alvaro Vallesek, sekulako partida egin du. Azken unean bota dute zuri-gorriek Vallesek atean eraikitako horma. Unai Gomezek sartu du garaipenaren gola, buruz, kontraeraso batean, 94. minutuan. Bi taldeak erritmo bizian aritu dira. Eta bizi-bizi arituta gola sartzear izan da Iñaki Williams hamalaugarren minutuan, baina Vallesek gelditu egin dio baloia. Bisitariak ez dira kikildu, eta ausart jo dute erasora, batez ere, Marvin Parken azkartasuna baliatuta. Hain zuzen, 28. minutuan, Marvinek eta Aitor Paredesek izandako lehia batean penaltia adierazi du epaileak. Baina jokaldia telebistan ikusi eta gero, iritzia aldatu du. Ez du halakorik egin hamar minutu geroago. Nico Williamsek ezkerretik erdiratu du baloia, eta Gorka Guruzeta errematatzeko prest zegoela, Mika Marmolek heldu egin dio atzetik. Penaltia adierazi du epaileak, eta erabakiari eutsi dio. Guruzetak berak bota du penaltia, baina Vallesek gelditu egin dio. Azken partidan, Atletico Madrilen aurka, Oihan Sancetek huts egin zuen penaltia. Gaur, ordea, Guruzetak. Biak ala biak emaitza hutsean zegoela. Aurrelariak egindako hutsa konpontzear egon da Yuri Berchiche bost minutu geroago, baina haren errematea gutxigatik joan da kanpora. Munir Al Haddadik eta Julian Araujok ere gertu izan dute gola, baina ez dute asmatu. Hala, hutsean amaitu da lehen zatia. Las Palmasek hobeto ekin dio bigarren zatiari, arriskua sortuz. Hori ikusita, Valverdek bi aldaketa egin ditu 56. minutuan: Mikel Vesga eta Alex Berenguer zelairatu ditu Herreraren eta Guruzetaren ordez. Atera eta berehala, Berenguerrek aukera oso garbia izan du Nico Williamsek hasitako kontraeraso batean, baina Vallesek golaren marraren gainetik atera du haren errematea. Unai Simonek ez du gutxiago izan nahi, eta hark ere erantzun bikaina eman dio 67. minutuan Sandro Ramirezek urrutitik egindako jaurtiketari. Hurrengo jokaldian, berriz, Vallesek berriro salbatu du bere taldea, Iñaki Williamsek buruz egindako errematea urrunduta. Athletic itsu-itsuan aritu da golaren bila minutu askoan, baina edo Valles azaltzen zen baloia gelditzeko, edo atzelari bat baloia urruntzeko. Azken unean lortu du ahaleginaren saria: garaipenaren gola. Gola sartzearekin batera lehertu da festa San Mamesen.