Gol-zaparrada jaso du Alavesek (3-0), Espainiako Lehen Mailako liderra den Gironaren aurka. Michel Sanchezek gidatzen duen taldeak menderaezin jarraitzen du, eta hasieratik bukaerara arte erraztasun handiak izan ditu Alavesekin nahi zuena egiteko. Dovbyken bi golek, eta Porturen gol batek eman diote garaipena etxeko taldeari. Jokatutako 51 puntuetatik 44 lortu ditu Gironak, eta Alavesek etxetik kanpo ez du garaipen bat ere lortu, beraz, emaitzak bi taldeen boladak berretsi ditu. Lehen zatia zuri-gorrien bakarrizketa bat izan da hasieratik, Michelen apustu oso erasokorrarekin: Yan Couto eta Miguel Gutiérrez, lanbidez eskuin alboko defentsak, Ivan Martinen eta Aleix Garciaren parean aritu dira, baita gorago ere. Horrek, Alavesen bi hegalen altuerak jaistera behartu ditu, eta Gorosabel eta Rioja defentsa lanetan aritu dira. Nagusitasuna erabatekoa eta ukaezina izan da, Gironaren baloi jabetza % 75eraino iritsi den punturaino. Alaves, baloia borrokatzeko aukerarik gabe, Samu Omorodionen indarra aprobetxatzeko zain zegoen, kontraerasoan min egiteko. Baina baloiak segundo gutxi batzuk besterik ez dio iraun, eta burua bakarrik defentsan zuten Luis Garcia Plazaren jokalariek. Lehenik eman zuen abisua Dobyk aurrelariak zortzigarren minutuan, baina bigarrenean ez du huts egin. 23. minutuan, Antonio Siverak Coutoren jaurtiketa aldaratu du, baina Dovbykek aldaratzea area txikian bakarrik harrapatu, eta buruz sartu du baloia atean. Alaves aurrerapausoa ematen saiatu da Omorodionen burukada batekin, baina ez du arrisku gehiago sortzea lortu jokaldi horretatik haratago. Partida Gironaren eskuetan zen, eta intentsitate eta erritmoa jaitsi duten arren, 42.minutuan partida bideratzeko gola egin dute. Berriro Coutok hasitako jokaldia, Porturen oinetan bukatu du baloiak, eta Realeko jokalari ohiak eskuin zutoinean jarri du baloia jaurtiketa bikain batekin. Atsedenalditik berdegunera itzuli, eta partida kontrolatzen jarraitzeko borondatearekin hasi da berriro Girona. Alavesek, hala ere, gertu izan du 2 eta 1ekoa, Rafa Marinen burukada batekin eta Ander Guevararen jaurtiketa batekin. Baina Gasteizko taldearen une onenean, penaltia iritsi zaie etxekoei. Berriro Coutok egin du eraso jokaldia, eta Javi Lopezen penaltia eragin du. Gola, Dobykek berriro, ate erditik sartuta. Ostegunean pentsatuz Partida amaituta zegoen zentzu askotan, nahiz eta 30 minutu geratzen ziren. Alavesek, osteguneko Real Madrilen aurkako partidan pentsatuz, lau aldaketa egin ditu hamar minutu eskasean. Gironak ere hainbat aldaketa egin ditu minutu kargak egokitzeko. Azken minutuetan, Alaves ohorearen gola sartzen saiatu da, eta ez du urrun izan. Ruben Duartek urruneko misil batekin Gazzanigaren langan jo zuen, partidako azken jokaldi esanguratsua.

Ekaina arteko epea dute. Gero, legez kanpokoak izanen dira. Beskoitzeko herriko etxeak ikastolarekin zuen hitzarmena bertan behera uztea erabaki du. Beste hitzarmenik lortu ezean, sei hilabeteren buruan ez dute gehiago herriko lurrak erabiltzeko baimenik izanen. Hamalau hautetsik bozkatu dute Fabienne Ayensa auzapezak proposatutako deliberoaren alde; lauk kontra. Arrapaladan, dimisioa aurkeztu du Anne Marie Jocou hautetsiak. «Ez ditugu herriaren aitzinean hartutako engaiamenduak bete, ez dut gehiago egiteko manera hau onartzen ahal», erran du hunkitua. «Herritarrei gezurra erran diogu, gehiegi da niretzat. Herriarentzat lan egiteko engaiatu nintzen. Etsitua naiz». Herriko etxe aitzinean bildu dira gurasoak, zurbil, haserre, harriturik. «Ikastola ehorztea erabaki dute», salatu du Julen Jauregik. «Duela hilabete bat bitartekaritza bat eskatu genuelarik erantzun zuten alde zirela. Gaur deliberatu dute gure ikastola hil nahi dutela, ez da beste hitzik». Lur kontratua bertan behera utzita, uztailean ikastola itxi beharko dutela erran du. «Afrusa da», mindu da Cyril Fesquinne, «haurrak dira ikastolan». Haserre mintzatu da Clemence Labrouche: «Hartu duten erabakiarekin hautatu dute 50 haur kanporatzea. Eskola bat itxi dute. Non ikusten da halakorik?». Fesquinne: «Zerbait atzeman beharko dugu, eta laster. Epea eman digute: sei hilabete ditugu zerbait atzemateko» Pilota ikastolari Beskoitzeko ikastola 2013an sortu zen, prefetaren debeku mehatxuen pean; orduan, lau ikasle zituen. Urteen poderioz, garatuz joan da, eta 51 ikasle ditu orain. Eraikin prefabrikatuetan egiten dituzte ama eskolatik azken urterainoko eskolak, herriko etxeari alokatu eremu batean. Azken urteetan gorabehera bat baino gehiago izan dituzte, Fabienne Aiensa auzapezaren taldeak ikasle kopurua mugatu nahi duelako. Hala, urtarrilean, hiru urteko haur bati ukatu egin zioten bere ikaskideekin jatea eskola guztiek erabiltzen duten herriko jantegian. Baina ikastola egonkortzeko Seaskak egin gogo duen eraikinarekin sortu da gatazka handiena. Eraikitzeko baimena galdegin du Seaskak, baina baldintza teknikoak aipatzen dituzte etengabe ezezkoa emateko; baldintza «arbitrarioak». herriko etxeak eskatzen diena beteko balute, gaur egun duten eremu txikian sartu beharko lituzkete ikasgela, jantokia, kanpoko eremua eta aparkalekua. Ezinezkoa dela errepikatu dute behin baino gehiagotan. Haurren duintasuna aldarrikatuta, bosgarren prefabrikatu bat gehitu dute ikastolak erabiltzen duen eremuan, ikasleek nahikoa espazio izan dezaten. Hori da hain zuzen herriko etxeak hitzarmena bertan behera uzteko erabili duen argudioa. Ikastolari egotzi dio ardura guzia Ayensa auzapezak, eta erran eraikuntza baimen desegokia aurkeztu dutela: «nahi badute baimen eskaerari eman diogun ezezkoa errekurritu dezakete», baieztatu du. «Segurtasun arazoak» aipatu ditu beste hautetsi batek: ikastola inguruan «zirkulazio handia» dela, eta «arriskutsua» dela haurrentzat. Auzoentzat «desegokia» dela ere erran du. «Inork ez du nahi sei metroko eraiki bat bere etxe aitzinean», gaineratu du Ayensak. Baina denek azpimarratu dute ez dutela arazorik ikastolarekin eta euskararekin. Elkarrizketa ezinezkoa Badu bi urte Beskoitzeko ikastolako gurasoak herriko etxearekin adostasunetara iritsi nahian ari direla, alferrik. Pirinio Atlantikoetako prefetari bitartekaritza lanak egiteko eskatu zioten urrian, eta hau prest agertu zen «elkarrizketa bideratzeko», lehentasuna «haurren interesa» zela azpimarratuta. Baina prentsaren aitzinean egindako adierazpenez harago, bilkura bat antolatzeari uko egin ziola deituratu zuen Seaskak orain dela aste batzuk. Herriko etxearekin zuten blokeoa manifestazio nazionala egin zuten azaroaren 18an: 2.500 pertsonak agertu zieten babesa ikastolako gurasoei. Azaro bukaeran eman zuen berri ona Seaskak, 2024ko Herri Urratsen aurkezpenean: Jean Rene Etxegarai Euskal Hirigune Elkargoko lehendakaria prest zen bitartekaritza lanak egiteko, Patrick Elizagoien auzapezordeak ontzat emana zuen. Baina azken asteetan ez da bilkurarik antolatu. Hautetsi batek baino gehiagok deitoratu du elkarrizketa onartu ondotik halako erabakia hartzea. «Baionako auzapezaren bitartekaritzak ez du ezer eman», trenkatu du Ayensak. Azken hilabeteetan kargutik aparte egon da, osasun arazoengatik: «geldialditik atera naiz, erabaki hau asumitzeko».

Haserrea eta ezinegona eragin dute Gernika-Lumon (Bizkaia) neska batek, artean adin txikikoa zelarik, 1998tik 2001era pairatutako sexu abusuei buruzko informazioek. Herriko taberna eta plazetan horixe izan da gaur hizpide nagusia. Neskak salatutako erasoen arbuioarekin batera, Lointek Gernika saskibaloi taldeko zuzendaritzak afera honetan izandako jarrerari buruzko kritikak ere nagusitu dira gernikarren artean. Hain zuzen, Gernika-Lumoko Sare Feministak manifestaziora deitu du iluntzean, eta «erasotzailearen inpunitatea» mahai gainean jarri dute. Protesta hasi baino lehen, mezu irmoa bota du Arlette Apraiz Sare Feministako kideak: «Gaur kalera atera gara inpunitatea eta konplizitatea salatzeko: inpunitatea, erasotzaileak 20 urtez izandakoa, eta konplizitatea, kirol taldeak erakutsi duena». Adingabe bati hainbat urtez sexu abusuak egiteagatik ikertzen ari dira Mario Lopez, 11 urtez Lointek Gernikako entrenatzaile izan zena. Klubean ardura postuak zituen oraindik, eta taldeko kirol arduraduna izan da atzo kargugabetu zuten arte. Klubaren hitzetan, prestatzaile kargua osasun arazoengatik utzi zuen, iaz. El País egunkariak argitaratu duenaren arabera, egozten diote 1998. urtean 13 urte zituen neska bati sexu abusuak egitea hiru urtez. Instrukzio epailearen erabakiaren zain dago. Klubak esan du igandera arte ez zuela ezagutzen erasoaren «edukia eta neurria», baina mugimendu feministak argi esan du berak jakinarazi ziola, beraz bazekitela. Sarearen eta klubaren bertsioa ez datoz bat. Feministek atzo argitaratutako oharrean azaldu zutenez, uda hasieran izan zuten kasuaren berri, eta informazioa jaso bezain pronto hartu zuten lehen erabakia: biktimari sinestea. Udan zenbait «bilera eta dei» izan zituzten Lointek Gernikako zuzendaritzarekin, «egoerari irtenbide bat emateko asmoz». Klubak, ordea, sareari azaldu zion zailtasunak izango zituela maila horretako entrenatzaile bat ordezkatzeko, «kontuan izan gabe maila hori bi hamarkadatan baino gehiagotan izandako inpunitateak ahalbidetu diola». Azkenean, feministei helarazi zieten ezen zuzendaritza, babesleak eta jokalariak ados zeudela Lopez entrenatzaile izatearekin, eta hori egingo zutela. Sareak, orduan, adierazi zien ez zegoela konforme erabakiarekin, eta erabaki zuen akordio bat egiteko prozesua amaitzea. «Gure hitza, irizpidea edota pertzepzioa zalantzan jartzen dutenen aurrean, guk sinesten zaitugu». GERNIKAKO SARE FEMINISTA Gaurko manifestazioa amaitu eta denbora gutxira atera du oharra Lointek Gernikak, eta berriz ere ukatu du ez duela salaketaren berririk izan orain arte. Hiru bider idatzi dute oharrean: «Inoiz ez, inoiz ez, inoiz ez; ez dugu jakin salaketa zela adingabe bati hainbat urtez sexu abusuak egiteagatik». Taldeak berretsi du kargutik kendu dutela Lopez, eta barkamena eskatu du gaiaren kudeaketan egindako akatsengatik. Akats horiek gaiaren inguruko informazioa faltari egotzi dizkio. Edozein esparrutan emandako erasoak gaitzetsi ditu klubak, eta adierazi du neurriak hartuko dituztela haurrak eta nerabeak babesteko sistemak indartzeko. Hurrengo egunetan, bilera ezohikora deituko dute, «beharrezkoak diren azalpenak» emateko. Milaka herritar 3000 lagun bildu ziren gaur Gernikako Pasealekuan. Lointek Gernikako jokalari batzuk protestara hurbildu dira, baita Lucas Fernandez egungo entrenatzailea ere. Txalo artean abiatu dute manifestazioa, Guk sinisten zaitzugu lelopean. Eta saskibaloi taldeak erabili ohi duen Maloste kiroldegira arteko bidea oihu artean egin dute: Erasorik ez erantzunik gabe, edota Lointek hartu zure ardurak izan dira herrian ozen gailendutako oihuetako batzuk. Amaieran, oharra irakurri dute feministek. «Guk sinesten zaitugu», nabarmendu dute. «Indarkeria mota guztien aurrean, erasoei garrantzia kendu edo atxikitzeko saiakeren aurrean, gure hitza, irizpidea edota pertzepzioa zalantzan jartzen dutenen aurrean, guk sinesten zaitugu». Kirol taldeko zuzendaritzak erakutsitako konplizitatea ere salatu dute. «Eraso berrien prebentzioa eta biktimari zor zaion erreparazio maldan gora jartzen ditu». Eta klubaren hipokrisia kritikatu dute: «Harritzekoa da, tankera horretako erabakiak hartu ostean, klubak azaroaren 25aren harira egin duen kanpaina publikoa». Lopez prestigiozko kargu batetik bestera mugitu izana gaitzetsi dute, eta Lointek Gernikak sarearekin izandako «jarrera maltzurra» azaleratu ere bai, eurekin gezurretan ibili direlako. Izan ere, esan dute Lopezek klubean jarraitzeko ustezko adostasuna ez zela benetakoa: «Gaur badakigu adostasun hori ez zela existitu, eta, gainera, kide batzuek taldea uztea ekarri duela». Eraso matxisten aurrean «autodefentsa feminista» beharrezkotzat jo dute manifestazioan; hori baita «bide bakarra». Nabarmendu dute «isiltasuna» eta «inpunitatea» bukatu behar direla, «emakumeenganako indarkeriaren katea» eteteko. «Instituzioak erakusten ari diren arduragabekeriaren aurrean, emakumeoi antolatzea, elkar defendatzea eta erantzutea dagokigu». Emakumeena ez ezik, gizonen ardura ere bada eraso matxistek duten konplizitatea bukatzea: «Lagun edo senide izan edo ez, erasotzaile bat erasotzaile bat delako, Gernikan eta edonon». «Inoiz ez, inoiz ez, inoiz ez; ez dugu jakin salaketa zela hainbat urtez adingabe bati sexu abusuak egiteagatik».LOINTEK GERNIKA Gernikako Allende Salazar ikastetxeko eskola komunitateak ere elkarretaratzea egin du gaur, eta gaitzetsi egin ditu «umeen kontrako edozein eraso, eta erasotzaileak babesten dituztenak». Adingabea zelarik Lopezek hiru urtez sexu abusuak egin zizkiola salatu duen neska ikastetxe hartako ikaslea izandakoa da, eta horregatik egin dute elkarretaratzea ikastetxeko atarian. Are, Lopezek garai hartan entrenatzen zuen saskibaloi taldeko kidea zen emakumea, lehenik Allende Salazar ikastetxean eta geroago Lointek Gernikan. Erasoak hasi zirenean, erasotzaileak 31 urte zituen, neskak baino 18 gehiago. Iazko ekainean Gernikako (Bizkaia) epaitegiak jasotako salaketaren arabera, sexu abusuak jasan zituen, eta etengabeak izan ziren mehatxuak eta bere gaineko kontrola ere. Lehen erasoa 1998ko uztailean gertatu zen, Lopezek biktima saskibaloi partida bat ikustera gonbidatu eta bularrean eskua sartu zionean. Hortik aurrera, jarraituak izan ziren abusuak. Salaketak dio bortxatu egin zuela, eta felazioak egitera behartu. Haurren kontrako erasorik ez leloa idatzita zeukan pankarta baten azpian elkartu dira ikastetxeko ikasle, irakasle eta gurasoak. Aritz Zearra zuzendariak, Borja Agirre ikasketa buruak eta Nahia Idoiaga eta Naia Odriozola Guraso Elkarteko kideek irakurri dute agiria. Elkartasuna adierazi diote salaketa egin duen ikasle ohiari, eta edozein eraso, eta bereziki sexu abusuak, jasan dituzten guztiei. «Gure helburua da haurrak babestea, bereziki zaurgarrienak», azaldu dute. Halaber, bat egin dute Gernikan egitekoak diren gainerako mobilizazioekin, bereziki Sare Feministak antolatutakoekin. Txalo zaparrada batez amaitu dute ekitaldia. Federazioen gaitzespena Gernikatik kanpo ere harrabotsa sortu du auziak. Euskal zein Bizkaiko Federazioek kirol esparruan gertatzen diren sexu erasoak gaitzetsi dituzte, eta horiek pairatu dituzten pertsonei babesa helarazi diete. Bizkaiko Federazioak adierazi du horrelako gertakariak «onartezinak» direla, eta «defendatzen» dituzten «balioen aurkakoak». Euskal Selekzioak «mezu argia eta irmoa» bidali du, eta Espainiako Saskibaloi Federazioak igorritako oharra babestu du. Azken horrek «aringarririk gabe» gaitzetsi ditu erasoak. Plazaratu duen oharrak dioenez, «kasuaren parte bat» urriaren 29an jakin zuen, Gernikaren aurkako salaketa bat jaso zuenean. Federazioak berehala zabaldu zuen ikerketa txosten bat, eta hala jakinarazi zien Gernikari, Lopezi eta Araba, Bizkai eta Gipuzkoako Saskibaloi Federazioari. Ordutik, lehiaketetan parte hartzea debekatua izan du Lopezek. Izan ere, Euskal Selekzioak adierazi du azaroaren 3an jakin zuela Espainiako Saskibaloi Federazioak espedientea ireki ziola Gernika KESBri.

ELAk eta LABek mobilizazioak deitu dituzte Nafarroako ehungintza sektorean, abenduaren 23 eta 24rako. Bi orduko lanuzteak egingo dituzte abenduaren 23an, eta greba deitu dute hurrengo egunerako, hilaren 24rako. Negoziazio mahaia eratzea eta Nafarroan hitzarmen duin bat adostea dituzte aldarrikapen.

Tapiak “guztiz egingarritzat” jo du klima aldaketaren legea otsailerako onartzea. Urteroko aurrekontuaren % 2,5 klima gaietara bideratzeko EH Bilduk egindako proposamenaz mintzo, aurreratu du zuzenketa aztertuko dutela, baina ez zaiola arazo bat iruditzen “zenbaki bat jartzea”.

Urriaren 25eko geldialdiaren ondoren, langile publikoak kalera aterako dira berriro, Eusko Jaurlaritzari, aldundiei eta udalei lan-baldintza hobeak eta zerbitzuen kalitatea eskatzeko.

Golik ez da izan gaur Anoetan, baina ikuskizun ederra eman dute Realak eta Betisek. Neurketa irekia jokatu dute bi taldeek, ausartak izan dira bien proposamenak, eta gol aukerak ugariak izan dira bi aldeetan. Realari hiru gol baliogabetu dizkiote eta Zubimendik zutoinera bidali du jaurtiketa bat, baina Betisek ere behartu du Remiro lan egitera. Azkenean, ordea, ez du inork asmatu. Realaren hamaikakoan Andre Silva izan da berrikuntza nagusia. Portugaldarrak neurketa ona jokatu du, eta erakutsi du zertarako gai den. Aurrelari petoa da; bi gol sartu ditu, baina jokoz kanpo zegoen bietan. Gainontzean, hegaletatik egin dute min txuri-urdinek. Traore eta Tierney etengabe ibili dira gora eta behera, eta Kubok ere sortu du arriskua. Lehen zatian, bisitariem aukerarik argiena Ayozek izan du, baina zutoinean jo du haren jaurtiketak. Zoragarria izan da Iscok egin dion pasea. Bigarren zatian beste gol bat baloigabetu diote Realari, kasu horretan Umar Sadiqi, eta Oiartzabalek zutoinera bidali du falta jaurtiketa bat. Gola gertu ikusten zuten zaleek, baina Betisena ere ez zen urruti; Assane Diaoren abiadura baliatu dute min egiteko. Sailkapen nagusian seigarren postuan da Reala 30 punturekin. Partidaren aurretik, Aitor Zabaletaren hilketaren urteurrenaren inguruko zenbait ekitaldi egin ditu Realak, eta haren oroimenezko mosaiko bat ere marraztu dute zaleek harmailetan.

Pello Otxandianok koaliziokideen babesa jaso du gaur Bilbon. Lehendakarigai izateko proposatu zutenetik egin duen lehen agerraldi publikoa izan da, eta Euskalduna Jauregiko oholtzan nabarmendu du koalizioak, batuta, gauza handiak egin ditzakeela: «Guk ez dugu sigla bat ordezkatzen, gu herri proiektu batekin konprometitu garen komunitate bat gara». «Gure momentua da», laburbildu du. Dena den, EH Bilduk etorkizuna gara lemapean egin duen ekitaldian hitzek bezainbesteko garrantzia izan du irudiak. Hasteko, argi utzi nahi izan dutelako Otxandianok koalizioko buruen babesa duela: Nerea Kortajarenak, Laura Aznalek, Eva Blancok, Mikel Oterok, Oihana Etxebarrietak, Iker Casanovak, Larraitz Ugartek, Garikoitz Mujikak eta Eva López de Arroyabek lagunduta iritsi da aretora, eta eskerrak eman dizkie beregan jarritako konfiantzagatik. «Nik nire bertsiorik onena ematen saiatuko naizela baino ezin dut agindu, pasioz jardungo naizela, eta esperantza dudala. Etorkizunari baikor begiratzeko motiboak dauzkagula uste dut», adierazi du. EH Bilduko buruak, gaur, Bilboko Euskalduna Jauregian. ARITZ LOIOLA / FOKU Otxandianoz gain, hitza hartu dute Maddalen Iriartek, Bakartxo Ruizek eta Arnaldo Otegik. Koalizioko koordinatzaile nagusiak eman du hitzaldi nagusia, eta egiten ari diren lana goraipatu du: «Etorkizunak proiektuak ditu, balioak ditu, printzipioak ditu. Euskal Herriaren etorkizuna EH Bilduren hizkiekin idazten da. Espero zenuten etorkizuna zuek zarete». Azaldu du «arrakastaren sekretua balioetan» dagoela, EH Bildu «batzen duen ezkerra» dela, eta ezker subiranistaren nahia eta borondatea dela proiektuan jende eta sektore gehiago biltzea. «Balio eta printzipio horiek guztiek herri honetako lehen indarra izatera eraman gaituzte», azpimarratu du. «Ezin da Euskal Herria ulertu zuek gabe. Ezin da Euskal Herriaren etorkizuna eraiki zuek gabe. Ezin da Iruñea ulertu Joseba Asiron gabe». Lanean jarraitzeko deia egin die koaliziokideei. Ekitaldian zehar, oholtzara igo dira Joseba Sarrionaindia idazlea eta David Fernandez kazetari eta politikari kataluniarra ere.

Adingabe bati hainbat urtez sexu abusuak egiteagatik ikertzen ari dira Mario Lopez, 11 urtez Lointek Gernikako entrenatzaile izan zena. Klubean ardura postuak izaten jarraitzen zuen, eta taldeko kirol arduraduna izan da gaur kargugabetu duten arte. Klubaren hitzetan, prestatzaile kargua osasun arazoengatik utzi zuen iaz. El País egunkariak argitaratu duenaren arabera, egozten diote 1998. urtean 13 urte zituen neska bati sexu abusuak egitea hiru urtez. Instrukzio epailearen erabakiaren zain dago. Biktima Lopezek garai hartan entrenatzen zuen saskibaloi taldeko kidea zen, lehenik Allende Salazar ikastetxean eta geroago Lointek Gernikan. Erasoak hasi zirenean erasotzaileak 31 urte zituen, neskak baino 18 gehiago. Iazko ekainean Gernikako (Bizkaia) epaitegiak jasotako salaketaren arabera, sexu abusuak jasan zituen, eta etengabeak izan ziren mehatxuak eta bere gaineko kontrola ere. Lehen erasoa 1998ko uztailean gertatu zen, Lopezek biktima saskibaloi partida bat ikustera gonbidatu eta bularrean eskua sartu zionean. Hortik aurrera, jarraituak izan ziren abusuak. Salaketak dio bortxatu egin zuela, eta felazioak egitera behartu. Espainiako Saskibaloi Federazioak «aringarririk gabe» gaitzetsi ditu erasoak. Plazaratu duen oharrak dioenez, «kasuaren zati bat» urriaren 29an jakin zuen, Gernikaren aurkako salaketa bat jaso zuenean. Hark zioenaren arabera, Lopez ikertua izaten ari zen ustezko sexu abusu batzuengatik. Federazioak berehala zabaldu zuen ikerketa txosten bat, eta hala jakinarazi zien Gernikari, Lopezi eta Araba, Bizkai eta Gipuzkoako Saskibaloi Federazioari. Ordutik, lehiaketetan parte hartzea debekatuta izan du Lopezek. Gernika KESBk ere eman du bere bertsioa. Adierazi duenez, gaur izan du Espainiako Federazioaren ebazpenaren berri, eta hori da gertatutakoaren inguruan izan duen lehen albistea. «Orain arte, klubak ez du izan ikerketaren berri ofizialki. Orain, klubari gertakarien berri eman dion eragile bakarra Espainiako Federazioa da: hark ebazpen bat argitaratu berri du, eta Gernikak berehala onartu du». Gehitu du taldeak uneoro errespetatu duela indarrean den legedia, eta gisa horretako kasuen aurrean bete beharreko protokoloak betetzen dituela. Lopezengandik «bereizi» direla esanez amaitu dute oharra. Feministak, kalera Gernika-Lumoko Sare Feministak mobilizaziora deitu du biharko, 19:00etan Gernikako pasealekutik. Izan ere, sarearen eta klubaren bertsioa ez datoz bat. Argitaratu duten oharrean azaldu dutenez, uda hasieran izan zuten kasuaren berri eta informazioa jaso bezain pronto hartu zuten lehen erabakia: biktimari sinestea. Abisua jaso zutenean, Lopez umeen kanpus bateko arduraduna zen, eta, zuten informazioaren arabera, 2023-2024 denboraldian Lointek Gernikako lehen taldeko prestatzaile izendatzeko asmoa zuten. Horren aurrean, klubarekin kontaktuan jarri ziren eta beharrezko neurriak eskatu zizkioten. «Eraso berrien prebentzioa eta erasotuaren prozesua ipar, erasotzailea prestigio postutik kentzeko neurriak hartzea izan zen taldeari eskatu geniona». Azalpenekin jarraitu dute. Udan zehar «bilera eta dei ezberdinak» izan zituzten Lointek Gernikako zuzendaritzarekin «egoerari irtenbide bat emateko asmoz». Klubak, ordea, maila horretako entrenatzaile bat ordezkatzeko zailtasunak izango zituela azaldu zion sareari, «kontutan izan gabe maila hori bi hamarkada baino gehiagotan izandako inpunitateak ahalbidetu diola». Azkenean, zuzendaritzaren, babesleen zein jokalarien partetik Lopez entrenatzaile izatearen aldeko adostasuna zegoela eta hori egingo zutela helarazi zieten feministei. Sareak, erabakiarekin desadostasuna adierazi eta akordio batera heltzeko prozesuarekin amaitzea erabaki zuen. Klubaren hipokrisia salatu dute: «Harritzekoa da, tankera horretako erabakiak hartu ostean, klubak azaroaren 25aren harira egin duen kanpaina publikoa». Lopez prestigiozko kargu batetik bestera mugitu izana gaitzetsi dute, eta Lointek Gernikak Sarearekin izandako «jarrera maltzurra» azaleratu ere bai, eurekin gezurretan ibili zirelako. Izan ere, Lopezek klubean jarraitzeko ustezko adostasuna ez zela benetakoa esan dute: «Gaur badakigu adostasun hori ez zela existitu izan, eta, gainera, kide ezberdinek taldea uztea ekarri duela». Onartezina Allende Salazar herri eskolak ere plazaratu du ohar bat gaiaren inguruan. Bertan, barkamena eskatu die euren komunitateko parte izan diren bitartean abusuak jasan dituztenei, bereziki Lopezen biktimari: «Ez genuen jakin behar bezala detektatzen eta behar zuen babesa ematen». Gertatutakoa irmoki gaitzetsi dute, horrelako kasuak berriro ez gertatzeko protokoloak martxan dituztela aipatu dute eta bihar egingo diren elkarretaratzeekin bat egiten dutela adierazi. Eskolan ere egingo da bat, 16:00etan.

Amazonen Trapagarango biltegiko langileek greba abiatuko dute gaur lan-hitzarmen propioaren alde. ELAk eta LABek, protestaren antolatzaileek, azaldu dute ostiralean enpresako zuzendaritzarekin batzartu zirela, baina ez zutela lortu gatazkari irtenbidea ematea.