Euroguneko urte arteko inflazioa % 6,9ra jaitsi da martxoan eta azpiko inflazioa % 5,7raino igo da. Europar Batasuneko inflazioa % 8,3raino jaitsi da martxoan. Gauzak horrela, azken lau hilabeteetako beheranzko joerari eutsi dio.

Albiste, gaur, apirilak 19: Eztabaida Sozialerako Mahaia, Justiziako funtzionarioen greba eta lehortearen mahaiaren bilera

Baikortasun zantzuak ikusten ditu berriro Euskaltelek, eta, azken urteetan komunikazio zerbitzuengatik izandako diru sarreren jaitsieraren ostean, hasi da joera aldaketa sumatzen. Iazko azken hilabeteetan hasi zuen goranzko bidea, eta aurtengoaren hasieran areagotu egin da: «Oso zuhurrak gara, baina aurtengo lehen hiruhilekoa 2014tik, ni hemen sartu nintzenetik, ezagutu dudan onena izan da», onartu zuen atzo Jon Ander de las Fuentes enpresako zuzendari nagusiak, iazko balantzea plazaratzean. Era berean, nabarmendu zuen garai hobeak ezagutu dituela, baina sektorean «izugarri» handitu dela lehiakortasuna, eta Masmovilek Euskaltel xurgatu izanak «egonkortasuna» eman diola etxeari.

Euskaltelek 670 milioi euroren diru sarrerak izan zituen iaz, eta zerbitzuen negozio bolumena 630 eurokoa izan zen. Azken kopuru hori 2021ekoa baino %3 txikiagoa da. EBITDA —interes, zerga, balio galera eta amortizazioen aurreko irabaziak—, berriz, 321 milioi eurokoa izan zen, %4 handiagoa. Eta nola da posible hori? De las Fuentesek azaldu zuen: «Hainbat kostu operatibo murriztu ditugulako». Eta errentagarritasunak zer bilakaera izan zuen? «Masmovil taldeak %2ko igoera onartu zuen bere balantzean, eta gurea antzekoa da. Pixka bat positiboa». Datu horietatik kanpo gelditzen dira Euskaltelek bere zuntz optikoko sarea saltzeagatik lorturiko diru sarrerak.

Bezero kopurua handitu izana dago baikortasun zantzuen oinarrian, zuzendariaren arabera, «inoizko kopururik handiena delako». Masmovil taldeak (Euskaltel, Guuk, Masmovil…) 1,3 milioi bezero ditu Hego Euskal Herrian, 900.000 telefonia mugikorrean eta 400.000 banda zabalean, eta horien %80 Euskaltelenak dira. Bada, iaz, bi zerbitzuetako bezeroen kopurua handitu zen: telefonia mugikorrekoena %6, eta banda zabalekoena %5. Masmovilek 47.000 linea mugikor berri saldu zituen, horietatik 35.000 Euskaltelenak, eta 17.000 banda zabaleko zerbitzu, horietatik 14.000 marka laranjakoak.

Euskalteleko arduraduna, dena den, zintzoa izan zen: «Ezagutu izan ditut garai hobeak. Garai bateko zenbatekoekin alderatuta, diru sarrerak 50 milioi euro txikiagoak dira egun, eta EBITDA 40 milioi euro txikiagoa». De las Fuentes Euskaltelen finantza buru izan zen 2014 eta 2020 artean. Ondoren, Guuken hasi zen, eta Masmovilen bidez itzuli da Euskaltelera. Esperientzia horretan oinarrituta, azaldu zuen prezio lehiarengatik errentagarritasuna asko murriztu dela sektorean, eta bezero bakoitzaren fakturazioa %30 inguru jaitsi dela 2012tik. «Eskaintza oso merkeen garaian bizi gara», laburbildu zuen.

Masmovilen inbertsioa

Horren aldean, haren ustez azken hilabeteetako joera aldaketa eragin duten arrazoiak eman zituen: «Ezinbestean egin behar zuen hobera. Bezero oinarri handiagoa dugu, eta balio handiagoko produktua saltzen ari gara. %80ek pakete osoa erosten dute: sakelakoa, banda zabala, telebista…». Fideltasuna ere aipatu zuen, eta nabarmendu %17 murriztu dutela zerbitzua uzten duten bezeroen kopurua. «Horretarako, eskaintza sinplifikatu dugu, jendea beherapenekin-eta erotu gabe. Ezin da onartu aspaldiko bezeroek sentitzea berriei baino tratu okerragoa ematen zaiela». Zerbitzu hobekuntza ere aipatu zuen, eta, haien datuen arabera, erreklamazio kopurua %48,5 jaitsi zen iaz.

Masmovilek 2021eko abuztuan bereganatu zuen Euskaltel —akzioen %96 erosi zituen—, eta, geroztik, Hegoaldean eginiko inbertsioak goratu zituen: «Integrazio eredu ezin hobea izan da». Haren arabera, 150 milioi euro inbertitu dituzte sarean (5G zabaldu, gailuak hobetu…), eta beste 100 milioi jarriko dituzte aurten. Masmovilek marka ugari ditu barnean, eta De la Fuentesek onartu du harrituta dagoela ikusita estrategia horrek ez duela kalte egiten. Aldi berean, zehaztu zuen Euskaltelek 300 langile dituela Hegoaldean, eta beste 3.000 «zeharka» kontratatzen dituela.

Bezeroetan gora egin ostean, emaitza positiboetara itzultzea espero du Euskaltelek. Telekomunikazio-enpresak 14.000 bezero gehiago lortu zituen iaz banda zabalean eta 35.000 mugikorretan, hau da, % 5 eta % 6 inguruko igoerak, hurrenez hurren.

Dena ondo bidean ostiral honetan sinatuko da 2026ra arte indarrean egongo litzatekeen hitzarmen kolektibo berria. Besteak beste, KPIaren araberako soldata-igoerak eta lanaldi luzeak geldiarazten duten neurriak jasotzen ditu.

Eusko Jaurlaritzak ez du helegiterik aurkeztuko Arabako Mahastiak sor-marka bertan behera uzteko erabakiaren kontra.

Gobernu Kontseiluak onartu du Lanbidek 15,3 milioi eurora arte zabaltzea enplegua mantentzeko konpromisoa duten mikroenpresentzako laguntzak (Gobernu Bilera 2023-4-18)

Erretreten erreforma gainditu eta ondoko fasera pasatu nahi du Emmanuel Macron Frantziako presidenteak. Helburu horrekin egin zuen, atzo arratsean, telebistako mintzaldia, azken hilabeteetako mugimendu soziala baretu eta ondoko hilabeteetarako Frantziako Gobernuaren norabidea azaltzeko asmoz. Herritarren «haserrea» entzun duela erran bazuen ere, ez zuen zalantzan eman erretreten erreforma, eta aitzina begirako mezua zabaldu nahi izan zuen. Ordu hartan bertan, ehunka protesta antolatu zituzten Frantziako Estatu guzian zehar, kazolak eskuan presidentearen ahotsari gaina hartzeko.

Parlamentuko bozka saihestu eta indarrez onartua izan ondotik, ostegunean eman zuen erreforma ontzat Frantziako Konstituzio Kontseiluak, eta biharamunerako promulgatu zuen Macronek. Atzoko telebista agerraldian, ezinbesteko neurria zela berretsi zuen: «Pentsioak bermatzeko eta aberastasun handiagoa sortzeko». Presidentearen hitzetan, ez zegoen «beste aukerarik», baina erreformak herritarrei «indar» bat eskatzen badie ere, bere baitan neurri aringarriak ere badirela erran zuen.

Halaber, Macronek aitortu zuen erreforma ez dela «onartua» izan, eta aintzat hartu zuen adierazi den «haserrea»; baina «zatiketen gainetik» aitzina egitea eta «batasunari» eustea aldarrikatu zuen.

Hiru lan sail

Ondoko hilabeteetarako hiru lan sail finkatu ditu Frantziako presidenteak. Lanarena lehenik: langabeziaren aitzinean emaitza onak lortu dituztela erran zuen: «1,7 milioi enplegu sortu ditugu azken sei urteetan». Lizeo profesionalaren erreforma, eta gutxieneko errentan direnak lanera eramateko neurriak ere aipatu zituen.

Patronalarekin bilkura eginen du gaur, gai horiek aipatzeko; sindikatuak ere gomitatu zituen, baina erreforma bertan behera uztea jarri dute baldintza gisa edozein elkarrizketa abiatzeko. Maiatzaren 1ean eginen du ondoko mobilizazioa intersindikalak. Sindikatu batzuek lehenago ere eginen dituzte protestak. «Atea beti irekia izanen da», adierazi zien Macronek sindikatuei atzo arratsean.

Justizia eta ordena demokratikoa ere jarri zituen helburu Frantziako presidenteak: 10.000 agente eta magistratu kontratatuko dituzte, eta berrehun jendarmeria unitate irekitzen ari dira landa eremuetan. Legez kanpoko immigrazioaren kontra segitzeko asmoa ere erakutsi zuen.

Hezkuntza eta osasuna ere aipatu zituen azkenik. «Batasuna» lehenetsi zuen estatuburuak: «Elkarrekin, epidemiari eta krisi bati baino gehiagori aurre egin diegu. Aldi bakoitzean, elkarlana helburu, nazioaren interesak lehenetsita». Bide beretik jo behar dutela erran zuen. «Lege eta burokrazia gutxiago, eta askatasun eta ekintza gehiago», aldarrikatu zuen. Hemendik ehun egunera eginen du, uztailaren 14an, norabide berriaren lehen balorazioa.

LABek “oinarria” ikusten du Hezkuntza Sailarekin akordioa ixteko, ELAk grebei eusten dien bitartean

Justiziako funtzionarioek greba mugagabea hasi dute, soldata hobekuntzak aldarrikatzeko. Euskal Justizia Administrazioko langileek hiru orduko geldialdia egingo dute egunero goizez, 10:00etatik 13:00etara. Bi deialdiren barruan egingo dituzte lanuzteak, bata estatu mailakoa eta bestea tokikoa.