Tapia Siemens Energyren arduradunekin bilduko da ostiral honetan, Alemanian. Ekonomia Garapenerako sailburua Christian Bruch Siemens Energy konpainiako zuzendariarekin bilduko da.

Bisita Mercedes-Benzi, Lehendakariak malgutasuna barneratzeko deia egin du Alemanian. Iñigo Urkullu lehendakariak Mercedes-Benzekin lankidetza eta elkarrizketarako konpromisoa berritu du Stuttgarten (Alemania) egindako bilera batean.

ELA, CIM eta UGT sindikatuek deitutako lanuzteen hirugarren astea da. Metro Bilbaok prentsa ohar batean adierazi duenez, Eusko Jaurlaritzak % 30eko gutxieneko zerbitzua ezarri du.

Mercedesen Gasteizko lantegian gaur ere ez da protesta bateraturik egingo, langile batzordearen gehiengoak erabaki baitu ez babestea gaurko iragarri zuten greba deialdia. UGTk, CCOOk, Ekintzak eta PIMek «aurrerapauso batzuk» ikusi dituzte zuzendaritzak egin dizkien proposamenetan, eta, ondorioz, erabaki dute negoziazioei «aukera bat» ematea eta mobilizazioak behin-behinean etetea. Aldiz, proposamenarekin kritiko azaldu dira ELA, LAB eta ESK, eta, gaurko ez ezik, biharko eta etziko lanuzteei ere eustea erabaki dute.

Mahaiaren bueltan eseri ziren atzo berriz Mercedesen Gasteizko lantegiko zuzendaritza eta langileen ordezkariak, atzo. Ekaineko lanuzte jendetsuak hasi zituztenetik etenda eduki dituzte lan hitzarmena adosteko negoziazioak, eta atzo berrekin zieten elkarrizketei. Akordioa oraindik urrun badago ere, jarrerak hurbiltzeko balio izan zuen bilerak, zuzendaritzak lan gatazkaren korapilo nagusien inguruko proposamena egin baitzien sindikatuei: soldata igoeraren eta lan malgutasunaren ingurukoa.

Zehazki, proposatu die langileen soldata %5 igotzea aurten, eta beste %2 handitzea 2023. eta 2026. urteen artean, hau da, lan hitzarmenak irauten duen bitartean. Horrez gainera, ekoizpen helburuak lortzeagatik jasotzen duten ordainsaria ere 537 eurotik 700 eurora handituko litzateke datorren urtetik aurrera. Ordainsari berri bat ere jasoko lukete urtero irailean, 750 eurokoa, aurten hasita. Eta, lan hitzarmena sinatuz gero, langileek 2.000 euroko aparteko sari bat jasoko lukete uztaileko nominarekin batera, iazko urteari dagokiona iraungita zegoen hitzarmena ordurako.

Lan malgutasunari dagokionez, ordea, zuzendaritzak ez du baztertu seigarren egunez lan egitea, nahiz eta arautzeko prest azaldu den. Hala, enpresak hilabetea hasi baino hamar egun lehenago jakinarazi beharko luke asteburuetan lan egingo duten edo ez, eta soilik «salbuespen gutxi batzuetan» baino ezingo litzateke egokitu egutegi hori. 100 euroko hobaria izango lukete langileek kasu horretan, besteak beste.

Gainera, zuzendaritza prest dago langile gehiago kontratatzeko larunbatetan, igandeetan eta jaiegunetan lan egiteko, Gasteizko lantegian urtean 190.000 furgoneta baino gehiago ekoitziko badira. Egungo langileek ere aukera izango lukete txanda horretan lan egiteko; urtean 4.500 euro gehiago eta 200 ordu gutxiagoko lanaldia izango lituzkete trukean.

Langile batzordea, zatituta

Proposamenak agerian utzi du ostera langile batzordearen zatiketa. UGTk, CCOOk, Ekintzak eta PIMek begi onez hartu dute zuzendaritzaren eskaintza, nahiz eta aitortu duten oraindik hobetu daitezkeen puntuak badaudela. «Enpresaren aurreko proposamenarekin alderatuta aurrerapauso bat egin dela uste dugu. Batetik, soldata igoera nabarmena izango delako, eta, bestetik, lan malgutasuna ere ez delako handituko, nahiz eta beste modu batean kudeatuko den», esan du Iñaki Andres UGTko ordezkariak.

Ohartarazi du, ordea, oraindik sakon aztertu behar dutela dokumentua, eta horregatik erabaki dutela mobilizazioak behin-behinean etetea. «Stand-by egoeran utziko ditugu oraingoz». Negoziazioei «aukera bat» eman nahi dietela adierazi du Andresek, eta hurrengo bilerara arte itxarongo dutela protestekin zer egin erabakitzeko. Bihar elkartuko dira berriz bi aldeak.

ELA, LAB eta ESK, aldiz, kritiko azaldu dira proposamenarekin, eta protestei eutsiko dietela iragarri dute. Izan ere, hiru sindikatuek uste dute ez dituela beren eskariak aintzat hartzen. Ohar bidez salatu dute erosteko ahalmena galtzen jarraituko dutela langileek, eta gaueko seigarren txandari eta malgutasunari bere horretan eusten zaiola. Gaitzetsi dute, halaber, asteburu eta jaiegunetako langileen lan baldintzak arautu gabe jarraitzen dutela, eta baita mugikortasunak ere. Hori dela eta, grebara deitu dituzte langileak gaur, bihar eta etzi. Gaur goizean manifestazioa egingo dute fabrikatik abiatuta, eta batzarra ere egingo dute langileei proposamenaren xehetasunen berri emateko.

Euskal Herriko Eskubide Sozialen Kartak Bilbon salatu du DSBEaren zenbatekoak ez duela “erosteko ahalmenaren galera”, eta Euskadin pertsonak duintasunez bizi ahal izateko gizarte-sistema bat nola eraiki eztabaidatzearen alde agertu dira.

Gipuzkoako ostatuetako greba bertan behera utzi dute, Sindikatuek eta patronalak soldatak KPIaren arabera igotzea adostu dute, eta lanaldiak eta ratioak murriztea.

Artxandatik Elorrietara bi pasabide, Deustu edo Txurdinagako arteria nagusien berrurbanizazioa edo Artazu Bekoan eta Masustegin igogailuak jartzea dira proiektuetako batzuk.

BERLIN. Erre usaina dario Europako motor ekonomikoari. Alemaniak ezohiko beste datu bat izan du: azken 31 urteetan lehen aldiz, defizit komertziala izan du: 1.000 milioi eurokoa maiatzean. Kanpoko salmentak %0,5 jaitsi ziren, eta inportazioak %4,4 igo. Beste era batera esanda, gehiago ordaindu behar izan dute kanpotik erositakoagatik: urtea hasi zenetik, inportatutako produktuen eta bereziki lehengaien prezioak %30 baino gehiago igo dira, eta horrek desorekatu du balantza.

Horretan nabarmen eragin dute Errusiak Ukraina inbaditu ondoan energiaren merkatuan izandako ondorioek, baita COVIDari aurre egiteko Txinako Gobernuaren neurriek hornidura kateetan sortutakoek ere. Alemaniak ekonomia industriala eta esportatzailea du. Europako herrialdeen artean, hango industriak du mendekotasunik handiena Errusiako energiarekin, eta Moskuk gasaren hornikuntza murriztu dio azken asteotan. Gainera, Errusia da Alemaniako produktuen merkatu nagusietako bat: han egindako salmentak %50 apaldu dira urtebetean.

Merkataritza datuetan alde oso handia izan da hilabete batetik bestera Alemanian: apirilean, 3.100 milioiko superabita izan zuen. Ikusteko dago kolpe horrek nolako eragina duen Europako gainerako herrialdeetan. Euroguneko maiatzeko merkataritza datuak uztailaren 15ean argitaratuko dira.

Ekaineko lanuzte jendetsuak atzean utzita, ziurgabetasuna da nagusi Gasteizko Mercedeseko langile batzordean. Atzo bildu ziren sindikatuak, uztailaren 6ko, 7ko eta 8ko deialdiei buruz eztabaidatzeko. Bi jarrera nagusitu ziren: batetik, ELAk, LABek eta ESK-k hiru egun horietan kalera irtetearen alde egin zuten; bestetik, UGTk, CCOOk, Ekintzak eta PIMek gaur arte itxarongo dute ezer erabaki aurretik.

Izan ere, Mercedeseko zuzendaritza gaur goizean eseriko da sindikatuekin. Ekainaren 17an jakinarazi zuen ez zela bilduko langile batzordearekin greba deialdiak bertan behera geratu ezean; alabaina, iritzia aldatu du, eta negoziazioekin jarraituko du. Bilkura horretan hitz egindakoak zeresana emango du aste honetan, orduan erabakiko dute-eta lanuzteekin zer egin zalantzati dauden sindikatuek. Hain zuzen, UGTk, CCOOk, Ekintzak eta PIMek.

Lehenbailehen hartu beharreko erabakia da, Igor Gebara ELAko ordezkari eta langile batzordeko presidentearen ustez: «Denbora behar da pentsatzeko. Ezin da hilaren 5ean erabaki 6an manifestazioa egitea, langileak aurretik informatu gabe».

Langile batzordeak ez daki zer asmo duen zuzendaritzak gaurko bilkurarekin. Gebarak dio bi aukera daudela: «Edo lantaldearen mezua ulertu dute eta proposamenekin datoz, edo eta ez nuke baztertuko mehatxu handiago batekin datoz». Zuzendaritzaren elkartzeko deia, baina, seinale ona da: «Negoziatzen ibili ostean beste aldeari berriro elkartzeko eskatzen badiozu, irtenbideak bilatzeko izaten da».

Sindikatuek bi deialdi bateratu egin dituzte aurretik, ekainaren 22an eta 30ean. Printzipioz, uztailaren 6an ere kalera irtetekoak ziren guztiak. ELAk, LABek eta ESK-k hilaren 7ra eta 8ra zabaldu zuten deialdia, langile batzarrean eztabaidatu ostean. Erabaki irmoa da hiru sindikatuena.

Urkullu, Alemanian

Erabakitzen dutena erabakitzen dutela, uztailaren 6a egun berezia izango da Mercedesen Gasteizko lantegiarentzat. Iñigo Urkullu Eusko Jaurlaritzako lehendakaria eta Arantxa Tapia Ekonomiaren Garapeneko sailburua autogintza multinazionaleko zuzendaritza nagusiarekin bilduko dira Stuttgarten (Alemania). Taldeak 1.200 milioi euroko inbertsioa iragarri du, lantegiko instalazioak berritzeko eta orain halako bi ekoitzi ahal izateko.

ELAk, LABek eta ESK-k deitutako grebekin bat egin ala ez erabakitzeko, zuzendaritzak asteartean zer proposatuko duen jakin arte itxarongo du batzordeak. Asteazkeneko lanuzteak bere horretan jarraituko du; egun horretan bilduko da lehendakaria Alemaniako Mercedes-Benzeko zuzendaritzarekin.