350 bat lagun bildu dira larunbat arratsaldean argindarren prezioaren igoeraren kontra deitutako manifestazioan. Talde ekologistek, sindikatuek eta beste gizarte talde batzuek deitu dute protesta, ‘Sakeoari Ez!. Energia eskubidea!’ lelopean.

TRADISNA Nafarroako Garraiolarien Elkarteak greba mugagabearekin jarraitzea erabaki du, Espainiako Gobernuko Garraio ministerioaren neurriak “ez dira nahikoa eta ez diote irtenbide errealik ematen sektoreak dituen arazoei”.

Europar Batasunak onartutako gasaren merkatzea hilabete barru sartuko da indarrean. Teresa Ribera Espainiako Gobernuko hirugarren presidenteordeak adierazi duenez, “hiruzpalau astetan” sartuko litzateke indarrean europar liderrek Espainia eta Portugalentzako adostutako salbuespena.

IRUÑEA. Nafarroako barne produktu gordina (BPG) %5,9 hazi zen 2021ean, gobernuak aurreikusitakoaren (%6,5) azpitik. Energiak garestitu izanak, hornidura kateetan izandako arazoek eta, funtsean, inflazioaren igoerak eragin zuten urte amaierako dezelerazioa. Azken hiruhilekoan moteldu zen hazkundea (%4,9), eta, aurreko urteko epe berarekin alderatuta, industria hazi zen gutxien (%1,5), eta zerbitzuen sektorea gehien (%8,7).

Iazko hazkundea ez da nahikoa izan, beraz, 2020an galdutakoa berreskuratzeko: urte horretan %8,3ko kolpea jaso zuen. Hegoaldeko beste lurraldeetan, %6,1 suspertu zen iaz Arabako BPGa, %5,7 Gipuzkoakoa, eta %5,3 Bizkaikoa. Gobernuek jakinarazi dute Ukrainako gerra dela-eta aurtengo iragarpenak berrikusiko dituztela: %5eko hazkundea aurreikusi zuten Nafarroan, eta %6,7koa EAEn.

150-200 kamioi inguru lanera itzuli eta produktu siderurgikoak Bilboko Portutik ateratzen hasi dira. Kontainerrak eramaten dituzten kamioiek, 700 bat, ordea, greban jarraitzen dute.

Europar Batasunak baimena eman die Espainiari eta Portugali ezohiko neurriak hartzeko, argindarra merkatzeko. Bi herrialdeek “tratu berezia” behar dutela aitortu dute Europar Batasuneko agintariek.

Lanuztearen deitzaileek grebari eutsiko diote Raquel Sanchez ministroarekin bildu ondoren. Errepideko Garraioaren Defentsarako Plataformak grebari eustea erabaki du Raquel Sanchez Garraio ministroarekin bildu ondoren. Hiru sindikatuak ezohiko batzar orokorrera deitu ditu bere afiliatuak igandean.

Erregaien merkatuko prezioak etenik gabe aldatzen dira, eta BERRIAren mapa interaktibo aukera ematen du ikusteko momentu bakoitzean gasolindegi bakoitzean zer preziotan saltzen ari diren erregaiak. Ordubetean behin eguneratzen dira datuak.

Erregaien prezioak zer bilakaera duen erakusten du goiko grafikoak. Ikus litezke hiru erregaik -95, 98 eta A gasolioak- batez beste zer prezio izan duten azken hilabeteetan, azken asteetan eta azken egunetan. Euskal Herriko batez bestekoez aparte, Iparraldeko eta Hegoaldeko prezioen bilakaera ere ikus liteke, alde handiak baitaude batetik bestera.

Mapan, berriz, lokalizatzeko geziek erakusten dituzte prezio altuenak eta baxuenak dituzten gasolindegiak. Gorri ilunena duten gasolindegiak dira aukeratutako erregai mota garestien saltzen ari direnak, eta laranja kolore argiena dutenek saltzen dute aukeratutako erregai hori merkeen.

Mapan bertan klikatuz gero, prezio zehatza ikusi dezake erabiltzaileak. Mapa hau eta erregaien prezioak ordu oroz eguneratzen ditu BERRIAk, Frantziako eta Espainiako gobernuek emandako datuekin. Erabiltzaileak eguneratutako prezioak eskura ditu horrela.

Maparen goiko aldean, berriz, erregai mota aukeratu liteke, botoi urdina erabilita. Defektuz, 95 edo E5 gasolina saltzen duten gasolindegi guztiak agertzen dira mapan. Beste erregai bat zer preziotan dagoen jakin nahi izanez gero, klikatu goiko botoi urdin horretan, eta erregai hori saltzen duten gasolindegiak agertuko dira mapan.

Garraiolariek deskontua izango dute beren kamioien eta furgoneten deposituak gasolioz betetzen dituztenean. Laguntza horren neurriaz ari ziren eztabaidatzen atzo garraio enpresen ordezkariak eta Espainiako Gobernua, goizean hasi eta iluntzean artean amaitu ez zen bilera batean. Litroko hogei eta 30 zentimo arteko deskontua zegoen mahaiaren gainean, Fenasdimer patronalak aurreratu zuenez. Horretatik bat aurrekontu publikotik atera behar zuen, eta bestea petrolio konpainietatik. Haien arteko batek, Repsolek, iragarri du bere kabuz hamar zentimo merkatuko diela erregaia Solred txartela erabiltzen dutenei, ekainaren amaiera arte.

Edonola ere, laguntza publiko horrek ez du berehalakoan garraioaren greba etengo, haren bultzatzaileek esan baitute protestan jarraitzeko arrazoiek bere hartan jarraitzen dutela. «Greba ez da amaituko ministroa nirekin esertzen ez den arte», ziurtatu du Manuel Hernandez Plataforma Nacional por la Defensa del Transporteko presidenteak,

Antolatzailea ez izan arren, harekin bat egin du Hiru euskal garraiolari autonomoen sindikatuak, eta ez du baztertu aurrera egitea geldialdiarekin. «Madrilen gertatzen denaren arabera» jokatuko duela esan du Alberto Nuñez sindikatuko kideak.

Lanera itzultzeko asmo handirik ez dute erakutsi Euskal Herriko gune logistikoaren jarduna moteltzen ari direnek, Bilboko Portuko Garraiolari Autonomoen Elkarteak. Garraiolari autonomoek uste dute Madrilen negoziatzen ari zena ez dela beren aldarrikapen taula, patronal handien agenda baizik. Hain zuzen ere, patronal handi horiek ezartzen dizkiete lan baldintzak autonomo txikiei, eta kexu dira ez dutela gaitasunik haiekin prezioak negoziatzeko.

Hiruren kasuan, bere eskaeren artean dago euskal errepideetan kamioientzat bidesariak ez jartzea, eta horri buruz hitz egin nahi dute foru aldundiekin eta Nafarroako Gobernuarekin, haienak baitira errepideak. Bilera horietarako data zehaztu aurretik, Hiruko kideek utzi egin zituzten atzo azken asteko kamioi karabanak, eta oinez manifestatu ziren Bilbon, Eusko Jaur- laritzaren egoitzaren aurrean.

Garraioaren geldialdia arazo latzak sorrarazten ari da enpresen horniduran. Osagaiak eta lehengaiak ez zaizkie iristen fabrika askori, eta dagoeneko hasi dira jarduera gelditzen batzuk. Eduardo Zubiaurre presidenteak esan du balitekeela «kolapso orokorra» egotea, eta «atzera-bueltarik ez duen egoera bat» izan litekeela ekonomiarentzat. «Inoiz ere bizi izan ez den egoera bat da; dena doa okerrera. Ekaitz perfektua da, non dena lerrokatzen ari baita alde txarrean».

Michelinek ekoizpenaren zati bat geldituko du asteburuan eta Mercedesek ez du astelehenean lanik egingo. Mercedesen ekoizpena astearte, asteazken, ostegun eta ostiraleko hiru txandetara mugatuko da datorren astean. Michelinek ibilgailuentzako pneumatikoen ekoizpena bertan behera utziko du.