Gipuzkoako ostalariek edukierak handitzea eta gau-jarduera izatea galdegin dute. “LABIk ezin du itxi oporrengatik, goi-denboraldian gaudenean”, esan du Kino Martinez elkarteko idazkari nagusiak.

Langile bat zauritu da Bilbon, hankan xafla handi bat erorita. San Agustin Estrata kalean gertatu da. Behargina beilatokiaren zaharberritze-lanetan zebilen.

Langile bat hil da Karrantzan, zuhaitz batek zanpatuta, mozketa batean. Montañan auzoan izan da, Bizkaiko udalerri horretan.

Tubacexetik kaleratutako 128 langileek “behin betiko eta berme osoz berriz onartzea” eskatu dute. Greba mugagabeak azpikontratazioa, lanpostuen prekarizazioa eta enpresaren eta bailararen biziraupena eta etorkizuna bermatzeko direla azpimarratu dute berriro langileek.

Rolls-Roycek Bain Capitalekin negoziatu du ITP Aero enpresaren salmenta, 1.600 milioi euroren truke. Iragarpen horren aurrean, Eusko Jaurlaritzak bere premisa ITP Aero erostearen atzean industria proiektu sendo bat egotea dela esan du.

Laboral Kutxak 51,8 milioi euroko irabaziak izan ditu 2021eko lehen seihilekoan. Emaitza horiek % 12,7ko hobekuntza erakusten dute, 2020ko denbora tarte berarekin alderatuta.

Tubacexek iragarri du ez duela kaleratzeak baliogabetzeko erabakiaren aurkako helegitea kenduko. Enpresako Zuzendaritzak, halaber, ohartarazpena egin die Amurrioko eta Laudioko fabriketako langileei: “Grebari eusteak ondorio konponezinak ekar litzake”.

4.750 langabe gutxiago daude Hego Euskal Herrian, 2011z geroztik uztailik onena. Langabeziak lau lurraldeetan egin du behera. Horrela, uztailak 3.157 pertsona langabe gutxiago utzi ditu EAEn (% 2,58), eta 1.593 pertsona gutxiago daude lanik gabe Nafarroan (% 4,39).

Pasaiako portutik aritzeko aurreakordioa sinatu du Geoalcali enpresak. Nafarroa eta Aragoi artean dagoen Muga meategia ustiatu nahi du Geoalcalik, eta potasa-ekoizpenaren zati handi bat itsasoz esportatzea aurreikusten du.

Aurki hasiko da Europako Batzordea Next Generation funtsen banaketarekin. Litekeena da lehen milioi euroak aste honetan bertan iristea beren suspertze eta inbertsio planak onartuta dituzten estatu kideetara. Gobernu zentralek jasoko dute dirua, eta gero haien esku egongo da gastatzea eta beren menpeko erakundeekin partekatzea. Espainiako Gobernuak aurten 19.000 milioi euro inguru jasoko ditu Bruselatik, eta agindu du horietatik %55 autonomia erkidegoen esku utziko dituela, 10.500 milioi gutxi gorabehera.

Diru horren banaketari buruz hitz egiteko konferentzia telematikoa izan zuen atzo Maria Jesus Montero Espainiako Ogasun ministroak autonomia erkidegoetako sailburu ekonomikoarekin. Ministroak adierazi zuen dagoeneko erabakita dagoela diruaren hiru laurden, 7.230 milioi euro, nora joango diren.

Konferentzia horretan parte hartu ondoren, Pedro Azpiazu Eusko Jaurlaritzako Ekonomia sailburuak ziurtatu zuen bere gobernuak ia 500 milioi euro dituela bermatuta. Hiru urtean jaso beharreko dirua da hori, eta Gasteizko gobernuak berak kudeatu beharko du haren banaketa. Madrilera bidalitako Euskadi Next planean, berriz, Jaurlaritzak 6.400 milioi euro eskatu zituen bere proiektuetarako.

Azpiazuk gaineratu zuenez, irailetik aurrera jakingo dute gehiago diruaren banaketari buruz.

Nafarroako Gobernuak ez zuen daturik eman.